【80後創業】設計師為父親開咕嚕肉專門店 5種特調醬汁邊行邊食

撰文:
最後更新日期:

咕嚕肉——一道在大牌檔、茶餐廳、酒樓都找得到的平民小菜,跟其他家常便飯平起平坐,卻有人愛它愛到,要開一間咕嚕肉專門店!一切源於店主Franki對父親所煮之咕嚕肉的一份情意結,他認為父親的手勢,絕對值得受更多人欣賞,於是近日終於將埋藏在心底10年的夢付諸實行,開設這間餐廳。而最特別之處,是咕嚕肉居然醬汁另上,還有多達5種口味,實在過癮!

攝影:鄭子峰

Franki的父親本身是個技工,卻醉心鑽研廚藝,所以Franki自細已好有口福,食到嘴都刁埋,他說自己本來不愛食肉,然而父親炸的咕嚕肉卻讓他愛不釋手、吃個不停,所以早在10年前仍就讀設計系時,他已不時叫爸爸開私房菜館,但父親總淡淡然回答:「算啦,你哋覺得好食啫,邊有人覺得真係好食吖?」儘管父親對自己冇信心,加上小家庭資金有限,然而Franki卻從未放棄要將這「愛心咕嚕肉」發揚光大的目標,靜待一個機會,並不斷研發如何把這家常料理做得更有特色。

Franki用兩年時間虛心學習,終於夢想成真,成功開舖讓更多人認識到父親獨門秘製的咕嚕肉。

咕嚕肉平時要入酒樓坐低食,我將佢變成適合街頭食嘅小食,呢個都係幾大嘅革新!

講到為何Franki所賣的咕嚕肉會汁、肉分離,他就解釋父親本來都是沿用傳統做法,把甜酸汁跟豬肉炒勻,但有時候一放久了肉就會被醬汁浸腍,因此他靈機一觸,提議對方試著把醬汁另上,讓家人每吃一件才蘸一次醬,「炸雞都係汁同肉分開啫,但係冇炸豬喎?同埋咕嚕肉平時要入酒樓坐低食,我將佢變成適合街頭食嘅小食,呢個都係幾大嘅革新!」

然而萬事俱備,只欠東風,講到他終於踏出創業第一步,原來與另一位男士有關——叙福樓集團執行董事黃傑龍,黃傑龍素來鼓勵年輕人創業,兩年前他在facebook招募年輕人合作搞美食車,空有一股熱誠,卻毫無經驗的Franki鼓起勇氣毛遂自薦,「嗰時膽粗粗整咗個Proposal,但係最後計過數,發現美食車未必可以好好地營運到,決定不如直接開地舖。」

咕咾Goolo上月底開張,身為Franki伯樂的黃傑龍不但有份投資,更在facebook開Post力撐!

與此同時,本身做設計師的他加入了黃傑龍旗下公司,在公關與市場部門繼續做設計,兩年光景獲益良多,「真係好好彩黃生畀咗呢個機會我囉,冇同佢嘅合作,呢個夢想唔會實現。之前完全冇接觸過F&B(餐飲),喺佢公司先接觸到,又可以Keep住做我擅長嘅嘢。呢兩年不斷研發,直至大半年前覺得時機成熟,啲嘢穩定就正式開呢個品牌,開始學點計數、點樣Run一個Business。」作為設計師,本身對美學固然有自己的一份執著,這位商場新丁最初總是顧著個「靚」字而忽略了現實,「Designer一定係以靚行先,但黃生就畀好多意見我,要我將靚同Operation之間拿捏返個平衡。為咗靚,影響到我啲同事做得唔Smooth,咁有咩用呢?呢個係我最明顯學到嘅一樣嘢。」

Franki本身做設計出身,店裡的裝潢和海報設計都由他一手包辦,走港式風格,又夾雜少許西方味道。(facebook:咕咾 Goolo)

店中央的紅色霓虹豬仔十分醒目,其實是參照Franki童年的塑膠「豬仔錢罌」設計,他解釋無論「紅色」還是「豬仔」兩個元素都與主打的咕嚕肉相符,故以之為餐廳招牌設計靈感。Franki指紅色塑膠豬仔錢罌目前已經絕版,二手價炒到近千元,所以他稍後會「復刻」這豬仔錢罌,供食客換領!

由於爸爸體力未必負荷得來,不會來舖頭幫手,所以Franki決定開舖後,就參照他的配方,與師傅一同研究,幾個月來食炸豬肉食到厭,「原來唔係睇起上嚟咁簡單,佢寫乜你跟住嚟整就得㗎,要注意好多Details位先整到依家咁。我唔係一開波就即刻整到佢嗰個效果,我有Keep住問佢,其實嗰度係點㗎?點解我做又唔同你嘅?佢都Keep住畀意見我。」問到目前學到爸爸幾多成功力,他笑笑說:「接近十成㗎喇!」儘管記者未嘗過Franki爸爸的手勢,但大概日子有功,Franki改良過的配方所做出來的咕嚕肉,炸得乾爽又不膩,佐以各種酸酸甜甜的醬汁,更是別有一種新鮮感。

按下圖即揭曉5款特調醬汁口味!

咕咾拼盤 $98 | 豬腩肉、豬爽肉、梅頭肉各4件,免費送一款醬汁及兩條滋味健康棒。

食咕嚕肉通常都是用豬腩肉,然而咕咾Goolo則供應三款豬肉,包括:豬腩肉、梅頭及豬爽肉,他說:「豬腩肉就肥啲好食啲,佢肥所以夠多汁吖嘛,但我哋諗嗰時就覺得,係咪真係個個都鍾意食咁肥嘅豬肉呢?會唔會有人覺得漏呢?所以就研發埋另外兩個部位,梅頭係半肥瘦、脂肪同肉係均勻,而豬爽肉就令佢口感更加強,因為佢係最彈牙嘅部位。」

豬腩肉 $38 | 外型較為四四方方,吃起來Juicy。

爸爸成日覺得自己做緊啲個個識做嘅普通嘢,我就係想證明畀佢睇,佢整嘅咕嚕肉係有獨特性!

原來當Franki父親得知他決心開舖時,並沒太大反應,Franki說:「佢成日覺得自己做緊啲個個識做嘅普通嘢,我就係想證明畀佢睇,佢整嘅咕嚕肉係有獨特性!同埋經過重新Polish完,或者令個Brand形象再出啲,其實成件事會唔同晒。直至真係開喇,佢嚟過喇,我睇得出佢係幾開心。(佢只係內斂?)係呀,傳統爸爸嚟㗎嘛,我Feel到佢開心,但係冇好誇張咁講出口。」店舖開張後,父親親身光臨這間店,當講到他對菜式有何評價,Franki滿足地表示:「佢嚟試完都覺得幾好,同埋佢未試過豬爽肉同梅頭吖嘛,佢食完話:『咦,原來幾好味喎依兩個。』返屋企都有自己整嚟食,調返轉頭跟返我。」

Franki的父親(左)總不相信自己的咕嚕肉有人喜愛,每當兒子建議他開舖,他總是耍手擰頭說:「傻㗎咩?咁辛苦!邊有人真係覺得好食吖!」但試食過的記者可以親身做證,的確有人覺得好食㗎!(受訪者提供)

除了咕嚕肉之外,餐廳也供應其他小食、炸物和甜品等,請即按下圖睇其他菜式及價錢。

飲品方面則比較特別,餐廳推出了三款涼茶啤,絕無酒精成分,大人細路都適合飲用。他解釋靈感由來:「我哋呢兩年一路研發,就Keep住食好多炸嘢,當然我哋都知炸嘢配啤酒係十分好,但係冇理由下下飲啤酒,我每次覺得熱氣就會去買涼茶飲,飲飲下就覺得,咦?其實炸嘢配涼茶先係最好喎!一路講緊啤酒係『鬼佬涼茶』,咁我可唔可以將涼茶扮成啤酒呢?」就這樣,三款口味的涼茶啤就此誕生。

(左起)洛神花茶啤、竹蔗茅根啤、夏枯草啤 $28 | 三款都是有汽涼茶,為了讓它們更似啤酒,店家特地加了一層蜜糖泡沫,小朋友都啱飲!

咕咾Goolo
地址:尖沙咀柯士甸路15號金巴利大廈B座地下C舖
電話:3460 2328



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。