年尾大型演唱會近全數取消 部份從業員分分鐘連一蚊都攞唔到?

撰文:
最後更新日期:

由於社會狀況不明朗,年尾不少大型演唱會在早前也紛紛宣布要取消及延期。早前演出業協會指出,六月以來,已有超過六十場次的演唱會押後或取消,過萬個從業員受影響。不過到底實際情況是怎樣,演唱會從業員又因應各類崗位有著怎樣不同的待遇?「01眾樂迷」電話訪問了在今次風波中同樣受影響的演唱會從業員Samantha (化名) 。

陳奕迅有「感染王」的稱號,聽他現場演繹更勝CD版本。 (資料圖片)

一次過睇晒最近受影響的演出
+26
+26
+26

對於今次一連幾個演出皆被取消,Samantha表示對從業員的影響是無容置疑:「對於全職嘅從業員嚟講其實就唔大問題,不過我哋呢行有好多人都係freelance,收入係逐場計錢,以25場嘅陳奕迅為例,開足25場從業員就當然賺到25場嘅錢,但而家取消咗,又或者假設開到一半唔開,我哋就收唔足錢。不過近日有好多演出喺未開騷前已經取消咗,好多時個做法係從業員可以同主辦方傾一傾,到底可以有幾多工資,可能係一半,可能係三分一,每間公司嘅做法都唔同。」

演出取消,其實主辦方也需要承擔大量的成本費用,可說是必定虧損,沒有足夠資金周轉的情況下,主辦方又會否「走數」,令從業員得不償失?Samantha又表示:「走數並唔係一個常見嘅情況,不過工資可能會遲啲先出畀我哋,尤其freelance好多時都唔會簽約,只會等到完騷之後開invoice(付款清單) ,所以連上期都唔會有。」她又指出有少部份的主辦方會在開工前出報價單,列明如果取消會有什麼處理方案:「不過九成嘅工作都唔會提前開單。」

雖然演出取消,不過舞蹈員、樂隊等前期工作較多的從業員影響不算太大,而主辦方亦會協商工資安排。 (資料圖片)

Samantha又提到,在眾多的演唱會從業員當中,還是有一部份待遇會較好:「做製作、排舞、樂隊等等,因為前期已經需要大量籌備工作,所以尚可以追返少少錢。」不過影響最深的應該是後期人員,即是搭台、錄影、攝影、保安或者其他部門等等:「因為佢哋嘅工作係逐日計,但如果演唱會提前取消,佢哋一日工都開唔到,最後當然冇糧出。而且佢哋係一早預留咗工作檔期畀演唱會,同時推咗其他工作,變相嗰兩個星期可能佢哋都冇工開。」

演唱會取消,對搭台手足、攝影、場地保安等從業員影響或許較深。 (葉志明攝))

最後Samantha又提及另一方面的憂慮,畢竟早前理大衝突中,紅磡成為了催淚氣體的重災區,而紅館當然亦深受其害。坊間有專家指出催淚彈釋出的二噁英,被世衛組織定義為對環境具有持久性污染力,一旦進入人體便會長久駐留,半衰期長達7至11年,損害免疫系統、內分泌系統及生殖能力。Samantha對此表示擔心:紅館係一個密封場地,今次因為理大事件而受到幾多污染,仍然要等相關部門出報告。我都會諗,如果今次嘅演唱會唔取消,我日日都喺紅館做嘢,咁點算呢?當年沙士取消所有演唱會都係同一個道理,要保障入場觀眾、表演者同工作人員,而紅館到底要幾耐先可以再開演唱會都係一個問題。」

上星期理大圍城,警方曾施放催淚彈,而位於理大旁邊的紅館亦可能受影響。 (資料圖片)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。