【林欣彤演唱會】父女檔合唱《今生今世》勁感動:感激家人照顧我

撰文:
最後更新日期:

林欣彤(Mag)昨晚於旺角麥花臣場館舉行《Mag In The Mirror》演唱會,去年曾受聲帶問題困擾導致演唱會延期,今晚Mag準備十足出獻唱報答歌迷。Mag成功開騷一眾圈中好友現身撐場,包括:吳業坤、許廷鏗、田蕊妮、陳蕾、欣宜、鄧小巧等等。

攝影:陳順禎

林欣彤克服聲帶問題及病情,她笑言:「真係台上一分鐘,台下十年功!」 (陳順禎攝)

+10
+9
+8

林欣彤今次演唱會分「本我」、「回憶」、「黑暗」、「痛愛」、「自救」五部份。甫開場Mag在台上一邊清一邊踱步,高音低音都相當紮實,用行動告訴大家自己狀態準備就緒。打頭陣唱出《我是歌手》及《本身的用處》,Mag興奮跟歌迷打招呼:「好感動呀!等咗好耐喇,有冇人上年買咗飛㗎?呢段時間我好努力準備,希望大家enjoy,冇你哋我做乜都冇用!」緊接唱出《玫瑰式體驗》及《一人旅行團》。

林欣彤昨晚狀態大勇,穿透有力的高音再現! (陳順禎攝)

餓騷良久的Mag全晚少說話多唱歌,唱到《Little Something》、《Take Me Through》及新歌《一秒》時,全場一片手機燈海氣氛動人。接著Mag介紹爸爸出場說:「佢係第一個陪我唱K嘅人,我細個首本名曲係《一人有一個夢想》,今晚夢想成真係時候送份禮物畀佢!今晚嘅特別嘉賓,我Daddy呀!」然後父女檔合唱張國榮的《今生今世》,全場一片歡呼聲,Mag又讚爸爸經驗老到:「佢成日去老人院、社區中心到唱歌畀老人家聽,分分鐘經驗仲多過我!」她又問爸爸是否滿意今晚的舞台,林爸爸高興讚好,Mag卻說:「你要話唔滿意,咁我就會更努力開更大嘅場!」

林欣彤將今次演唱會視為禮物送給爸爸,更父女檔合唱張國榮的《今生今世》。 (陳順禎攝)

林欣彤狀態越唱越勇,一口氣唱出多首難度系數十粒星的作品,如:《洗澡》、《樹藤》、《番梘》、《時間》、《忍》、《懸崖花》等等,密集的歌詞、爆發的搖滾、穿透有力的高音Mag全都輕鬆駕馭,相信樂迷聽完都覺得:「林欣彤終於返嚟喇!」Mag突然感性說:「我經歷過低潮、情緒病,聲帶一講嘢就痛,上年呢個時間好辛苦,連攞匙羹食嘢都痛。我覺得上天畀一個身份我,去安慰同病相憐嘅人。你睇下我今晚企喺呢到,即使你好想放棄,只要你肯一定捱得過㗎!而且喺你亂七八糟嘅時候,仲有愛你嘅人去愛你,係低處最靚嘅風景!」然後唱出《失戀的人站起來》、《追風箏的風箏》,Mag更感動落淚,她笑言:「頭先採排望住Daddy唱都唱到喊呀,一喊就好難聽㗎喇,唔可以喊㗎!」即使場館已開燈,但歌迷Encore聲不絕,不願離場五分鐘後Mag再上台,徇眾要求唱出《鳥籠》為演唱會畫上圓滿的句號。

林欣彤(資料圖片)

騷後林欣彤接受訪問,被問到去年的低潮與身體狀況如何克服,她坦言:「上年呢個時間病得好緊要,但係嗰段時間好感激家人同朋友好照顧我,令我捱得過,所以今晚可以健健康康,完完整整咁完成演唱會。」又問用了甚麼方法令自己再次唱歌?她表示:「其實嗰時有睇返醫生,令病情穩定好多,再重拾唱歌。」另外,她提到受聲帶問題困擾,已且作品有一定難度,所以體會到「台下一分鐘,台下十年功」,但她視之為令自己成長的磨練。

林欣彤以自己作例子,她激勵歌迷說:「你睇下我今晚企喺呢到,即使你好想放棄,只要你肯一定捱得過㗎!而且喺你亂七八糟嘅時候,仲有愛你嘅人去愛你,係低處最靚嘅風景!」 (陳順禎攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。