火車迷工廈開模型場 砌出超迫真鐵道場景:貼錢營運但有成功感

最後更新日期:

香港「土地問題」舉世聞名,港人除了為買樓上車苦惱,嗜好涉及儲物的人士,多年來苦苦搜購大量珍藏品,但遇上儲存空間不足,就被家人「強行放血」,將珍藏品掃出家門,真是「聞者傷心,聽者淚流」。對土地問題感受至深者,一定包括鐵道迷,因為要在家中鋪設路軌玩火車需較大空間,就算收藏品能保住,往往只能「斬件」收起,十分慘情。

鐵道迷林道健(Raymond)自小已經對火車情有獨鍾,因深明同道人之苦,決定在工廈開設火車模型場「鐵道交流所」,一圓兒時夢想,讓自己和其他鐵道迷的珍藏可以在迷你城市之中奔馳。Raymond直言,這個迷你火車城市的工程如現實的鐵路工程一樣「超支、delay」,支出由預計10萬變成20多萬,建設時間則由3、4個月變成8個多月,而且入不敷支需每月倒貼逾6000元營運,「但望住係有成功感」。

Raymond自幼稚園時期已經喜歡火車,投身社會一段時間後,便決定開設一間鐵道模型情景場,讓自己過癮之餘,同時推廣鐵道文化。(溫嘉敏攝)

+16
+15
+14

下載「香港01App ,即睇城中熱話:https://hk01.app.link/qIZYuEC5LO

32歲的Raymond自幼稚園時期已經極之喜歡火車,內心對火車鐵道有難以言喻的愛,小時候連買Tomy火車都買不起,只能買最便宜的玩具火車,「最記得去親SOGO、利廣(模型店)、紅磡站、沙田好運,有N比例(火車)睇嘅地方都賴死唔走,大啲咪玩下《電車GO》」。

畢業後投身社會,Raymond「入坑」玩Tomy的火車玩具Plarail,直至約4年前,才正式開始儲比較仔細的N比例模型。不過礙於土地問題,想讓藏品在路軌上奔馳,只能在家中將路軌「朝行晚拆」,一來是費時失事,二來亦難以做出仔細的場景,缺少高樓大廈、草地河流等,真實感欠奉。

情景中的一處草地上有一個牧場,遠看可能還會以為牛隻在走動。(溫嘉敏攝)

+12
+11
+10

去旅行去到盡,玩模型亦一樣,Raymond參考了日本鐵道文化和歷史,決心要一手一腳砌出火車模型場,既讓自己過癮之餘,同時推廣鐵道文化。「香港可以話係最富有嘅城市,但係點解連一個Layout(場景)場都無呢?我覺得香港至少香港可以支持到一個Layout場畀大家嚟玩」。

為了圓夢,Raymond自2017年初開始四出搜羅材料及合適的用品,並在荔枝角租下一個500呎工廈單位,由8月開始全身投入砌模型場。他最初估計投資約10萬元、約需3、4個月便可以完工開舖,而且一年內收支平衡。「算係商業嘅形式去做,但唔會預計利潤會好多,其實我個目標係維持交到租,同埋可能有份最低工資畀我咁樣囉!」

不過,理想和現實總會有落差,Raymond感慨在工程期間遇上很多困難,「典型鐵路公司嘅問題喇,超支、delay」,最後超支一倍多,花了20多萬,「而家一大疊單,都唔敢計住,唔敢面對」,工程耗時8個月,而且每月要倒貼6000至7000元去營運模型場。

每條鐵道都要開山劈石築成,連砌模型場也如是,Raymond坦言在做場景時常遇挫折,例如最初路軌設計有問題,導致火車經常出軌,過程中不時會想放棄。「每個月貼幾千蚊出嚟,仲要(做場景)做到12點幾先返屋企,第二朝返工,咁究竟為咩呢?每日維持住咁樣嘅生活,再遇到啲挫折感,已經會想放棄。不過都係短暫嘅,過咗一陣平伏返再繼續努力囉!」

Raymond會按照不同季節,調整場景內的擺設,例如在秋天將部分樹木換成紅葉。(溫嘉敏攝)

+12
+11
+10

「整呢啲咁大個場嚟玩,都叫做由細到大30年嘅夢想,見到個Layout嘅時候都會想見到值70分先至肯停手,而家都未到,呢度可能都係50分,暫時唔係蝕太多都可以走落去」。不過,模型場的前途問題迫在眉睫,因租約明年中便到期,Raymond坦言「如果一路蝕到無止境,都唔可以一路咁捱落去」,如加租太多都要考慮是否繼續經營。

投資20萬元還要「月供」數千元,不少人可能選擇將錢儲起做首期,上車置業。不過Raymond卻說,自己與買樓愈來愈遠,與其以有涯隨無涯,倒不如試一下其他東西,追尋夢想。Raymond向家人提出做模型場的時候,家人都沒有太多意見,更認為他還年輕,一試無妨,連太太和家人都有力出力,幫忙修整場景中較簡單的部分。但Raymond近年都因為營運模型場而遲回家,與家人見面的時間很少,「可能心入面(覺得)蝕咗好多錢喎,所以無再問佢哋(點諗)喇」。

Raymond在荔枝角租用了一間實用面積500呎的單位,花8個月時間才完成鐵道模型的工程,而租約於明年8月到期,如有幅加租可能要考慮是否營運下去。(溫嘉敏攝)

+2

如果可以再選,還會做模型場嗎?Raymond直言:「可能唔會,又唔係話一定唔會嘅,可能七三比,七成係唔會,三成係會。」他指這個模型場的代價實在太大,除了錢之外,身體亦很累,「呢啲Layout諗落去幾時都覺得簡單,勞作仔諗落好似好易,點知做落係好耐」。

開模型場原本是希望自己「手痕」可以玩,不料開檔之後,自己玩的時間比客人更少,「但係望住係有成功感,覺得自己整咗個城市咁樣,最大成功感就係整咗呢舊嘢,就係我成功感來源」。看到火車可以在鐵道上走動,小時候的他只能隔着櫥窗觀看,如今卻能真正擁有,「如果唔係做呢間(舖),屋企無可能整呢樣嘢出嚟,咁耐嘅夢想實現咗少少」。

鐵道交流所facebook專頁

鐵道交流所網頁



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。