黎明X麥浚龍X黃偉文X雷頌德 親解《忘記和記》是如何煉成的

撰文:
最後更新日期:

一首《忘記和記》,成為本地樂壇近來的一顆核彈,黎明與麥浚龍的合唱,大概沒多少人會想像到,畢竟多年來黎明的合唱歌實在少之又少,就連身為他多年好友的雷頌德也表示:「咁耐以嚟,都試過有其他歌手搵佢合唱,但Leon全部都推晒,可能佢唔鍾意合唱啦。所以今次Juno最初同我講想搵Leon合唱,我心裡面都覺得唔會成功。」怎料黎明卻一口答應麥浚龍,令雷頌德喜出望外。

近日麥浚龍與黎明推出合唱歌《忘記和記》,更找來黎明、黃偉文、雷頌德一起解釋今次作品背後的故事。 (影片擷圖)

為著《忘記和記》這首作品推出,Juno亦特意拍攝短片,讓創作人們分享到底這首難得的合唱作品是如何煉成。歌曲由雷頌德作曲編曲,黃偉文填詞,黎明及麥浚龍合唱,Juno表示:「第一次同阿Mark(雷頌德) 通電話講呢首歌,我個人都仲喺斯德哥爾摩,為咗切合故事需要,我決定要做一首仿廣告歌嘅作品,而阿Mark畀我嘅Demo好準確。聽到Demo嘅4分20秒,令我諗起一個人,嗰個部份我腦海出現咗Leon把聲,於是我將個Demo寄咗畀Leon,佢話12個鐘內覆我。」

Juno表示,今次會找來Leon合唱,是因為收到Demo時,播到4分20秒腦海就出現了Leon的聲音。 (影片擷圖)

今次《忘記和記》仿古味濃,其實過去Juno的MV中亦有不少復古細節
+7
+6
+5

至於黎明首度收到麥浚龍的邀請,到底這位天王又是如何看待這個人?Leon道:「佢好有獨特性創意,我相信會有啲未發生過嘅嘢發生。喺大家嘅音樂工作過程裡面,大家處於同一社區同一空間,有時穿插喺對方嘅世界裡面都係一種學習。寫嘅人我又識,填詞嘅人我又識,反而邀請我嘅人我係認識最少,不過佢過往嘅作品我都聽過,佢唔只係一個歌手,佢係一個創作人。」

而黎明對麥浚龍這位後輩的評價亦讚不絕口。 (影片擷圖)

對於《忘記和記》這個名字,深信不少樂迷也暗暗讚歎詞人的創意與功力,可以解讀成「忘記、和記」,又可解讀成「忘記、和、記」,Wyman黃偉文解釋歌名來源:「呢個歌我玩嘅文字遊戲,要做到兩個目標。第一,將產品巧妙地嵌入題材裡面,另一樣就要配合返系列入面嘅主人翁嘅故事線。好快我就諗到《忘記和記》,當諗到呢個主題之後,就好容易發揮。」

不得不讚歎Wyman的功力之深,歌名《忘記和記》已完美帶出整個主題。 (影片擷圖)

有人或許會覺得,這樣的跨公司創作,或多或少會有著不同制肘,過程絕不輕鬆,Juno解釋:「其實製作《忘記和記》嘅時候好順利,我覺得市場需要孕育多一種唔同類型嘅創作。那怕我哋係跨公司、跨世代,我覺得都係一種緣分,邀請Leon合作嘅未知之數好大,不過佢配合度好高,投放好多信心畀製作單位。」

不過正如雷頌德所言,黎明向來的合唱歌並不多,出道以來只得10首以內,甚至Mark Lui本人曾為不少歌手邀請Leon合唱亦遭拒絕:「我同Leon嘅諗法有少少唔同,所以我極少同Leon做合唱歌。當Juno最初同我講想搵Leon,其實我都有啲驚,因為呢件事真係好難做到,所以我就叫Juno試下自己搵Leon溝通一下。」

雷頌德解釋,最初對Juno找黎明合作並不抱有信心。 (影片擷圖)

那麼到底當初黎明是怎樣答應Juno的邀約?Leon補充:「好難用一句說話去描繪,點解我會唱一首咁嘅歌?其實只係一種直覺,我最初回答Juno,你畀我聽三次,三次之後我覺得好嘅,接受到,就做啦。所以最後12小時之內就決定要做。」Mark Lui又再補充:「諗返起,其實佢哋可能有啲地方好相同。例如合唱係咪一定要一人一句呢?Juno今次搵Leon合唱正正就係想佢淨係唱最後一段副歌,而Leon成日都話,點解合唱歌一定要對唱,一定要一人一句呢?點解唔可以一人一半呢?或者就係佢哋呢啲共通點促成今次合作。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。