「亞視一姐」薛影儀疑無戴口罩被狙擊 三度起飛腳踢拍片者|有片

撰文:鄧海興 劉定安
出版:更新:

去年因參選亞姐而知名度大增的「亞視一姐」薛影儀,疑因無戴口罩被元朗朗屏邨一名街坊拍片「狙擊」逾3分鐘,相關片段昨晚(10日)於網上瘋傳。片中可見,薛影儀未有戴上口罩,僅用手按着口罩及嘴部,被窮追猛打下,她全程「敗走」衝入升降機,後因被阻擋𨋢門,結果出手又動腿,最少3次「起飛腳」踢向拍片者,擾攘一輪才正確戴回口罩;片末則可見有警員到場。

相關片段長約3分16秒,一開始可聽見拍片女街坊高呼:「亞視一姐吖嘛!薛影儀!唔戴口罩吖嘛!我話過撞到妳實影妳㗎!」當時薛影儀身處一大廈大堂,未有戴上口罩,僅用手按着口罩及嘴部,她被「狙擊」下即拍打鏡頭,隨即急步離開大廈,穿路過道往邨內其他地方奔走。女街坊啣尾窮追,沿途頻呼:「朗屏邨薛影儀唔戴口罩呀!」又質問阿儀:「大X晒呀?」、「使乜咁驚呀?」

薛影儀被窮追猛打,由急步變為狂奔,全程「敗走」。最終她跑入另一幢大廈,並衝入升降機內,惟女街坊緊隨其後,擋住𨋢門。阿儀走投無路下,一度出手推撞拍片女街坊,又最少3次「起飛腳」,並向大廈保安員稱:「佢阻住我唔畀我走呀!」此時已驚動多名街坊圍觀,有人亦着她戴回口罩,其後阿儀走入另一部剛巧有一名女住客乘搭的升降機,對方見兩人糾纏,立即嚇至走出𨋢外。最後阿儀終在𨋢內戴回口罩。及至片末,可見有軍裝警員到場了解。

據了解,阿儀居於元朗朗屏邨,事發於去年9月,故片中阿儀仍身穿中袖衫及短褲,但未知片段為何突然流出。而「亞視一姐」被狙擊的片段,引起網民熱議,有人認為女街坊行為過激,「呢個女人(拍片者)又同阿儀有咩咁十冤九仇?」但大部分人均認為阿儀應該要戴好口罩,「唔帶口罩害人害己!」、「如果亞視一姐中招;全幢樓啲街坊真係多得佢唔少‥‥‥」