拾荒婦黃月嫻哭訴搵工遭歧視 冀長者工作有尊嚴(附發言全文)

撰文:
最後更新日期:

立法會福利事務委員會今(2日)舉行公聽會,討論「檢視本港貧窮情況及訂立滅貧目標」的議題。會上年屆67歲的拾荒者黃月嫻,控訴遭受年齡歧視,「面試十份工無一份有人請。」議員要求羅致光回應黃婆婆的情況,羅只稱「佢可以搵勞工處協助就業」,黃婆婆聞言隨即在座位上痛哭。工黨張超雄批評羅的回應「冷酷無情」,質疑長者去找勞工處都不能解釋長者貧窮問題,「有幾多老人家好享受執紙皮?」羅再回應稱,年紀較大的長者可找僱員再培訓局轉介工作,希望長者不要介意向外界求助。

以下全文轉載黃月嫻向立法會遞交的發言稿。

主席你好,我叫黃月嫻,今年67歲,係一位拾荒者,同時都有參與「拾平台」為拾荒者爭取權益嘅工作。

我想從自己嘅遭遇嚟話畀啲政府聽,長者出嚟搵嘢做有幾困難,我哋老人家面對貧窮有時係好被動同埋無奈,社會支唔支持長者係好重要嘅。

我係一位已退休嘅低級公務員,每月攞得3,000蚊嘅退休金同攞綜援係差唔多,一個人住喺公屋,交咗租同埋其他生活雜費之後,剩番嘅根本係要好慳好慳先至可以生存到,𠵱家喺香港生活水平咁高,如果我哋唔出嚟做嘢,根本係好難喺呢到生活。

喺幾年前開始,我已經開始嘗試搵嘢做,我唔係唔想搵,亦唔係唔想做,只係個社會對待我哋唔係咁友善,你哋又話鼓勵長者就業,咁究竟做咗啲咩幫到我哋呢?我試過搵好多份工都食白果啊!

1)我試過打電話想去見兩份診所清潔嘅工,都冇咗音訊。

2)又去過見鐘點工人,份工又要湊放學又要送飯要煮飯,但個工資係好低好平好剝削擺明係恰我哋老人家睇唔起我哋。

3)見過快餐店做侍應,嗰一次我仲記得同另外一個後生啲嘅女人應徵,我都想問個經理叫佢畀份表我填,問佢可唔可以請我,跟住佢攞咗份表嚟畀咗嗰個女仔,對住我就一笑置之,唔理我行咗去,我喺到諗「使唔使咁呀!唔通我真係咁唔適合做嘢咩?」跟住我朋友同我講:「唔通佢會話畀你聽佢哋有年齡歧視咩!」

好多工都只係等電話冇回覆嘅,若果考咗個保安牌就真係會請我咩?有啲老人家,好似我哋咁,本身又有長期病患嘅,身型又矮可能有啲仲有少少陀背嘅,其實啲僱主係會有選擇㗎,唔係咁易請。

好啦,政府又話有啲做社會服務嘅工作,但係開嘅位都唔夠我哋去做啦。就算有培訓咁又點呢?始終太多基層嘅長者啦,根本職位都唔夠供應。

我想建議政府不如諗下,好好規劃長者就業嘅措施啦,畀多啲唔同工種嘅選擇我哋,同啲僱主講清楚,唔好年齡歧視。就算係粗重工作,都試下幫我哋改善下工作環境,友善啲、安全啲,可以令一班長者有尊嚴去做嘢。

𠵱家我哋淨係來來去去都只係可以做洗碗啊、清潔工啊、執紙皮啊呢啲工,一個老人家去做好辛苦㗎,我哋根本冇得選擇啊。阿局長你試下做下吖,又唔見你哋去做,點解淨係要啲基層長者去做呢?

我哋可唔可以有更多嘅選擇呢?又或者你想減低長者貧窮率,除咗係叫我哋做嘢,又可唔可以喺社會福利方面去諗呢?例如社區支援、整體嘅醫療系統支援、全民退休保障,係所有長者嘅權利,有基本嘅生活工資,收入好啲等等。

我哋喺香港做咗嘢四五十年,已經好攰,可唔可以令我哋過得有尊嚴,舒適啲嘅晚年生活,畀我哋呢班老人家呢?



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。