自從《中國有嘻哈》出街之後，多咗人討論一個話題──「香港係一個埋沒人才嘅鬼地方」，講香港人唔珍惜自己友，搞到個個北上發展。俗語有話「冰封三尺，非一日之寒」，依個話題講咗好多年啦，你諗下「樂壇已死」係幾時講嘅就知啦。

啱啱同完陳奐仁做咗個訪問，問起佢依個話題，佢都好感慨咁話：「香港人不懂珍惜也未必，香港人第一要關心民生，第二要關心自己家庭搵錢，第三才有機會關心其他，音樂在人的心目中可能只是其中一個嗜好。」講真，日日都忙到得閒死唔得閒病，哪有時間去做其他嘢。

在座有幾多位為咗返工搵食，而冇晒生活，每當人哋問起你有咩嗜好，你都要諗好耐先咇到一個出嚟，因為其實你心入面嗰句係：「我放假只係想喺屋企瞓覺。」嗰種明明好想生活，但卻只係可以生存的感覺係幾咁令人無力。

我諗好多人都會覺得：「其實我唔係冇嗜好啊，唔係唔想關心香港唱歌唱得好嘅歌手，唔係唔想睇好戲嘅藝人，只係我真係冇時間去做。日日朝九晚五，但係五點點可能收到工，成八點先返到屋企，打開門就坐低食飯，邊食邊睇電視，食完又夠鐘瞓。最多只係喺逼地鐵返工時聽下歌，或者因為唔想聽到老闆把聲而用耳機塞住隻耳做嘢，我知咁樣聽歌法係好低質，但我真係盡咗力。」

係咪好啱聽呢？係啊，真係好忙㗎，真係冇時間去了解㗎，但每當手機有Push彈出嚟寫出「【獨家】xxx背夫出軌…」，依啲稿一定係爆Like，間唔時有啲冇咁紅嘅星出新聞，仲會見到有人留言話個星冇人識，問心，你真係冇時間？

其實香港係文化沙漠依件事，真係每一個忽略過文化藝術嘅人都有責任，因為我哋好容易會有好多藉口去放棄我哋鍾意嘅嘢，而我哋換來嘅就係原本可以點綴生活嘅嘢變得越嚟越少，然後生活就只剩下工作，不斷重覆上面嗰段嘅埋怨。當然香港埋沒人才仲有好多種種嘅因素，但咁多個因素入面，最易改變嘅就係你自身，對吧？