【多圖】G.E.M.紅館尾場似睇《我是歌手》 海豚音吹風機乜都出齊
G.E.M.鄧紫棋連續三晚《Queen of Hearts世界巡迴演唱會》昨晚於紅館舉行尾場，G.E.M.來到尾場傾盡全力。特意唱連串廣東話Medley照顧香港fans，而且第一場送花的癡情男fans再次現身台下送花，兼夾送戒指。
G.E.M.再次面對狂迷求婚，有點失措話：「點呀？想第二次求婚呀？唔係啩，我依家標晒冷汗呀……」男fans奪咪說：「我重申一次，15號嗰晚我送嗰紮玫瑰同埋條裙唔係送畀鄧紫棋，唔係送畀阿G.E.M.，係送畀我心愛嘅鄧詩穎（G.E.M.原名）！」男fans又話：「送畀嗰個坦誠、率真，有一啲倔強……唔鍾意俾人強逼去著佢唔鍾意嘅衫……」
面對狂迷「突襲」，現場傳來陣陣鼓譟聲，G.E.M.在台上繼續不知所措：「我想問咩環境先，點解我有少少聽到想喊嘅？哈哈……」及後男fans多次想奪咪，不過全場觀眾都高舉熒光棒畀「X」反對，整個演唱會頓時癱瘓了一樣，G.E.M.打圓場說：「既然我哋去到呢個地步呢……我真心祝福你會搵到一個你好愛嘅女仔，我希望你好好保管呢隻戒指搵到佢真正嘅主人。我真係唔識拒絕人嘅……不如你聽我去唱埋啲歌吖……」整個過程擾攘近15分鐘，在觀眾一片鼓譟聲之下男fans垂下頭返回座位，演唱會才回復正常。
不過除了狂迷突襲求婚外，也有溫馨畫面，王君馨與老公以及數對情侶在鏡頭前錫錫，G.E.M.打趣道：「你哋想做乜都得㗎！仲抵過時代廣場嗰啲『我愛你』廣告㗎！」
另外，G.E.M.一如前兩晚都有唱在《我是歌手》的翻唱作品，如《存在》、《你把我灌醉》等等，舞台前同樣設有風機，每次G.E.M.走到風機位置飆高音，頭髮揚張大口的神情就如參賽時一樣，而觀眾亦相當投入不斷送上歡呼聲與拍掌聲，彷彿置身《我是歌手》錄製現場一樣，分別在於觀眾是相對真心支持以及需要掏腰包購票入場。
G.E.M.趁着尾場多次說感言，fans則在這空檔高呼「我愛你」，G.E.M.則以：「我都愛香港呀！」為了表達對香港的愛意，她翻唱《約定》、《來讓我跟你走》、《每天愛你多一些》、《有心人》等金曲，到最後encore環節唱出《All About You》、《Where Did You Go》、《喜歡你》，最後以《睡公主》一曲作結，演唱會準時在晚上11時30完結。