【任噏樂評】VR睇五月天演唱會好無聊 現場感用錢都買唔到呀!

撰文:黃浩晉
出版:更新:

「睇演唱會,識睇一定係睇Live!」相信好多人都會認同。無論咩風格嘅演唱會都好,親身感受現場氣氛先係享受。不過世事又豈能盡如人意呢,每個睇唔到Live嘅人都總有苦衷。

睇Live同一班志同道合嘅朋友一齊跳一齊嗌先係享受!(資料圖片)

今時今日科技發達,睇唔到Live?唔緊要,有VR直播吖嘛!就好似上年12月王菲於上海舉行《幻樂一場》演唱會咁,門票最貴去到7,800蚊人仔,就算最平都要1,800人仔,就算有心都未必「有力」去睇。當時謝霆鋒出任大中華區業務主席的「數字王國」(547),提供VR直播服務,收費都係30蚊人仔;就連當時霆鋒都係一邊食飯一邊用VR直播睇阿菲開騷。

而「數字王國」噚日舉行發佈會,將繼續發展VR技術,並直播李榮浩今年9月及五月天2018年嘅演唱會。

你諗下,畀30蚊人仔就可以置身王菲上海演唱會,仲要同霆鋒「咁高咁大」一齊用VR睇騷,抵晒啦!

霆鋒都係用VR睇阿菲開騷咋!(影片截圖)

VR直播的確可以打破地域限制,又可以解決一飛難求嘅問題,而且收費又唔費;不過真係冇feel囉!就算我畀番VIP票價,你點都畀唔到現場氣氛我。

講到口水都乾,睇騷緊係食氣氛㗎啦!如果唔係我同睇YouTube有咩分別啫?其他嘢唔講,淨係講畀現場嘅低音打到成個人震晒都抵啦!而且去到現場全部觀眾好自然就連成一體,一齊跟Beat跳、跟住唱,而且我係同偶像喺同一個場地,佢每一句說話都好似只係對我講咁。呢種臨場感,點會係透過一個眼罩戴住耳筒感受到,唔通我戴住個眼罩喺屋企跳咩?

再者,如果VR直播不設重溫,咁啱撞正返工行唔開嘅朋友就陰功豬喇,真係只可以睇DVD。

咁樣睇騷真係正?(資料圖片)

除咗心理上覺得唔好受,技術上亦有所限制。有內地網民喺上年12月畀咗30蚊人仔,體驗一下VR直播王菲演唱會,發覺「聲音畫面都有問題」。就算鏡頭set得再近,王菲個樣都好似打咗格咁,睇番普通720p畫質都冇咁嬲。

就算用作直播嘅VR鏡頭能夠拍攝4K影像,但用家未必有顯示到4K嘅裝置;就算有,網絡速度亦會影響畫質。除咗畫質,話明係演唱會就梗係要聽聲啦。

現場收音,靠現場sound man去mix,之後透過網絡,經過手機,再喺耳筒出,隔咁多層點都會打啲折扣。都未計你用咩價位嘅耳筒去聽。

咁嘅畫質同摙埋一o舊嘅聲你又收唔收貨先?(設計圖片)

又再講,如果為咗用VR睇演唱會時,有靚畫靚聲同臨場感,而大灑金錢去買器材,我不如用呢筆錢睇十次騷好過啦。戴眼罩睇點都係虛擬,用腳行入現場先係實境呀!