吳浩康演唱會感動痛哭攬實老闆楊受成 Deep:多謝你老闆!

撰文:彭嘉彬
出版:更新:

昨夜吳浩康《Listen To Deep》演唱會順利在九展完成頭場演出。整個演唱會比起單純的集體回憶,阿Deep更帶給樂迷各種類型的音樂,除了經典抒情作品,阿Deep更聯同合作多年的樂隊Closer成員一起演奏搖滾作品,阿Deep笑言:「我呢隊樂隊好得意㗎,好似藝術家咁。組成咗Closer咁多年,去到變Closing解散咗先開始有人去聽我哋啲歌。近年去到一啲喜慶場合例如有人結婚我哋先出返嚟,今日我可以喺呢度開演唱會,都算係一件喜慶事,所以呢班兄弟一齊出嚟撐我。同大家介紹,我哋係Closer!」一連串搖滾作品《Closer》、《明白》、《上車》,重新認識阿Deep慢歌以外的另一面。

全晚演唱會又點會咁單調淨係唱慢歌,阿Deep邀請埋自己嘅樂隊Closer成員一齊Jam歌。 (梁碧玲攝)
+2

熱血搖滾後,氣氛一轉,阿Deep在芭蕾舞蹈員伴舞下,演出一Part較具視覺享受的《公元前medley》,除了唱歌外,阿Deep亦即場坐在鋼琴前演奏一番。唱完《醒覺》後,阿Deep突然深情地說:「喺呢度要多謝一個人,呢十幾年嚟佢都好似一個爸爸咁照顧我,甚至我呃過佢佢都無放棄我,今晚佢都有嚟,不過佢比較低調,所以我就唔講佢係邊個啦,送一首歌比佢,《給愛惜的人》。」講到眼濕濕的阿Deep雖然沒指名道姓,不過大家也估計他說的,就是坐在台下的老闆楊受成博士。

呢一Part《公元前medley》,都算係全晚最有視覺享受! (梁碧玲攝)

如果是阿Deep的忠實樂迷,應該不止期望他只是帶來大熱作品,所以他也相當識做,以medley形式唱出一系列Side Track包括《傻》、《我可以》、《放過自己》、《又過聖誕》。

不過難得阿Deep開騷,又點會得自己一個唱晒成場咁Dry。阿Deep落力邊跳邊唱《新手》之際,師姐Yumiko已從台下升上來,唱出為人熟悉的《相對濕度》,更與阿Deep crossover了快歌medley,不少90及千禧年代的歌曲在此重現,《活著viva》、《戒男》、《煞科》、《第五個現代化》、《點夠喉》、《大熱》、《越夜越有機》、《失憶周末》、《眼睛想旅行》,舞蹈編排誠意十足。

Yumiko驚喜現身,仲唱咗大家好耐無聽過嘅《相對濕度》! (梁碧玲攝)
除咗Yumiko之外,連蔣雅文同梁浸浸都有到場,兩個都好Cute Cute!

不知不覺,原來阿Deep在Facebook上的直播節目《Deep Nite Show》已經剛好一週年。阿Deep亦特意邀請了好拍檔陳思捷在台上重現《Deep Nite Show》的現場版作為紀念。唱著唱著,阿Deep不禁泛起淚光, 講起自己的三家姐:「我要多謝我三家姐,其實佢之前已經嫁咗去法國,不過佢今日特登返嚟睇我。一個歌手屋企唔需要多一個歌手,不過好需要有一個觀眾,喺無人聽我唱歌嘅時候,佢做我第一個觀眾。」

《Deep Nite Show》一週年,阿Deep更特意邀請好拍檔陳思捷上台Jam歌。 (梁碧玲攝)
+2

《Deep Nite Show》的部份以一曲《演唱會》送給女友李昭南作結:「每個星期一開Live我都會好燥,呢條線又有問題,唔知邊舊嘢又有事。而Michelle就陪住我東奔西跑,我哋唔知我哋可以做到咩,不過佢就係咁樣陪住我。所以我要正正式式咁多謝佢。」

及後阿Deep環繞全場逐一向現場觀眾,同時唱出《38廿四》。走到老闆楊受成身旁時,阿Deep突然哽咽與老闆擁抱良久,引起全場歡呼。他更答謝父親:「我成日都話,如果我係你,生咗個我咁嘅仔真係唔知點算㗎。但係多謝你呢三十四年以嚟,每晚瞓唔著都無放棄過我。」並唱出《吻彌留的你》及《孻仔》答謝家人。

阿Deep環繞全場逐一答謝觀眾,走到老闆楊受成坐位前,更與他擁抱良久。 (梁碧玲攝)

Encore環節前,阿Deep再次回到台上,他再次眼濕濕道:「真係再低調都要講,大家都話Mani好錫我,對我好用心。其實唔止Mani,我老闆(楊受成) 都一樣。佢對我一直都對我充滿信任同支持,可能我曾經令佢好激心好失望,但佢對我嘅支持同愛,我喺唔同嘅同事口裡已經知道。同事成日都會走嚟同我講『喂老闆真係好錫你!老闆又問起你啦!』我知道!多謝你老闆!」及後唱出《先入為主》,為整晚演唱會作結。