【我不怕唱歌】新人王唱《浮誇》零難度 曾俊華超Like:謝安琪?

撰文:史順宜
出版:更新:

又來到一星期一次的《我不怕唱歌》環節,今次帶嚟一位「女高音」,想當年因為贏得某大型比賽而入行,當時年紀輕輕嘅佢已經喺樂壇一鳴驚人,新人出道已經成為樂壇新人王,第一張唱片仲拎過白金銷量,實力有幾勁就不容懷疑!可惜因為病令工作停滯,使她第2張大碟延遲推出,講到咁明顯,你又估唔估到佢係邊個?
Jim Tse @Hair Corner
攝影:梁碧玲
剪接:許栢倫

今次演唱嘉賓由於要向難度挑戰,因此直接揀選了陳奕迅的《浮誇》。前財爺曾俊華聽完後直言:「我鍾意呢類型音樂!Live睇會好正!有Jazz的感覺,呢一類型音樂冇咁多框框!」不過他估演唱者是謝安琪。至於在意大利第二十二屆國際歌劇演唱家大賽奪特別獎的女高音劉卓昕認為:「咬字好清楚,好有中氣!我覺得佢好實在,一點都唔虛!」,連超唱得的Gin Lee都坦言呢位歌手,好適合唱音域闊的歌曲,究竟邊個嘉賓,獲得咁多好評?

呢位妹妹係一位「巨肺級」歌手,出道時已橫掃本地樂壇新人獎,你又估唔估到佢係邊個?(梁碧玲攝)
林欣彤今次挑戰高難度作品《浮誇》。

談到今次現場演繹《浮誇》,林欣彤要翻唱陳奕迅的歌曲也難掩緊張之情:「當我新歌《奇怪》推出後,有好多人聽完嘅反應係會諗起Eason嘅《浮誇》,所以我就諗,不如趁今次《我不怕唱歌》就唱一次我版本嘅《浮誇》啦,睇下大家又可唔可喚醒大家對《奇怪》嘅感覺。其實我準備呢首歌嘅時候都幾緊張,但既然今次呢個節目叫《我不怕唱歌》,不如就真係唱首難啲嘅挑戰一下自己。」Mag續說:「未入行之前同朋友唱k嘅時候,一向都鍾意唱高難度嘅歌,有時會變成人肉點唱機,朋友點歌要我。但入行後我就唔同咗,變咗鍾意聽人唱歌同埋食嘢,因為工作關係而日日唱歌,所以想喺k房做聽眾聽朋友唱歌。」

+8

Mag最近推出了全新歌曲《奇怪》,她表示這首歌是她的心聲:「依家有好多人鍾意評論,只要你有一件事畀人講,其他人就會加把口一齊去評論,而且依家社會唔單止係藝人,因為有不同社交平台嘅關係,任何人都可以成為公眾人物。只要你放一樣嘢上去,任何人都可以批評嘅時候,被評論嘅人又應該點樣去面對種種嘅批評呢?」

其實Mag自入行以來真的遇過不少批評,有人批評她的外型,更有人說她曾整容,面對成名後各種批評,Mag轉以笑看人生的態度:「我相信每一個人唔多唔少都會在意其他人點睇你,由我以前未入行參加比賽時開始,我已經好在意人哋對我嘅睇法,到我參加《超級巨星2》多咗關注,自然畀人講,我初初係好唔開心,但久而久之我改變自己諗法,睇嘢樂觀咗。」Mag續說:「好似啲人成日話我好耐無見,唔同咗樣,咁我會諗通常俾人話整容嘅人都係靚咗,所以我唔會唔開心,我會當係一種稱讚,而唔會自己鑽牛角尖。」

思想正面的林欣彤,對於被指整容視為一種讚美。(梁碧玲攝)

林欣彤由上年開始成為王祖藍旗下藝人,Mag透露簽約畀祖藍,是因為祖藍明白藝人的需求及感受:「依個老闆除咗本身係藝人,係娛樂圈有多年經驗,又鍾意音樂,出過唱片,我會覺得呢個老闆會明白我嘅諗法。而以前嘅公司(英皇)就算係藝人管理部門,或者再上一啲嘅高層,佢哋本身唔係歌手,所以未必會咁明白我,我覺得簽公司最緊要係大家明白大家。」

林欣彤覺得簽經理人合約,最緊要是公司是否真的能明白歌手自身需求為大前題。(梁碧玲攝)

林欣彤當初出道時,在音樂上成績非常好,挾住《超級巨聲2》總冠軍身分簽約英皇娛樂,並於推出其首張個人唱片《Vocalist》,而且首張唱片更達到白金銷量,Mag及後更橫掃2011年度香港各大頒獎禮的新人獎,而且成為2011年度IFPI香港唱片銷量大獎「十大銷量廣東唱片」、「十大銷量本地歌手-林欣彤」及「最暢銷本地女新人」,當時被外界寄予厚望的她,之後不幸聲帶出現問題,又患上厭食症同抑鬱症,令工作停滯,遭遇猶如一名運動員受傷患影響職業生涯。問到Mag有否認為簽約王祖藍是希望迎接第二次高峰期,她表示:「我唔會諗係唔係高峰期或黃金期,我會覺得有啲嘢要發生你都阻止唔到,我簽約祖藍旗下唔會要求話一定要爆紅,我只係想做到我想做嘅音樂,我相信老闆會尊重我嘅音樂,同埋會support我將來嘅工作。簽入呢間公司我會感覺到大家坐喺同一條船,會係捉緊眼前每一個機會,而以前公司嘅工作模式會比較公式化。」