「我老婆嫁左比MIRROR」版主被疑「搲飛西客」 前夫4點反駁獲讚

撰文:布萊恩
出版:更新:

【我老婆嫁左比MIRROR導致婚姻決裂關注組/MIRROR演唱會】ViuTV男團MIRROR將於7月底至8月初在紅館舉行演唱會,惟「絕望座位表」等售票問題引來紛絲不滿,擁有35萬名成員的facebook群組「我老婆嫁左比Mirror導致婚姻破裂關注組」版主日前更發文直斥主辦單位是「大黃牛」,當鏡粉是「ATM水魚」,並宣布會在8月關閉群組,引起熱論。
不過坊間有人質疑如版主真的不滿,為何不立即關閉群組而要等到8月,認為版主此舉旨在「搲飛」。事隔3天,版主再於群組發文,以4點反駁質疑言論,又聲稱ViuTV高層金廣誠曾聯絡他,亦有人出「6位數」要買下這個群組。

上集:「我老婆嫁左比MIRROR」fb關注組將關閉 版主怒斥:當鏡粉係水魚

ViuTV男團MIRROR將於7月底至8月初在紅館舉行演唱會,惟「絕望座位表」等售票問題引來紛絲不滿。(網上圖片)

「我老婆嫁咗俾MIRROR導致婚姻決裂關注組」版主Tcr Ch今午(6月5日)再於群組發文,指日前發文後已「潛咗水」3天,「因為資訊量過大,我好似變左香港首席西客咁,係有少少處理唔嚟」,故沉澱過後想分享一些說話,並以4點反駁坊間批評。

第一點:向演唱會主辦單位表達意見

版主表示,關閉群組的決定並不容易,「由無到有,由十個人到一萬人到十萬人到三十五萬人,我相信我比任何人更唔捨得」,而他希望運用「小小嘅影響力」將訊息傳遞予演唱會主辦單位知道,「而幸運地我做到喇」。他聲稱「金生(ViuTV高層金廣誠)」當天深夜來電,他則向對方表達了自己心聲,「我好appreciate佢咁快去正視同埋主動聆聽問題……至於後續係點就留待大家自己觀察」。

第二點:非為「搲飛」攞着數

至於被指是「搲飛」,版主說其職責是管理群組而非透過群組「攞着數」,「我老婆有朋友幫佢撳到實名嘅門票,我無亦都唔需要透過呢個形式去搲飛」。他又稱,收到訊息有人開價「六位數」要買下「我老婆嫁左比Mirror導致婚姻破裂關注組」,但他沒有答應,笑言「sorry出手太低喇,出5億我就賣啦,我送埋我個個人ac畀你都仲得」。

第三點:為何不立即關閉群組?

對於8月才關閉群組,版主解釋MIRROR演唱會是眾人焦點,「可能仲有嘢想講,咁就講埋先囉」,而且該群組有很多大家的回憶,希望餘下一個多月時間可以讓大家懷緬,「我未夠心理準備去撳(關閉)呢個掣。如果你想先行離開,我都感謝你呢一年嘅支持,如果你想留守到最後,咁我最後一個post先多謝你啦」。

第四點:無打算會再開第二個群組

版主承認關閉群組決定「係有啲衝動」,現階段亦無打算會開第二個群組,預計之後會有其他群組應運而生,提醒大家要注意網絡安全。

版主再發文反駁坊間批評。(facebook群組「我老婆嫁左比Mirror導致婚姻破裂關注組」)

版主最後強調,無意去放大事件或分化鏡粉,「開group時我希望大家開開心心,而家都係。Mirror12位成員,如果我有幸造成你哋嘅困擾,我深感抱歉,請你哋好好準備演唱會,唔好令入場嘅觀眾失望,唔好浪費我老婆嘅心機,你張飛真係好難搶㗎」。

前夫網民:支持版主決定

帖文隨即引來「前夫」網民們熱議,紛紛留言支持版主決定,「Respect !」、「好唔捨得,但尊重+明白&支持版主決定,出盡力作出最大嘅控訴!希望佢哋反省&改進」、「辛苦你,完全感受到你嘅難受!」、「好唔捨得呢個group」、「感謝你為鏡粉發聲,多謝你一直努力維繫這個群組,給大家可以苦中作樂」、「支持抗爭到底」。

ViuTV男團MIRROR將於7月底至8月初在紅館舉行演唱會(資料圖片)
你可能感興趣