Sogo臨收工魚生減價睇員工心情? 有人斥嘥嘢 有人指特價非老奉

撰文:
最後更新日期:

不少商店為清貨及減少浪費,關門前會把保質期較短的新鮮食物貼上特價標籤,以吸引顧客購買。有網民指日前晚上到銅鑼灣祟光百貨超市購物,原想為愛犬購買特價魚生,沒料等到關門前5分鐘亦未見職員貼上特價標籤,一問之下職員竟指「冇mood或者唔想貼就冇特價」,更稱賣剩魚生均會棄置,令樓主大感憤怒。帖文引起熱論,網民意見兩極,有人質疑超市員工沒跟從指引,亦有人批評樓主視特價為理所當然,買不到平價魚生就胡亂投訴。

《香港01》正向Sogo了解事件,暫時未獲回覆。

有網民指到祟光百貨的超市購物時,職員沒有為魚生貼上特價標籤清貨,更稱會棄置未能售出的魚生,有浪費食物之嫌,揚言會向店方投訴。(fb群組「西環變幻時」截圖)

下載「香港01App ,即睇城中熱話:https://hk01.app.link/l7U1Y7t5LO

一名女網民於fb群組「西環變幻時」發文,稱前晚到銅鑼灣祟光百貨的超市購物,打算購買特價三文魚供家中「狗主子」食用,但她「由9點半等到10:25」,亦未見有職員為魚生貼上特價標籤。

樓主指當時「雪櫃全部都係琴(噚)晚1/9會過期嘅新鮮三文魚同埋刺身」,而店內亦已發出廣播,稱將於5分鐘後關門。她指「平時9點半已經貼晒帖子(貼紙),好多人會攞」,故對當晚沒有特價魚生感到奇怪,於是向職員查詢,詎料對方竟稱「好睇入邊廚房嗰啲人會唔會貼貼紙,如果佢哋冇mood或者唔想貼就今晚冇特價㗎啦」。

該職員即時為樓主走入廚房詢問,確認仍未售出的魚生當晚不會有特價,並指原因是「入邊阿頭唔想貼(特價標籤)」。當樓主追問職員會如何處置剩下的魚生時,職員直指「啲嘢會掉㗎啦陣間」,令樓主大感憤怒,直斥「有無咁嘥嘢啊」。樓主形容,當時「嬲到唔識講嘢」,指櫃內「全部新鮮,全部靚魚」,故即使未有特價,她仍選購其中一盒魚生,並稱會發電郵向店方投訴。

帖文引起網民熱議,有人批評樓主「執平嘢無望就要投訴」,直言「老奉過9點要特價咩…因為自已買唔到平嘢去投訴人哋都有嘅」,有人認為樓主「等左一粒鐘,結果無特價貨,條氣唔順要白等所以咪投訴人發洩囉」。

+6
+5
+4

有人指樓主「放錯重點」,除了浪費問題外,質疑超市員工「睇心情貼標籤」已屬違規工作,「日本人做野一板一眼,我諗唔會晚晚唔同做法睇心情」,贊同她向店方反映問題。

亦有不少網民與樓主看法一致,認為特價與否非重點,問題在於店方或職員處理食物的態度,批評職員輕易棄置新鮮食物,造成浪費,稱「因為員工懶而無去做,導致商家蝕錢,食物被浪費,買家無得益,呢件事係錯到離晒譜」,「有冇特價我覺得都唔係問題,重點就咁就掉咗佢係極之浪費食物嘅行為」。

面對眾多意見及抨擊,樓主其後再次澄清自己並非「為特價而發文投訴」,指「我嬲唔係因為我買唔到特價,係眼前全部新鮮可以賣到出去嘅全部掉曬(晒)」,又稱「post 得出黎(嚟)預咗有人指罵,I don’t care. 我係講出事實」。

《香港01》已電郵Sogo查詢,暫時未獲回覆。

(fb群組「西環變幻時」)

立刻Like!讚好《01熱話》:


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。