【熱評】水曱甴係龍蝦遠房親戚? 蜑家妹由細玩到大教你點樣分

撰文:
最後更新日期:

文:蜑家妹出走記

認得我耐嘅人都知道,我係會追曱甴踩死佢地嘅。重點在「追」字:唔係有隻曱甴咁啱經過腳邊嚇到跳起然後咁啱踩中隻猙獰小生物,而係見到疑似曱甴物體或聽到有人驚恐尖叫就走埋去,證實係曱甴就一個箭步送佢一程。我之所以會咁做(經過長時間內心小劇場反覆推敲),相信同兩個童年深刻印象有關。第一個,就係細個唔記得幾年級(我除咗識反駁老師,「魚唔一定有魚鱗」之外,都會乖乖聽書嘅),又係上常識堂,老師講人類濫用殺蟲劑,遲早所有害蟲如曱甴都會對化學物質免疫,要消滅害蟲就唯有用手拍用腳踩。唔知點解由嗰刻開始,我覺得自己身負重任,要保衛地球,就要靠自己勇敢同努力踩死曬啲曱甴。

另一個深刻印象,就肯定係同曱甴嘅水上兄弟——水曱甴有關。儘管我只係一個細個時part-time喺水上生活過嘅偽蜑家妹,不過我可以肯定咁講,我見水曱甴嘅數量多過見曱甴。你有無見過水曱甴?我見過,我真係見過。

水曱甴並非曱甴,而是等足目動物,與竹節蝦、龍蝦、長腳蟹等矜貴海鮮是遠房親戚。(網上圖片)

水曱甴係咩東東?平時你行過海旁,見到嗰啲扁平長卵形,有點神經質、察覺到有人經過或感到有任何風吹草動,就會在岩石面或隙縫、或碼頭柱躉藤壺之間四處亂竄的小生物,就係水曱甴啦。不過水曱甴(sea slater)並唔係曱甴,更加唔係住喺水邊或大海嘅曱甴,而係等足目動物(唔係昆蟲呀!)。有好多人以為水曱甴係龍蝨(diving beetle;又叫和味龍);龍蝨係又識飛又識游水嘅甲蟲,同水曱甴係兩種完全唔同嘅生物。等足目動物水曱甴即係咩呢?即係竹節蝦、龍蝦、長腳蟹等矜貴海鮮嘅遠房親戚。(有興趣嘅朋友可以參考呢個網頁:http://taieol.tw/pages/127722)

水曱甴其貌不揚,不過對於蜑家人同鍾意「呔椅」嘅人嚟講,係好有用嘅嘢——魚餌。水曱甴走得好快,又鍾意捐窿捐罅,點捉呢?呢個時候,又要靠特別技巧啦!前幾回提到,我在8、9歲嗰陣爺爺嫲嫲送咗隻艇仔俾我地班細路。長輩教落:要玩就要負責任,於是打理呢隻「探險船」嘅重任,就落咗喺我地身上。其實只不過係一隻划艇仔,都無咩特別嘢要做,做得最多嘅,就係隔一個月剷船底——將艇仔底部嘅藤壺(蠔叔)清除。

龍蝨又叫和味龍,是一種識飛又識游水的甲蟲,與水曱甴是完全不同的生物。(網上圖片)

為咗方便我地幾隻甩繩馬騮安全又快手剷船底,長輩們會快手快腳將艇仔反轉,抬上停泊嘅木浮橋上面,跟著我地就會攞住架生一擁而上(通常係一個cut開咗嘅四方形清潔劑或偈油膠桶,加一把油漆刮刀或刀仔,手套都無呀陰公),背後有嫲嫲大聲打氣:「快啲捉曬啲水曱甴呀!」話就話係勞動,但可以攞正牌揸住咁危險嘅工具,同啲水曱甴鬥智鬥力,都好好玩㗎!

其實喺隻艇仔由水中被抬起反轉呢幾秒、電光火石之間,幾百隻原本响船底嘅水曱甴受驚四處亂竄,好多會跌落水然後游去旁邊其他船嘅船底藤壺或浮橋木柱上,剩低唔敢跳海嗰啲,一係跣落艇仔圍邊(因為有油漆面,佢地捉唔實,所以好難逃走),一係拼死抓住艇底藤壺。我地攞住把油漆刮刀輕輕一剷一撥,就可以將藤壺連水曱甴掃入膠桶入面。清理完艇仔,就會有一大桶水曱甴啦!

facebook:蜑家妹出走記 Strolling Tanka
 

(文章標題由《香港01》編輯所擬。文章純屬作者意見,不代表《香港01》立場。)

立刻Like!讚好《01熱話》:


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。