【生活百科】暴雨連場慎防鋁窗漏水 裝修佬教6招預防免後患!

撰文:
最後更新日期:

文:裝修佬

窗戶使用頻繁,但又係容易被我哋忽略嘅一部分,如果日常無注意保養就會縮短窗戶嘅使用壽命,亦會發生漏水漏風嘅問題;漏水會造成屋企家具同牆體發霉,嚴重影響日常生活。其實造成窗戶漏水原因唔多,只需要搵到源頭就可以解決,自己郁手都搞得掂,唔需要下下搵師傅上門。以下裝修佬為大家講解鋁窗漏水原因,教大家解決漏水嘅方法。

窗戶使開合頻繁,需好好保養少能避免漏水或出現窗框鬆脫等問題。(資料圖片)

下載「香港01」App ,即睇城中熱話:https://hk01.app.link/qIZYuEC5LO

漏水原因

1) 鋁窗附近牆體防水層受損   

樓齡較長嘅舊樓,窗嘅周邊牆體嘅防水層破損容易出現漏水。另外,舊樓改造換窗時,拆窗唔專業造成外牆防水層破損,如果無及時修補,安裝新窗後,好有可能出現漏水。 

2) 鋁窗鬆動變形   

鋁窗邊框之間鬆動造成漏水係最常見原因。一方面係關門太用力,窗會產生共鳴震動,時間長咗,窗同牆體間嘅空隙愈來愈大。另一方面係由於鋁窗質量唔好造成,質量較差嘅鋁窗強度唔夠,容易產生變形,就會發生窗框邊砂漿層開裂、脫落,從而引發滲漏。 

3) 窗槽排水孔排水不暢   

一啲窗有可能無打排水口,尤其係推拉窗,雨水全部積喺推拉框槽內排唔出,滿咗就會滲漏。或者外窗台貼瓷磚嘅時候無留意排水口塞咗,推拉框槽入面嘅雨水就全部滲到牆裡面而導致漏水。另外,使用時間耐咗,排水口可能被污物阻塞,導致水流唔能夠及時排出。

知道鋁窗漏水原因,便可以用對應方法解決問題。(視覺中國)

解決方法

1) 重新密封縫隙   

出現窗框同牆體、窗台空隙造成嘅漏水,將空隙重新密封即可。對於外面窗框同牆體窗台間嘅空隙,最好將原先密封物清除,填入耐候型玻璃膠密封,然後用泥沙漿封死做防水。   

2) 檢查窗框同牆體結合處   

經常檢查窗框同牆體結合處,日久如有鬆動極易令框架整體變形,令窗無法關閉、密封。所以連接處嘅螺絲鬆動應立即擰緊。 

3) 保持窗口排水槽暢通   

針對窗框排水槽淤塞造成漏水,保持排水槽暢通即可解決問題。如果排水口位置有問題,需要封閉原排水口,再重新開窿。 

想鋁窗不漏水,正確安裝同樣重要。(資料圖片)

4) 正確安裝鋁窗   

室外窗台應低於室內窗台板20mm(毫米)為宜,並設置順水坡,雨水排放暢通。鋁窗外框同室內窗台板嘅空隙必須採用耐候高彈性密封膠封閉,確保水密性,防止產生滲漏。窗楣、窗台應做足夠嘅滴水槽同流水坡度。 

5) 重做鋁窗牆體防水層   

鋁窗牆體本身漏水,解決辦法就係撬開外層牆,進行修補,修補完檢查是否穩陣,切記要鋪加防水層。

6) 鋁窗需要經常清洗   

保養鋁窗,先可以真正防止漏水,延長使用壽命。日常需要經常清洗保持表面,儘量選擇軟質紗布或棉布等,以免劃花鋁窗表面。有污漬同污物時,可用清水、酒精或中性洗滌劑清洗。落雨天過後,應及時抹干淋濕嘅玻璃同窗框,特別注意抹干滑槽積水。滑槽用耐咗,磨擦力增加,可加少許機油或噴潤滑劑。

作者簡介:

裝修佬是家居裝修奇難雜症專家,希望透過文章分享及網上互動,解答巿民各式裝修難題,改變大眾對裝修方式和置家理念。

作者facebook專頁:https://www.facebook.com/hkdecoman/

(文章標題由《香港01》編輯所擬。文章純屬作者意見,不代表《香港01》立場。)

立刻Like!讚好《01熱話》:


請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。