【單車位都炒】新寶城單車位售3萬元 居民冷待：寧將單車放家中
將軍澳新寶城一直供住戶租用的單車泊位，有投資者從發展商恒基地產手上購入，準備以每個3萬元拆售，雖然有地產代理放風指已有投資者準備掃貨，不過一些新寶城住戶均表示毫無興趣，有單車位租戶更指日後寧願將單車「擺喺屋企」，甚至放棄自己擁有單車。
不過，法團主席則稱3萬元並不誇張，又指若業主想買單車位「現在是時機」，但希望規定未來買家必須將單車位租予住戶。
新寶城距離港鐵坑口站只有約5分鐘路程，附近亦有不少巴士及小巴路線途經，記者星期二現場所見，大部分單車都停泊在單車位中，鮮有人騎單車出入，相信居民不經常以單車代步，只用作休閒或運動用途。
而且在新寶城兩旁的文曲里及銀澳路，都有少量公共單車泊車處，供附近居民使用。雖然泊車處沒有上蓋，單車需要日曬雨淋，但亦有不少人使用。
單車位租戶驚訝：會改租自助單車
於新寶城租用兩個單車位擺放子女單車的鄭太，對投資者打算以3萬元一個拆售單車位大為驚訝，又不希望供居民享用的設施「拆細晒」，若發生問題或意外，令租戶不知應向誰人追究。她又指自己不會購買單車位，若租金因此上升的話，可能會以自助形式租用其他單車，取代月租單車位。
雖然自己不會購入單車位，不過鄭太認為車位仍然會有人購買作為投資，「而家樣樣都覺得會有升值潛力，都係大家炒賣，即係好似車位咁樣，佢初初拆售車位可能廿七、八萬一個車位，都估唔到而家升過百萬。」
居民李先生：買單車變得唔抵
另一位租戶江太，表明不會購買，「寧願擺喺屋企好過啦，連單車位都賣就真係奇怪啲囉，3萬蚊真係好搞笑。」江太指即使屋苑內的單車位亦曾發生盜竊事件，認為拆售後會更難管理。
無擁有單車的新寶城居民李先生指，以3萬元出售單車位不合理、價格過高，「我諗3萬蚊都應該賣唔出掛，唔合理。本身單車嘅價錢都唔係好貴，但如過佢將個單車位賣到咁貴嘅話，咁樣搞到好似買單車都唔抵咁囉！」他認為擁有單車的人已經不多，事件會令人購買單車的意欲更低。
法團主席：3萬元不誇張 倡必須租予住戶
新寶城業主立案法團主席李國培表示，恒基一直以月租40元出租單車位，原定每半年續租一次，今年7月起突然加租至每月80元，並改為每3個月續租，但在法團反對下減至月租60元。雖然已經降低加幅，但已經令不少單車位租戶退租，當中包括李主席本人。
李國培認為以3萬元出售車位並不誇張，「如果佢逐個拆售出去，佢要做分契㗎喎，因為佢以前未賣過吖嘛，佢要將啲法律文件逐份影印，嗰個律師成本都要萬幾蚊㗎喇。」
他指有部分業主希望自己擁有單車位，現時是時機，「3萬蚊要自己去衡量個價值，佢哋有啲人想買㗎喎。」不過他強調法團有一條底線不能超越，單車位只能租予新寶城住戶，「唔可以俾街外人用我哋呢啲車位，令到嗰個（私人屋苑環境）雜咗啊。」
