【不是KOL】90後組「暗黑Twins」紅出國際  港人抨擊「死肥婆」

撰文:顏寧
出版:更新:

「我哋外表比較圓滑,說話比較幽默。」肥龍介紹暗黑Twins時,自己也忍俊不禁。最近,這兩位90後組成「暗黑Twins」,將英文歌《Butterfly》成《Butterfries》,盡情地表現對薯條的瘋狂,重口味短片衝出國際,得到世界各地的網友青睞。
她們絕對不是假天真,而是「假」無聊,透過看似無聊的創作短片,宣揚「不做社會既定」的人,要做自己的精神。她們更將流行曲改詞,重新拍攝MV,題材包括肥胖形象和快餐食物。這3個月來,憑藉改寫Twins的《女人味》成《肥西味》,歌詞抵死搞笑,訴說肥人的自信和愛吃的生活,成功吸引網民目光。這些MV的聲音畫面製作認真,以無厘頭的演出令人開心。成員易欣說,做這些事有種「別人笑我太瘋癲,我笑他人看不穿的感覺。」
攝影:李啓康

這對新組合細Fat(左)和肥龍(右)今年芳齡22歲,有青春,更勝在有勇氣,敢冒著被千萬Twins粉絲圍攻的危機自稱「暗黑Twins」。

【不是KOL.片】暗黑Twins亂入維園晨運團 肥瘦不重要

一開始主打音樂創作 

這對新組合易欣(藝名:細Fat)和陳樂兒(藝名:肥龍)今年芳齡22歲,有青春,更勝在有勇氣,敢冒著被千萬Twins粉絲圍攻的危機自稱「暗黑Twins」。自稱「暗黑」戴戴頭盔,皆因兩位絕對不符合阿嬌阿Sa那種「女神」形象。易欣愛中性打扮,短髮;樂兒身形肥胖,拍攝《肥西味》時體重更加到達人生的巔峰——74公斤。

然而,她們的默契,絕對及得上阿嬌阿Sa。易欣兩年前在YouTube建立個人生活頻道「Healthy Brains」,分享生活貼士、翻唱影片、二次創作韓文歌,一心畢業後到台灣種菜做農夫,沒想過有一天會在「網上」出道,還會有自己的「派台歌」。因為Whatapps與肥龍幾句無聊的對話,起了翻天覆地的變化,孕育出「暗黑」Twins。

樂兒的媽媽從朋友口中得知這個MV:「咦?你個女喺Facebook好紅喎!點解你個女袒胸露臂,又唱粗口嘅?」(MV截圖)

《肥西味》取代《女人味》

去年某天,易欣乘地鐵甚覺無聊,忽發奇想改寫了流行曲的歌詞傳送給樂兒:「我吃的Big Mac Big過人」,「雙生兒」的樂兒心靈感應,一看便知是Twins《女人味》的歌詞,腦筋急轉彎對下聯:「我愛的新地多細菌。」就是這樣,她們就決定成首《女人味》改寫:「純粹覺得好玩,無諗住要出名。」

她們花了半天填詞,1小時錄音,去維園、理工大學用腳架拍片,自編自導自演。拍攝後,她們沒有馬上「派台」,重回現實應付學業,直至今年8月才動工剪接這首《肥西味》的MV。任誰也沒有想到那個Twins賣青春可人的年代遠去,「肥西」也能紅出個未來:「𠵱個咁爆,係有嚇親,我驚到啊!」肥龍說。

家人不認同:你好核突!點解要唱粗口歌?

《肥西味》上載YouTube後,有不同Facebook專頁要求授權轉載,兩名肥西的舞姿和歌聲一時佔據Facebook的動態。樂兒的媽媽從朋友口中得知這個MV:「咦?你個女喺Facebook好紅喎!點解你個女袒胸露臂,又唱粗口嘅?」媽媽知道後就立即Whatsapp教訓樂兒:「點解你要咁做?第時會無人請你㗎,你諗下你嘅將來啦!」

樂兒未有機會向媽媽解釋,當晚和親戚吃飯時,不停地教訓樂兒:「而家全香港都睇到你啦!你以為你真係好紅?你真係好核突!」寂寂無名的暗黑Twins一夜之間在網絡上爆紅,樂兒感到恐懼和慌張,竟然希望這段片在網上消失:「因為畀屋企人咁鬧法,加上Facebook已經去到幾個Page Share嘅程度。嗰陣真係好sad,俾阿媽鬧到崩潰咁滯啦。」 樂兒焦急地與易欣商量,最後請求其中一個Page將短片下架。

樂兒的內心天人交戰,害怕親戚的責罵,同時又為到不能再做肥龍感到可惜。那夜,她終向媽媽講理:「我覺得粗口根本就唔係咁大問題,因為啊爸都會講。我係享受而家做緊嘅嘢,就算將來無人請我,咁誇張嘅嘢都好,我會承擔返責任。」 天下間的媽媽都有心軟的時候,知道女兒享受拍片,也只好接受樂兒的解釋,默默支持她們。自此暗黑Twins再推出新歌,如《明奶暗戀KFC》、《Butterfries》,或是接受訪問的報道,他們的態度都360度轉變:「佢會睇得好開心,最搞笑係表妹要搵我簽名。我好開心佢哋接納返。」

易欣:「如果唔喺9gag出,啲人會唔明我哋做咩,一定好多負評。」

點擊率收入轉交原唱

至於易欣的父母,完全支持她們創作,媽媽也主動跟她說:「啲片幾好喎!」剛剛畢業的易欣打算給自己一年時間全職做YouTube的創作,家人也沒有反對,只是不滿她為了剪片、填詞夜瞓:「佢鬧返我唔瞓覺。佢話,我寧願你去耕田啊!」易欣說,其實近來爆紅的短片都沒有為他們帶來收入,《肥西味》、《明奶暗戀KFC》和《Butterfries》的點擊率收入是轉交了原唱:「有人話我哋為咗點擊率賺錢,遲早老母都要賣埋,想同佢哋講返,我哋賺0蚊。兩年,喺YouTube只係賺咗3000蚊。」

易欣說,暗黑Twins可能要接廣告,自己可能要做散工,訪問當天她還去做市場調查的炒散工作。她希望至少能負擔自己的支出:「要搵食,同時兼顧認真製作MV、音樂。」為甚麼無錢賺都要堅持創作?「精神層面上,我覺得宣揚認真做無聊事係唔會停止。」易欣說。

無聊事認真做   準備綠幕、服裝   

她們鏡頭前雖然嬉皮笑臉,鏡頭後,她們都是認真準備。為了製作《Butterfries》的特技效果,她們特地去了買綠幕、蝴蝶裝。討論拍片的動作時,弄得房間都是油漬,最後花上兩小時清潔。她們出街外拍攝時,認真忘我的演出也會引來奇異目光。「上次去KFC拍片時,對面有3個男人坐喺我哋對不停談論我哋。我哋都唔理啦。」肥龍說。

暗黑姊妹不介意被大家笑,因為這就是她們的目的,繼續走「食物音樂另類性感風」的路。

香港人不懂無聊?

她們的作品在網上引來的迴響好壞參半,不少香港人留言抨擊她們「死肥婆」、「男人婆」,也有為數不少的網民罵他們「戇X當有趣」、「don’t make stupid people famous」(不要讓這些蠢人成名)。《Butterfries》的短片出街後,更顯得香港人和其他地區網民的分別。

這段片,易欣剪接時也受不了自己,曾經問樂兒:「不如放棄。」樂兒只好回應:「Stay strong。」她們將影片投稿去9gag的影片比賽,打算若不入圍,9gag不將短片上載的話,她們就將這份曾經的努力,永遠埋藏心中。除了因為自覺這段片「玩得盡」,也因為她們覺得香港人不懂得欣賞這種「戇X文化」:「如果唔喺9gag出,啲人會唔明我哋做咩,一定好多負評。」結果,短片入圍9gag比賽,有些英語、俄羅斯語的Facebook專頁轉載。他們收到很多支持她們的訊息,讚她們製作認真:「佢哋好欣賞,外國人接受能力好高。」

背後只想令大家開心笑

她們覺得香港人不懂欣賞惡搞MV或音樂,因為認真製作的作品和引起迴響的作品不多。「 I Love You Boyz 都玩Parody(滑稽模仿),但係都係嗰個年代。《我我我我我有胸部》個個都識㗎。」易欣說,也許香港人習慣每件事情都要加諸意義:「點解香港人唔可以輕鬆啲?」樂兒說:「我哋行𠵱個路線,係想以我哋嘅戇X嚟感化佢哋,令佢哋笑。因為香港真係太大壓力啦。」暗黑姊妹不介意被大家笑,因為這就是她們的目的,繼續走「食物音樂另類性感風」的路。

暗黑Twins盼能笑聲救地球之餘,易欣的過去也令她產生跳出既定框架的想法:「暗黑Twins個base meaning就係唔想做社會既定嘅一個人。」她們主張做自己,愛自己,全因她們都曾因身形而自卑,甚至有一段被欺凌的過去。後文再續。

【不是KOL】暗黑Twins曾因肥被同學掌摑 無故被罵:X你老母