【專訪】Hotcha十周年重聚爆辛酸 嘔住拍《不要防曬》MV你知唔知

撰文:
最後更新日期:

由黎美言(Winkie)、張紋嘉(Crystal)、張惠雅(Regen)組成的HotCha,將於今年6月舉行《HotCha Are You My Friend十周年慈善演唱會》。為了考驗她們過去十年的友誼,她們接受了《香港01》為她們而設的出賣姊妹遊戲「Are You My Bad Friend」,結果發現她們之中最愛開黃腔竟然是…詳情睇片!

攝影:陳順禎

黎美言

服裝:Needful Things

張紋嘉

服裝:Bread n Butter

髮型:Haysses Ip @HAiR

今年已成軍超過十年的跳唱女子組合HotCha,她們雖然在事業上分途發展,為了紀念她們的友誼十周年,她們將於今年6月3日舉行《HotCha Are You My Friend十周年慈善演唱會》。 「不經不覺我哋出道嚟緊第11年,我哋睇住唔少歌迷長大。有一啲歌迷由個樣好細個,到依家變哂樣,變埋聲,生埋小朋友。每次見到佢哋都有好多珍貴回憶,所以今次合體開騷好大原因係為咗歌迷而開,希望佢哋可以透過今次嘅機會重拾大家嘅回憶。」HotCha說。

HotCha將於今年6月合體開騷。(攝影:陳順禎)

Winkie認為從前的HotCha做事被動。(攝影:陳順禎)

Winkie憶述:「以前我哋好被動,咩都要經理人打點。工作上都冇太大主見,只要公司吩咐我哋都會跟住做。十年後嘅我哋真係長大咗好多,我哋工作上大家都識主動互相掙取機會,不過呢個團隊嘅默契仍然不變,大家嘅關係依然好close(親密)。」

Crystal表示十年後的大家依然有不少蝦碌事情發生。(攝影:陳順禎)

Crystal則認為大家的傻傻的性格依然不變:「大家感覺真係冇變,十年前嘅我哋喺工作嘅時候會有唔少蝦碌嘢,十年後嘅大家相處時依然笑料百出。」

Regen認為現在的HotCha在工作上容易有共識。(攝影:陳順禎)

Regen認為HotCha在工作態度上成熟不少,「我諗大家真係成熟咗,做事爽快咗。好似做新歌《Are You Still My Best Friend》或其他決定,大家都好快有共識。以前我哋三個唔會有共識,一般會答『唔知呀』、『都係畀公司決定』。而家大家各自各發展,有好多嘢都進步咗。」此時,十年如一日的Regen突然說出了一金句:「總之『行前一步就係進步!』」Regen說罷後,坐在她身旁的Winkie及Crystal對於這句可有可無的說話無言以對,三個你眼望我眼然後一同大笑。相信熟悉HotCha的歌迷也會明白這就是Regen在說話上的另類可愛。

+2

HotCha出道至今推出了7張專輯,跳舞歌曲多不勝數,當中最令她們有回憶的歌曲原來是2007年出道時的第二主打歌《不要防曬》。Crystal表示:「我睇返好多以前啲影片,原來呢首歌當年有好多年輕人跳cover dance。真係估唔到呢首歌會咁受人歡迎。」Winkie則謂:「《不要防曬》除咗係我哋入行嘅第一首冠軍歌,我記以前好多歌迷會打趣問我哋『HotCha係唔係唔駛用防曬』,所以以首歌歌名真係改得幾好,因為好多人因為「《不要防曬》而記得我哋。」

Regen笑言拍《不要防曬》帶給她一個噩夢:「我一世人最辛苦嘅一日就係拍《不要防曬》嘅MV。當年我哋去到馬來西亞拍攝每日工作20幾個鐘,瞓覺時間只有幾個鐘。其他時間要影寫真,最後一日行程就要拍MV。拍MV當日我發燒加腸胃炎,全晚冇瞓過。當日我邊拍邊嘔,最後MV拍咗20幾個鐘,拍完我先可以去當地急症室。所以我每次睇《不要防曬》MV見到自己喺入面笑得好開心,其實我當時係勁痛苦。」

提到今次十周年演唱會,由上年已經在網上瘋傳,但只屬聞樓梯響,她們解釋一切都是錢作怪,「其實十周年演唱會的確講咗好耐,一直未有機會落實原因係『萬惡金錢』。因為原來要落手落腳去籌組,搵人投資真係唔容易,所以我哋一直都唔敢公開講。今次我哋三個,仲有我哋初初嘅經理人Joey真係付出好多。好幸運,最後有好多單位願意落實與我哋合作,我哋終於鬆一口氣。」Crystal謂。

Winkie:「其實HotCha久而久之已經變成一個品牌,行內好多人都好錫我哋,好多行內人知道我哋開騷,已經馬上要留飛入場支持,又會不停問我哋駛唔駛幫手宣傳。雖然成軍十年,大家依然當我哋係小妹妹看待,所以我哋真係好幸福。」

HotCha出道至今推出了7張專輯,跳舞歌曲多不勝數,當中最令她們有回憶的歌曲原來是2007年出道時的第二主打歌《不要防曬》。(攝影:陳順禎)

至於談受排練方面,Regen表示:「記歌詞會好麻煩,真係好多歌太耐冇唱。同埋都要記邊一句係邊一個成員唱。」

Winkie則對跳舞方面大感頭痛,她表示:「跳舞方面,我哋以往嘅跳舞歌喺music break部分都加入好多舞步,而且仲要非常頻密。回望以前會覺得公司訓練到我哋三個有一份毅力,可以一邊著高跟鞋,一邊跳舞唱歌,仲要背歌詞,真係一啲都唔容易。以前練舞嘅時候,邊一個成員甩一個拍子,公司都會要求整受歌重新開始。」

相反,成員Crystal則認為要重拾舞步問題不大:「要記邊一句係邊一個成員唱會比較花功夫,反而舞步上我就已經『入哂骨』,因為以前我哋成日都一日走幾場活動,而且仲要跳同一隻舞,同一首歌,而呢種生活會維持一個月,當你日日不停唱時,相信只要再練並唔算太難。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。