【真．降魔的】夜更司機細數全港陰氣最重之地：最怕分唔到人定鬼

自從大台播放劇集《降魔的》，每夜我都搭一程的士。「司機，其實你怕唔怕撞鬼？」「我自己有戴一條觀音鏈傍身。」夜更的士司機阿全（化名）說。逢周三晚，他準時上網台收聽潘紹聰的《恐佈在線》鬼故節目，「仲有你下載gimme 5個手機程式，星期四晚有個《廣播道陰陽路》，講到好堅。」「點解驚仲要聽鬼故？」記者疑惑。阿全解說，一來晚間節目選擇少，「二來，聽鬼故刺激啲，先冇咁易瞓著。」阿全日間要幫忙太太打理生意，靠揸夜更的士才能賺夠一家人的生活費，「揸夜更揾得多啲。」他還笑言，路上的交通情況有兩種，除了行家會轉達路面情況，「上次網台節目講屯門公路，話其實路邊啲鬼排晒成條隊呀，所以去到呢啲位，仲有青山公路呀，我都會揸慢啲，小心啲。」

冷笑的陰陽眼女乘客

有一次，有一個女乘客要往西貢。司機阿全在收聽《恐佈在線》，他好奇問乘客：「小姐，好多女仔都會叫我校細聲啲，你唔驚咩？」女乘客冷笑一下，沒有回應。全繼續說：「小姐，西貢其實都幾猛，有時我車啲客去，有啲位都會覺得毛管戙。你唔驚？」女乘客又冷笑一下，今次她終於開口回答：「我知。驚咩？我成日都見。」女乘客幽幽地說：「剛才都有好多，你感唔感覺到？」此時阿全仍是一臉茫然，不明所以。「你嚇我咋？邊度？」女乘客說自小擁有陰陽眼，靈體早已司空見慣，「剛才在飛鵝山個燈位，有成排（鬼）哄埋嚟望住我哋，你感覺唔到咩？」阿全關掉了網台，不發一言。

阿全：「我冇真係撞過鬼，因為好多時候，係唔識分人定鬼。」

唔知人定鬼

某夜，一位長髮女子在尖沙咀幸福中心上車，「司機，唔該。想去西貢榕樹澳。」榕樹澳是一條客家原居民居住的鄉村，阿全未曾到過，開了導航。中途，阿全跟她說：「小姐，你到時帶一帶路喎。」半秒，阿全看看倒後鏡，心想：「咦，點解突然坐咗另一邊？啱啱仲坐緊隔離。」阿全再看清女子的衣著，確保對方不是穿紅衣（記者笑咗）：「我個心寒一寒。都唔理咁多。」

西貢山邊下車  街燈突然……

到了西貢榕樹澳附近，隱約看到一個細小的路牌﹐佈滿青苔，的士再轉入去，「突然冇咗街燈。」阿全：「個人覺得有啲寒，起雞皮。」阿全已不敢再看倒後鏡，問女乘客：「你使唔使叫人出嚟接你？」他說女乘客說話陰聲細氣，以近乎「冇氣」的語調說：「唔使。」阿全很好，抱著送佛送到西的精神，「是但啦，就車埋佢落去，一邊係山邊，一邊係引水道。」阿全說沒有街燈，手在發抖，只能慢駛。女乘客落車之後，「嗰個位其實黑到睇唔到路，見佢冇開電筒就行。我自己都有啲毛管戙，唔敢再睇，快啲走。到最後我都唔知佢人定鬼。」

司機拒載石澳鶴咀截車客

阿全說香港有些偏僻的地方比較陰森，通常甚少行家隨便載客前往，如石澳鶴咀，「通常啲人係call車入去出返嚟，咁偏僻好少客會截車。」他憶述有一位行家，那夜下著毛毛細雨，在鶴咀看見有人在遠處揚手「截車」，司機踩行油拒載，「佢話真（人）又好，假又好，唔接呀。唔敢接。」行內亦流傳新娘潭、青山公路「很邪」，「老一輩啲行家話，夜晚試過幾次見到前面電單車，突然車尾多咗個人。自己未見過，但通常嗰啲位小心啲。」

夜更司機最怕咩鬼？

不過，每一個夜更的士司機也說，最怕還是酒鬼，可避則避。阿全說有醉漢一上車便粗口滿天飛，說自己是黑社會某某大佬，著司機途經荃灣再回青衣，「佢要嘔，叫佢喺荃灣停埋一邊，嘔完清醒啲再上車，佢唔肯，嘔到我全車都係。」下車後又再指罵阿全，還要報警。又曾有一酒鬼下車時，阿全找錢給他，對方一手推開，又破口大罵：「你做乜塞錢畀我！」

每個夜更司機總有拼搏的原因

有人說，每一個夜更司機都總有一次撞鬼的經歷，其實不是。阿全：「應該說，每一個夜更司機，都有自己拼搏的原因。」縱然夜更司機冒著撞鬼和酒鬼的危險，但夜更才是讓人可拼的天地。他說，夜間路上𣈱通無阻，司機可以「踩多幾轉」，日更每月可賺萬多元，夜更勤力的司機可賺三萬多。「睇吓佢車頭有幾多部手機，就知佢有幾搏。其實一路揸車，一路睇apps接order係好危險。」他說有些將近收山的司機，凌晨兩時後或會相約飲早茶，「我哋要搏殺嘅唔會埋堆。」這星期記者遇過的夜更的士司機，有一個是60歲遇上第三段婚姻，生了一個幼子；有一個是50歲的父親，膝下有兩名讀小學的孩子，「小學五年級已經要去補習天王。」；有一個是日間要照顧年老的母親，晚上返夜更多賺點醫藥費。

阿全說夜能讓人冷靜，看著街燈的霉黃在窗外倒退，他亦享受路上馳騁的爽，「畢竟日間幫忙太太生意太勞累。」15分鐘車程，足夠聊一個司機的故事。