【專訪】Dusty Bottle為自己平反:我哋好多貨,唔係只得復古嘢!

撰文:黃浩晉
出版:更新:

樂隊Dusty Bottle由出道至今作品圍繞歐美流行的Neo Soul、R&B曲風,再加入復古元素,為香港樂壇帶來新衝擊。早前Dusty Bottle推出新歌《Break It Down》,作為《問世間情是何物》的續集,繼續以男女之事作主題,配合70年代的Funk曲風,充滿一種蠢蠢欲動,互相試探、挑逗的感覺。
Dusty Bottle一向予人型格的感覺,在鏡頭前比較寡言,好像有種莫名的距離感,但實情四位成員非常玩得,進行訪問時笑聲不斷。他們更想為自己平反一下,不想被標籤成只玩Retro(復古)風格的樂隊,想認識Dusty Bottle不為人知的一面記者留意今次訪問!
攝影:陳順禎

《Break It Down》Bass Line夠鹹濕原來同70年代Porn Groove有關?

《Break It Down》推出之初,有網民分享歌曲時寫上:「嘩聽吓條Bass Line,
幾鹹濕!」的確歌詞與編曲都予人一種想入非非的感覺,加上今次是Dusty Bottle首次以Bass(低音結他)作主導的作品,當然要讓Bass手Matt來解釋一下。他一臉正經地說:「鹹濕呢個定義其實我係解得通嘅,因為今次首歌靈感來自70年代Disco、Funk音樂;而當時嘅鹹片配樂用好多呢類型Funky音樂,所以聽到呢種Funky嘅Bass Line諗起一啲情色畫面係正常嘅。」

Matt還透露自己曾研究一種名為「Porn Groove」的音樂,那麼在彈奏這類型音樂前是否需要觀看當時的小電影作參考?他笑言:「真係有睇嘅,但真係睇唔到,睇唔落去,哈哈!」而所謂的Porn Groove就是那些電影的配樂,他解釋:「有好多sound track雖然好似罐頭咁,但都係Disco、Funk曲風,而且當時嘅party都係呢啲vibe,所以係同一樣嘢。」

Dusty Bottle《Break It Down》以男女之事作主題,令人聽到有種「鹹濕」的感覺,原來曾經參考70年代的Porn Groove。(陳順禎攝)
《Break It Down》MV都拍到令人想入非非,即CliCk睇MV精彩場面!(按圖放大)(MV擷圖)
+9

《Break It Down》歌詞惹人遐想 Dusty Bottle大讚詞人「樂儀不淫」

Dusty Bottle繼《問世間情是何物》後,再與填詞人王樂儀合作炮製《Break It Down》作為續集。雖然兩者都在探素男女之事,不過今次則是從女性角度出發,而主音Kerryta在聲線上的處理性感之餘帶點強勢。她大讚王樂儀能夠處理較偏鋒的題材,人如其名「樂儀不淫」。不過,原來歌詞背後有段故,她說:「我哋收到份詞第一日,其實好限制級,改咗4、5個版本,先變成現時保守一點又有想像空間嘅版本。」

話說回來,Dusty Bottle從《You Don’t Know Me》開始以廣東話入詞,對於由一開始就追隨的樂迷來說可能要花一點時間適應;而且復古曲風再配廣東話歌詞與「老套」只是一線之差,他們有否為此擔心過?鍵琴手JNY說:「都有嘅,但不論獨立音樂又好,主流音樂都好,廣東話詞都可以有潮嘅歌,爭在你點處理歌詞同旋律㗎啫。」Matt補充說:「最初都會好擔心聽眾接受唔到咁潮嘅底配廣東話,所以都行一個復古嘅方向令人接受咗Dusty Bottle先,然後再加入唔同元素。」Kerryta說:「慢慢餵你食,食到你識食為止!」

主音Kerryta大讚填詞人王樂儀處理《Break It Down》及《問世間情是何物》這類題材拿捏得宜,人如其名「樂儀不淫」。(陳順禎攝)

Dusty Bottle為自己平反:我哋好多貨,唔係淨係玩復古!

由《You Don’t Know Me》到新歌《Break It Down》,Dusty Bottle的復古風格非常鮮明,此舉為香港樂壇帶來新氣象,亦得到不少樂迷喜愛;不過,他們想藉此機會為自已平反:「我哋唔係淨係做Retro嘢!」JNY坦言:「雖然聽眾覺得我哋唔Retro、唔『娘』啦,但其實我哋係覺得都娘娘地,哈哈!不過大家覺得唔『娘』可能係因為我哋Pop化咗件事。」鼓手Kay亦有相似體會,他說:「原本我哋係想玩啲潮得嚟帶啲Retro元素嘅音樂,但係做咗幾次之後,就好似變到我哋淨係玩Retro,成件事好似調轉咗咁。」Kerryta亦說:「其實好驚外界覺得我哋冇貨喇,但係sorry,我哋好多貨,好希望今年可以出到EP!」

話雖如此,Dusty Bottle也樂見聽眾喜愛他們的「摩登復古」,JNY說:「出第一隻歌《You Don’t Know Me》嗰時其實大家都好擔心,擔心隻歌太『娘』,因為頭4首英文歌都係潮vibe,忽然轉style玩好retro、好pop,驚外界會覺得老套。同埋講真,本身寫歌嗰陣係reference日系City Pop,但最後個成品加埋Strings(弦樂)就驚好老套,亦唔知觀眾反應會點,但竟然又反應幾好,所以都俾咗好大信心我哋!」他們還透露,經過一番爭取,下一首面世的作品終於重回他們擅長的風格,是一首Urban、Neo Soul感覺為主的作品,大家記得拭目以待。

咪睇Dusty Bottle平時咁cool,其實私底下個個都好玩得!(陳順禎攝)
+5

點擊觀看Dusty Bottle《Break It Down》MV