【辦公室生存手冊】一個知等於全公司都知！私事講幾多先係太多？
人係群體動物，返工除咗做做做，都需要同同事傾下偈，否則好易會癲，而傾傾下又難免會提到一啲私事例如家庭、感情狀況。需知道，你只要將啲私人嘢講過比一個同事知，好快就會成間公司都知，而完全唔同人傾偈或者保留太多神秘感又好易變透明，究竟返工應唔應該比同事知自己私事？
未摸清各人性格 不需急於交朋結友
一個理想嘅工作環境，當然包括同同事變成可以互信嘅戰友，但人心隔肚皮，未睇清楚一個人之前，你真誠熱情，唔等於對方都係同一個心態，所以，即使你有件無傷大雅嘅「私事」想分享，喺講之前都要三思，你打算開心Share但聽入耳嗰個可能會接收成負面想法。
就以「你有無男朋友？」呢條咁簡單嘅問題為例，可能你唔介意比同事知道你感情狀況，但答「有」同「無」已足以影響上司對你嘅睇法……
延伸閱讀：前副總裁變娃娃達人：唔可以一出嚟就追夢，要受啲苦，果啲係經驗
我其中一位舊上司Christy，約35歲，多年無戀愛，為人妒忌心極重，亦好鐘意同人比較。Christy有個習慣，就係每有新同事加入，佢都會喺Welcome Lunch問人「有無男朋友」，如果答「有」，佢就會繼續問人男朋友係做邊行呀？住邊區呀？無論答案係咩，佢聽完都會流露出一個不屑的表情，又或者係加一兩句Comments如：「吓，你男朋友做IT？一定係悶人啦！」、「吓，你男朋友係廚師？咁咪成日都有陣油煙味？」除此，佢仲會認定「有拖拍」嘅同事係掛住拍拖唔肯OT、返工時間成日玩電話等等……呢啲「指控」未必係真，但已經喺佢心目中扣晒分。而答「無男朋友」嘅同事呢？就相安無事，因為對Christy嚟講，呢班同事係「自己人」，同佢一樣無另一半，亦演繹成「比較搏」。
當然唔係個個上司都好似Christy咁極端，我舉呢個例子，係想提醒大家「言者無心，聽者有意」有時你覺得係開心事例如同另一半試咗間新餐廳想推介、識人幫你買到個限量版手袋……此等小事想分享都要睇對象，唔係人人都鐘意替人高興的。
延伸閱讀：【周秀娜專訪．愛情】拒絕「30即嫁」：寧願單身，好過一起不快樂
解決辦法：九唔搭八！
被問到一啲唔想答／唔識答嘅私人問題可以點？世上除咗黑與白，都仲有灰色，真係唔知點應對嘅時候，不仿講啲似是而非嘅答案。再以「你有無男朋友？」為例，你明明有但唔想講，你可以答：
拍拖呢啲嘢，真係要花時間同精神，放工已經攰啦，早兩日份Proposal我仲未做好呀，睇嚟今晚又要OT……
你信我，好神奇架，你講其他嘢，大家可能無咩反應，但只要呻公事、講OT，話自己忙，大家就會仆出嚟話「我都係！」然後就鬥數一堆手頭上嘅工作，直到得到一句：「嘩你真係好多嘢做」先會停。無論之前講緊乜，只要你用繁忙嘅公事兜去第二度，就無人記得原本嘅話題係乜，因為大家連餐飯都無心機食落去。
同同事交心，真係要睇你做咩公司，細公司幾個人易混熟又少鬥爭就無咩所謂，大公司人多口雜，一日仲係同事，都係有所保留好啲，想搵百分百知己？建議都係留待辭職之後。