租金3萬變14萬　街市加租加到離晒譜　建華逼走小商戶

慈雲山中心內的街市近月由兩層變一層，不單止令菜價飊升一倍，令街坊捱貴菜 ；街市裝修後將改由負評多多的承包商建華集團管理，租金立即以幾何級數上升。「據我所知，下層好多原來的商戶都唔再跟建華續租，建華自己也有一批商戶，未來應該會租俾佢哋。」慈雲山建設力量成員岑宇軒說。

民主黨慈雲山社區主任張茂清指，以他們所知暫時得兩檔舊商戶會跟建華續租：「有燒臘店東主同我哋講，舊街市原先只收3萬蚊租，依家建華要收14萬蚊租，再加10萬蚊入場費。入場費即係支付寶和八達通等安裝費，還有街市DJ、 宣傳等雜費。」他指收費太貴，最後東主也惟有退休。

無奈退休的還有在街市經營雜貨店的鳳姐。「我原本個舖位百幾呎月租萬幾蚊，依家佢淨係收入場費都要十萬，嗰十萬仲無得攞番，唔通真係蝕住做？所以我連租約都無傾，就已經決定唔做。依家都無咩打算，希望政府起番個公營街市先有得做，無錢咪惟有攞綜援，哈哈哈。」鳳姐苦笑說。