【豬年職場】新年唔做蠢豬:小心得罪方丈、存在感亦比盡責任重要

撰文:詩寧
出版:更新:

過年總會睇下運程,研究下點樣先可以催吉避凶,打工仔當然希望豬年唔好遇到豬隊友,你有無曾經疑問過:「點解呢啲人豬到咁都生存到?咁都唔使畀人炒?」換個角度,你覺得人哋蠢豬,會唔會對方都覺得你傻豬?除咗擺風水陣之外,仲有其他方法可以做叻豬嘅。

好多打工仔都想辭職,但無人會想畀人炒。轉過大約二十份工,只有其中兩份工見過公司炒人,而呢兩位被炒嘅同事都唔係廢級,佢哋都好勤力做嘢。呢兩位被炒同事分別唔同年齡、公司、職位、背景,唯一相同嘅就係……傻豬豬得罪人。呢個世界識人好過識字,相反,得罪人的話無論你幾勤力都一樣無運行。究竟做咗乜嘢會令你「得罪人」?有時可以係莫須有,唔鐘意你嘅原因可以係你著衫靚過你上司、你無同人講早晨、你唔埋堆一齊Lunch……呢啲實在係避無可避,但係唔係完全無得防?又未必。

撰文:詩寧

(唔想做蠢豬,點擊圖片看豬年職場3招傍身==>)

「呻」都係一門學問

唔少打工仔最鐘意就係呻,明嘅,老闆唔肯出錢但又要你做到件事好好睇睇;同事又蠢又懶就乜都唔使做,佢做唔掂又塞畀你,你可靠所以無得放工;對外又有唔知自己想點、只係Ban橋唔交橋嘅煩客。每日真係有十萬樣嘢屈喺度,好想同人呻下抒發下。

(《未生》劇照)
職場上,方丈容納到懶或蠢嘅下屬,但包容唔到得罪佢嘅人。
詩寧

但各位打工仔緊記,「呻」都係一門學問,你要搵啱聆聽對象,佢唔可以口疏同埋你哋最好係坐埋同一條船,即係你衰咗佢都唔會有著數,否則,你隨便呻兩句,佢轉頭就是非當人情幫你散開去。無論你工作上嘅遭遇有幾值得同情都好,太多人知,對你都唔會有好處,唔通同事知道你慘之後,佢哋就會救你出苦海咩?

(《未生》劇照)

呻嘅內容都要諗過先出口,有啲人你係唔怨得嘅,例如你明知個老闆吝嗇,你就唔好唱佢「請」同事食麥當當做Welcome Lunch都仲要象徵式每人收返十蚊,正所謂崩口人忌崩口碗,真嘢唔好拎出嚟講,你內心知就得啦,你估你唔講,其他人就睇唔出佢係石頭鑽不出血咩。呢個世界真係有人小器到你想像唔到,我上文所講嘅兩位被炒同事,就係衰講老闆壞話,一個傳一個,你唔會知老闆聽到嗰個係咩版本,總之佢憎你,要你消失。

(《未生》劇照)

存在感比默默做嘢更重要

能夠喺公司做到人見人愛當然好,但呢個道行唔係人人修練得到,但最少你要有一定嘅存生感。唔好以為無人認得你,就少啲人叫你做嘢,無論你幾靜,有屎嘅時候一定有你份;但如若你太靜,有糖嘅時候就無人記起你,咁你就永遠只有吃屎的份兒。默默做嘢係盡責,但做完啲嘢要畀人知先得,否則你有你做,功勞就其他人領。

唔好以為無人認得你,就少啲人叫你做嘢,無論你幾靜,有屎嘅時候一定有你份;但如若你太靜,有糖嘅時候就無人記起你,咁你就永遠只有吃屎的份兒。
詩寧

叻唔需要畀全世界知

我做過咁多份工,的確見過唔少叻人,曾經有同事係乜都識:電腦維修、營銷策略、公關技巧甚至係一啲日常生活小智慧,佢咩書都睇亦學以致用,幫公司、同事解決好多問題。但佢個短處就係鋒芒太露、鐘意認叻,當其他同事有嘢唔識要問佢,佢就會大大聲話:「下?咁簡單都唔識?都叫你唔好咁毒,多啲出去擴闊眼界。」、「呢啲嘢係人都知啦,你點解會唔知架?你無朋友架?」搞到同事尷尷尬尬,內心唔鐘意呢個人,當呢個人有事嘅時候,就無人幫佢了。

職場上,方丈容納到懶豬或蠢豬,但包容唔到得罪佢嘅傻豬,各位打工仔,豬年醒目啲呀!

你可能感興趣