【專訪】王菀之細個坐飛機想遇閃電 多數靈感竟然嚟自火車車廂?

撰文:
最後更新日期:

看到王菀之(Ivana)這個名字,「音樂」是第一個聯想到的關鍵字,緊隨其後是「旅行」。熟悉Ivana的讀者都知道,旅遊是她重要的靈感來源。正因如此,Ivana將於月尾舉行《下北沢的北極光》音樂會,與其說是音樂會,形容為有歌聽、有片睇的遊記應該更貼切。

攝影:梁碧玲

旅行精竟患上「害怕飛翔症候群」?

愛旅遊的人竟患上「害怕飛翔症候群」,雖然有點諷刺,但這正正發生在Ivana身上,她亦嘆冇辦法:「我諗呢個真係冇辦法,要從心理學嘅角度去醫。」

雖然這症候群未至於令Ivana從此不再出遠門,但那種心理壓力的確有點困擾。令她由期待一趟長途機,變成害怕坐飛機:「以前我係會期待一程長途機,期待佢衝入去一啲好奇妙嘅天空現象,但近呢幾年害怕咗搭飛機。」

而對「害怕飛翔症候群」,Ivana都話:「我諗呢個真係冇辦法,要從心理學嘅角度去醫。」(梁碧玲攝)

還有一連串徵狀:「我會瞓唔着,搭飛機頭幾個鐘一定會肚痾,咩都唔想食,成隻手都係汗;有時呼吸會好快添㗎,個節奏亂晒籠,好似好大啖氣吸落去都冇氣咁!」甚至連幾個月後才出發的行程都令她大感緊張。

Ivana表示,甚至連幾個月後才出發的行程都令她大感緊張。(梁碧玲攝)

細個坐飛機期待遇閃電!?

Ivana對閃電情有獨鍾,所以才會寫《閃電雲》一書,原來她喜愛的程度是希望坐飛機時遇上?她笑說:「細個嘅時候,每次上機都好祈求遇到閃電行雷,咁架飛機咪可以衝入去囉!同埋係好奇妙㗎嘛,有時唔係一『條』閃電,係一堆閃電,好近距離咁睇!」她續說:「細個好鍾意天文現象,所以對呢啲充滿幻想嘅現象係好興奮嘅!不過……大個睇得新聞多,開始驚咗,哈哈!」

Ivana透露,小時坐飛機希望遇到閃電,因為可以欣賞不同天文現象,但她現在說:「不過……大個睇得新聞多,開始驚咗,哈哈!」(梁碧玲攝)

就算冇黑膠唱機,都要買Bjork嘅黑膠碟,就知Ivana係忠實fans啦!(梁碧玲攝)

化身小fans遠赴羅馬睇Bjork 
等足兩個半鐘竟撲空?

雖然有「害怕飛翔症候群」,但一講起旅遊經歷,Ivana立即化身開籠雀。由各地特色小店、食肆、藝術節、音樂會,天南地北應有盡有。不過印象最深刻的經歷,要數到今年6月遠赴羅馬浴場欣賞Bjork音樂會「食白果」。

為近距離見偶像Bjork一面,Ivana跟大家一樣化身小fans,早半年book定酒店機票,買最貴、最近舞台的門票。Ivana開騷當日提早一個多小時到現場,還悉心打扮,還「瘋狂」拍照,她形容當時猶如置身《魔戒》之中:「你諗下,Bjork、古蹟、開演唱會喎!呢單嘢唔可以錯過!四圍又有啲雀飛過、城堡咁嘅feel,又有啲大石柱圍住你!」

相信大家從文字也能感受到Ivana雀躍的心情,豈料天公不造美,因為天雨關係,原定晚上9時開騷,延至9時半才sound check。Ivana還記得當時的心情:「就係係啲工作人員出嚟sound check,揭開啲布試器材嗰陣,我都即刻尖叫!點知後尾啲雨越落越大,全場啲人都『Oh no!』……」

雖然遠赴羅馬睇Bjork撲空,但Ivana將呢段經歷變成新歌靈感。(梁碧玲攝)

由於羅馬浴場位置戶外又空曠,加上雨勢加劇,即使大會祈求停雨也無補於事,甚至開始打雷,到晚上10時半大會宣佈決定演出取消。Bjork踏上舞台向觀眾道別,希望大家能平安離去。有時只能說句天意弄人,雖然Ivana買了最近舞台的門票,理應與Bjork只是兩步之遙,但她卻在舞台的另一邊出現。Ivana說:「唔抵嘅就係,但係Bjork喺老遠另一邊出嚟,點解唔係我呢邊出嚟呀!我影佢嘅時候,係先影到200部手機再影到佢。」

Ivana拍下當時Bjork與樂迷道別的一刻。

雖然這段經歷聽起來有點可惜,但幸好老公Eric So一直陪伴在旁,所以也是一個甜蜜的體驗,還化為Ivana的創作靈感,她形容:「首歌個感覺好似一套電影,風起雲湧,個氣場好似《天堂有路》嗰種歌;仲會有好多Strings(弦樂器)營造好有張力嘅感覺!」

創作靈感源源不盡 來自各地火車車廂?

身為唱作人,如何令自己保持有靈感,每人都有一套「獨門秘技」,而Ivana方法就是到各地坐火車,很多寫得深層的歌詞,都是從車廂中得靈感。Ivana說:「係嗰種有少少舊嘅火車站同車廂,本身已經有好多人坐過個位,而佢載過好多人,去過好多目的地;加上坐過嘅人又有各自嘅故事,本身已經好似好有歷史嘅地方。」

她續說:「而喺嗰程車,你佔據咗嗰個空間,你又有好多思考發生;由於你眼前嘅風景不斷咁郁,不斷咁過去,我覺得比起望住一啲靜止事物,更加俾到衝擊我。」

點都估唔到,原來火車車廂帶俾Ivana咁多靈感。(梁碧玲攝)

以上的經歷只是Ivana遊歷各地的一少部份,想了解她更多不同的面向,樂迷記得要留意有得聽、有得睇的遊記——《下北沢的北極光》音樂會。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。