巴士東廊死火 趕返工乘客鼓譟叫落車 理智乘客撐司機冷靜應對

撰文:
最後更新日期:

巴士司機偶爾會成為無理乘客的出氣袋,還幸仍有禮貌乘客撐司機。有網民上周搭巴士,沒料駛至東區走廊時巴士在車路中拋錨,司機即致電公司及報警,車內趕返工乘客不滿,有人怕危險叫駛前一點,甚至有人鼓譟要求司機開車門下車,司機冷靜解釋,其他乘客亦幫口稱落車更危險,最終所有人安全登上另一架巴士。記下事件的樓主過車時特意多謝司機,網民亦大讚司機專業,亦有人慨嘆社會怨氣重,反問「話明壞車,都有得揀駛前d先停車嘅咩?」

巴士在東區走廊拋錨,導致乘客鼓譟,甚至要求下車。(fb群組「柴灣人柴灣事」圖片)

車長協助乘客過車。(fb群組「柴灣人柴灣事」圖片)

下載「香港01」App ,即睇城中熱話:https://hk01.app.link/qIZYuEC5LO

【周五心意運動】您捐一封$50利是,已可為基層送上溫飽,01心意呼籲您支持【食德好】,每$50可為12個家庭提供一餐回收蔬果及食物

有網民在facebook群組「柴灣人柴灣事」,圖文並茂指上周某日下午登上8P雙層新巴前往天后返工,他坐在下層位置,巴士如常駛入東區走廊至鰂魚涌公園對出時突然死火,在6條行車線中停在中間位置,他指「左右兩邊嘅車都係飛馳狀態」,司機1分鐘內至少打了三次電話,包括通知公司及報警求助。

雖然司機落力補救,但巴士故障令部分乘客鼓譟,當中不少都是上了年紀的人士,齊齊抱怨「返工㗎嘛!早知搭早一班車」、「停喺路中心有冇搞錯呀」、「停埋一邊起碼可以落車嘛」、「好停唔停,停係路中心,睇下後面邊架車發雞盲撞埋嚟,撞死晒成架巴士啲人囉」、「叫車嚟接啦」,更有人無理要求「開車門啦!畀人落車啦」。

事發現場總有6條行車線。(Google Map街景截圖)

任何巴士問題都會令到司機成為無理乘客的出氣袋。(資料圖片)

面對激烈又無理的批評,樓主指司機始終都保持冷靜,兩度「撻匙」不果後,在一片嘈吵聲之中,他大聲向乘客解釋「我而家通緊電話,你哋如果太大聲嘅話,我就聽唔到㗎啦」,令乘客稍為安靜。

身處其中的樓主暗讚司機盡力補救,同樣趕返工的他「第一時間通知僱主並且有相片為證」,車上其他年青乘客亦幫忙向鼓譟乘客解釋「司機梗係唔畀你落車啦!開咗門實有人衝落去㗎!一陣間有咩事到頭來又係賴司機」,樓主亦「幫口」表示「其實司機都係跟公司指引做,而且佢已經第一時間通知有關部門,應該有交警嚟緊」。

其間有乘客有禮貌詢問「㗎車好焗呀,可唔可以打開車門呀?」司機聞言打開司機位旁邊的車門,但是車身中間車門沒有打開,相信防止有人衝落車釀成意外。

10幾分鐘後,交通警接報到場,指示一架路線2X新巴停車,讓所有人過車,過程中司機不斷說「唔好意思」,一邊協助指揮眾人小心過車,所有人守秩序照做,而樓主過車時更向司機說「唔該晒,辛苦晒」,目擊整個過程的他,批評該批無理乘客「為難司機…面口同口氣真係有啲不知所謂」,亦「多謝司機哥哥冷靜專業禮貌嘅表現」。

這則帖文引起網民熱烈討論,不少人大讚司機專業,「香港人好鍾意返工」、「非常贊同樓主嘅體諒,多啲人諗多幾步,畀多啲耐性,香港真係會少好多紛爭」、「一句『辛苦晒』真係好有鼓勵性!的確社會壓力令香港人太多埋怨,有時有機會就會唔放過…話明壞車都有得揀駛前啲先停車嘅咩?」不過亦有網民對鼓譟者表示理解,「有部分無良僱主又真係唔理你咩理由,遲到就扣錢…尤其係低下階層,所以都要明白個啲打工仔」。

(fb群組「柴灣人柴灣事」)

立刻Like!讚好《01熱話》:


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。