【獨自音樂】衛詩受鄭秀文鼓勵 捱過困難時間:Sammi真係天使

撰文:
最後更新日期:

在我們的成長路上很多時候都是從錯誤中學習。有些人會因犯錯而覺得自己沒有價值,選擇放棄自己,逃避現實,不敢面對自己的過去,更怕面對的是別人的目光。曾經因此而走進人生低谷的歌手Jill衛詩,面對逆境時曾想過放棄,幸得兒時偶像在此時伸出援手,令她人生步向正軌。在今集的《獨自音樂》,Jill唱出《Hero》及新歌《缺氧》,並希望以自己的故事把迷失的人帶出低谷。

攝影:江智騫

髮型:Jamie Lee @HAIR

化妝:Marsha @江中平化妝室

服裝:5cm

「我由10歲開始就住喺紅磡,所以我有好多童年回憶。紅磡係一個有好多老字號餐廳嘅地區,街坊好有人情味,每次去食嘢或者經過,餐廳嘅老闆都會好熱情。而且呢度可以話係我第一次接觸音樂的地方。我19歲開始就會同家姐(Janice衛蘭)跟著爸爸去lounge(酒吧)唱歌。除咗唱歌之外,我哋又會一邊聽一邊學不同類型的歌曲,如Jazz R&B Pop 甚至較少接觸嘅廣東歌及國語歌。我哋細細個已經好多嘢一齊做,落街食飯、一齊唱歌;最好笑係因為大家都唔識中文但係又要唱廣東歌,所以我哋會一齊寫英文拼音唱廣東歌,但係身邊又無人識中文,所以唱錯大家都唔知。」衛詩憶道。

衛詩自小在紅磡長大,街坊的熱情令她記憶猶新。(攝影:江智騫)

歌手衛詩(Jill)於2006年出道,較孿生家姐Janice遲出道兩年的她,雖然初初成為歌手時與Janice曲風不一樣,但因為兩位是孿生姊妹及聲線相似的關係而被人作比較,也曾傳出她們的關係欠佳:「其實由細個開始已經好多人將我哋比較。你問我哋有無互相比較,我諗會有,不過唔係惡意競爭。讀書時期我哋成日compare(比較)大家成績,睇下邊個畫畫叻啲,邊個數學叻啲。結果家姐叻啲,不過其他科我會好過佢,其實我哋習慣被人比較。」Jill笑言。

Jill與Janice是孿生姊妹,因為她們外貌及聲線相似而常常被人作比較。(攝影:江智騫)

Jill續說:「到我出道嘅時候,大家都會繼續將我哋互相比較,之後好多新聞傳我哋不和,如果我話無影響係呃你,而我自己曾經都有喺內心入面同家姐鬥。雖然我有同家姐講我有唔開心,但我唔會好直接講『I am jealous with you!』不過呢啲都係初入行嘅事,依家我哋都變咗好多,成熟咗好多。大家有得唱歌,可以將自小鍾意做嘅嘢成為職業,我覺得好幸福,我會好好珍惜。依家同家姐同一間唱片公司,我想將我嘅工作take it seriously。」

Jill表示當年她在低谷時,天后鄭秀文幫了她很多。(攝影:江智騫)

Jill在日本回港後雖曾想放棄,不過經過家人及朋友支持下令她重新振作。(攝影:江智騫)

在Jill的心目中,放棄這念頭的確曾出現在她的腦海中,不過只是短暫,她慶幸身邊有不離不棄的家人及朋友令她知道汲取教訓後,只要有決心,人生依然是充滿希望:「啲人會話Jill以前做過啲嘢唔係幾好,我會同佢哋講呢個都係以前嘅我。我好感恩再有唱歌嘅機會。我曾經係有過一段好困難嘅時間,我有諗過放棄。但係我好感恩身邊出現好多天使去鼓勵我,關心我,其中一位天使就係Sammi鄭秀文。2007年Sammi開《Show Mi》演唱會嘅時候邀請我做嘉賓,自此我哋就一直都有聯絡。跟住我經過『日本一事』翻到香港佢就即刻打俾我,關心我,同我傳福音。有一日Sammi就話去探佢自己嘅家姐,因為當時Sammi嘅家姐就住我樓上,佢話想見我。之後佢就上咗嚟我屋企探我,送咗好多書俾我睇,其中一本就係聖經。」

「我一開門見到Sammi嗰一刻我無好驚好尷尬,我係好開心。估唔到我兒時偶像真係會嚟搵我。喺我日本返嚟之後好多身邊嘅朋友對我唔同哂,我會好明顯知道邊啲人真係關心,邊啲人唔關心你。唔計屋企人,Sammi真係第一個關心我嘅朋友。所以我真係respect(尊敬)Sammi,我唔開心嘅時候佢會鼓勵我,佢教我積極面對將來。佢會text我『Jill你點呀,你有無事呀,I am thinking about you。』佢真係一位天使。依家我可以重新開始做歌手,除咗要多謝佢之外,我想借呢個機會話畀人知,我以前發生過嘅事已經成為我嘅『見証』。我覺得呢個故事可以幫助迷失嘅人。跌低過嘅人係可以企起身,前路係有希望。你唔需要去逃避,唔需要放棄,只要你有勇氣,你係可以改變你嘅fate(命運)。」

Jill翻唱Mariah Carey的《Hero》及新歌《缺氧》。(攝影:江智騫)

Jill深信音樂像她身體的一部分,音樂令她的人生充滿力量及激情,音樂除了可以抒發情感之外,也可以給人一種積極的態度。也是因為這個原因,所以Jill特意在《獨自音樂》中翻唱出Mariah Carey的《Hero》。

「只要你克服挫折,唔好放棄,其實你已經係一個Hero(英雄)!」Jill說。

《缺氧》曲:徐繼宗/詞:陳詠謙/編:T-Ma/監:陳考威
Jill新歌《缺氧》,是首形容男女在情到濃時眼神交會的瞬間的作品。那種感覺可以似是觸電、可以像時間停頓、也可以讓你呼吸困難如缺氧般。雖然《缺氧》原本是首愛意極濃之作,但今次在結他手Hilson的木結他伴奏下令這種《缺氧》之感在寂寞的晚上變得不一樣,。
+11
+10
+9


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。