【無法成為野獸的我們】你不是職場清道夫,唔需要乜都幫人執!

撰文:詩寧
出版:更新:
日劇《無法成為野獸的我們》最近熱播,女主角新垣結衣在職場上不斷面對推卸責任,為同事收拾爛攤子的情況,一幕幕有血有肉的打工仔血淚史,你又是否似曾相識?(《無法成為野獸的我們》截圖)

打工仔每日返工都有一個願望,就係「準時放工」,很可惜呢個願望一年都實現唔到十次。無盡的OT,有時係因為隊友太豬、有時係老闆或客戶唔斷氣,不過,諗深一層,OT真係唔係你自己造成?

作者:詩寧

幾多顆熱血的心在職場上被磨蝕?(《無法成為野獸的我們》劇照)

香港有唔少辦公室都存在一樣既無聊又討厭嘅潛規則——準時放工等於懶,呢個潛規則令好多人明明無嘢做都唔走,但令更多人搞到自己好多嘢做走唔到。承認吧,香港人你已習慣忙,內心好怕其他人覺得你唔忙,好驚畀人講閒話,話你係冗員、唔盡責、無團隊精神……慢慢地,你乜都攬上身,繼而變成職場清道夫,有乜屎都係你執。

延伸閱讀:

【施政報告】延長產假14星期足夠?Netflix放足一年冠絕全球?
瑞典人生活哲學「Lagom」:從不OT,與戀人一起享受的剛剛好生活

你唔係清道夫,唔需要乜都幫人執!

舉個例,Senior恰Junior事件每日都發生,最普遍嘅係,明明個工作係Senior負責,但「出於好心」而「教」Junior去做Senior嘅嘢,你估Junior唔知自己畀人恰緊咩?知,但唔敢反抗,加上好多人同Junior講:

「後生仔女,出嚟做嘢唔好怕蝕底,做多啲學多啲。」

「搵得你幫,證明你有能力,幫到就幫啦。」

眾人催眠Junior嘅同時,Junior亦催眠緊自己,「做啦做啦,學多啲,到升咗職咪可以點返人做嘢囉。」你以為啦,「點人做嘢」係一項技能,首要厚面皮,次要無良心,你係咪做到先?大把人升咗做Senior之後繼續乜都攬上身,只有更忙更多OT。

無論幾夜或幾早,收到老闆電話、whatsapp要求幫手執漏,你又會唔會回覆?(《無法成為野獸的我們》截圖)
恰你嘅人係衰,但你都唔見得對自己好。
詩寧

別因怕自己沒價值而瘋狂OT

職場清道夫千萬個說法令到自己好忙,說穿了其實怕別人覺得自己無價值,為咗討好別人,搞到自己好夜先返屋企、平時公司有麻煩嘢都係搵你頂……恰你嘅人係衰,但你都唔見得對自己好。

「呢單嘢唔關我事」呢句說話可以用嚟卸膊,但同時可以用嚟保護自己。有啲衰人做嘢做到一半,出事之後講呢句說話將亂攤子屈落其他人身上當然係唔啱,但如果單嘢堅係唔關你事嘅話,你又何必撲出嚟幫人執手尾?一間公司每日都有大大小小嘅亂子,你又幫得幾多次?有啲嘢唔關你事,就大大聲答真係唔關你事,其他人點睇,重要咩?

你可能感興趣