【我不怕唱歌】港女高材生唱功威盡亞洲 林二汶驚訝:啲力好直接

撰文:
最後更新日期:

林二汶:唱歌唔同咗喎!啲力好直接,我覺得佢真係唱得幾好!

劉美君:都唔係好差,不過太conscious,變咗抒發感情嗰到就去唔到,因為太用個頭唱歌,think too much。

兩位實力派歌手前輩對呢位「高學歷港女」嘅評價一褒一貶,唔知你又點睇?

攝影:梁碧玲 黃浩晉

剪接:許柏倫 黃浩晉

今集《我不怕唱歌》為大家帶來一位女歌手,13年金牌經理人Paco黃柏高聽佢唱兩句就話要簽佢,淨係講呢個故仔就知佢係實力派啦!呢位歌手,當年參加《亞洲流行音樂節》奪得「Wechat人氣大獎」及「超級新星大獎」,是第一位代表香港勝出比賽的歌手,都咪話唔厲害。呢個音樂節,就連紅爆內地的陳偉霆,都贏唔倒!可想而知呢位歌手,實力非凡,難怪Paco曾大讚她是王菲接班人。

一頭短髮、眼大大、打扮斯文,咁多提示相信大家都估到係邊個啦!

畀個背面輪廓大家睇睇先,應該好易認啦!

正式加入樂壇前,佢讀大學時喺父母極力反對下依然幫監製藝琛唱Demo,又瘋狂夾Band出Show,為唱功及演場演出打下根基,難怪當時Paco聽咗佢唱兩句就話要簽佢做大陽娛樂旗下歌手啦。

J.Aire除咗唱得,仲識得彈結他、鋼琴,真係音樂才女。

13年出道,主打歌《第一志願》「天空會給我意志/驚險也必要嘗一次/趁這青春 要擁抱 心儀的事」相信呢幾句大家唔記得晒成首歌都會有些許印象。出道第一年成績唔錯,推出首張專輯《Soliloquy》。除咗《第一志願》,《我就是主角》、《大個》等等歌曲講述自己堅持做音樂嘅原因,以及向父母訴說自己嘅心聲,相信同樣面對困難依然在追夢嘅聽眾都會有共鳴。

J.Arie父母反對佢唱歌並唔係單純覺得做歌手收入唔穩定,覺得讀港大法律系畢業走去做歌手太大落差等等。J.Arie如今重提呢件事嘅時候,都明白父母其實係想保護自己。佢話:「都明白嘅,佢哋係想保護我,因為我生出嚟扁桃線有兩個瘤喺入面,好容易感染。人哋可能食兩包薯片冇事,但我食兩塊就會喉嚨痛,所以我細個我父母唔畀我玩Choir(合唱團),又唔畀我朗誦,就係唔想我用把聲,我都明嘅。」

J.Arie又講到:「但係依家最諷刺就係我用把聲嚟搵食囉!」雖然天生有小障礙,但仍然無阻J.Arie,正如歌詞「驚險也必要嘗一次」。J.Arie唔單止做歌手,而且近來有不少幕前演出機會,例如《今晚打喪屍》中飾演「撳釘華」個老師,之後仲要化埋喪屍妝面目全非,唔係佢喺facebook講想信好少觀眾會認到係佢。

雖然父母極力反對,但係J.Arie仍然堅持,現時回望最初都明白父母的顧慮。

今次《我不怕唱歌》節目邀請到樂隊Hey Joe Trio及鍵琴手阿一為J.Arie現場伴奏,令J.Arie拾回入行前夾band出騷嘅感覺。其實J.Arie現時演出都希望有live band傍住:「梗係正啦!我都好想有live band傍住我,我自己最鍾意嘅表演方式咪就係bruno mars做緊嗰隻囉!但係依家因為錢嘅問題,令到未必每一次都做到呢件事,但係我好想囉!如果我開騷一定會擺隊band好近好近我,甚至我會嗌隊band出嚟同我跳舞。我覺得俾隊band包圍住個感覺好安全,好舒服,一齊玩咁!」

今次有Live Band傍住,J.Arie覺得好安心,而且好想之後演出都同樂隊合作。

入行前J.Arie曾加入樂隊Matchbox,而曲風色彩比較灰暗,J.Arie笑謂:「寫嗰個人長期都好灰冇計㗎喎!」可惜Matchbox於月前解散,對於曾加入的樂隊解散,J.Arie慨嘆:「好唏噓,大家都好唏噓。」她續道:「唉,有好多時呢啲嘢,雖然大家音樂嘅理念係一樣,但好多時最終大家可唔可以走埋一齊,係人嘅問題囉!你見好多時呢一行,邊個同邊個唔啱,好煩㗎呢啲嘢!有時去到合作去做一件事出嚟,已經唔係講緊你能力有幾高,你叻唔叻,你彈樂器有幾好,已經唔係呢啲囉。係個人嘅性格嘅問題,可能幾個好衰性格嘅人一齊,咁夾到咪夾到囉,磨合唔到咪……散囉!」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。