【每逢大事講故事】那些年　特朗普同克林頓夫婦都好Friend……

呢排唔知大家有無同飛雲一樣，夜麻麻煲番大台重播嘅神劇《創世紀》？呢種朋友為咗錢反目成仇，爭個你死我活嘅橋段，老套又離譜到你邊睇邉鬧，不過人性嘅嘢，現實中都有人辦啦。你睇下美國今屆總統大選就知啦，克林頓夫婦同特朗普其實都有friend過㗎。喂，你無聽錯呀，嗱嗱嗱有圖有真相㗎，你睇佢哋笑得幾開心？

時光倒流11年，佢哋都曾經開心過，呢張相就係特朗普2005年擺酒娶特朗太（第三任）嗰日影㗎，呢位地產大亨唔只請咗克林頓兩夫婦，仲覺得有呢對前總統伉儷賞面嚟飲，簡直與有榮焉添呀，即刻叫埋老婆嚟迎賓先。世事嘅嘢你點估到？11年後特朗普同希拉里居然爭做總統，仲要鬧到反晒豬肚，句句人身攻擊咁。

學阿彪呢句至理明言，我諗阿Bill都好同意。

呢段情，其實點只11年前……90年代克林頓做總統嗰陣，佢兩公婆早就認識作為紐約地產商嘅特朗普，白宮嘅聖誕派對賓客名單上，特朗普一家都榜上有名，當日係第一夫人嘅希拉里，見到特朗普同兩位囝囝都有影相留念。影呢幅相嘅攝影師Sarah Merians就話，當日係特朗普要求同第一夫人集郵嘅。你睇特朗普笑得幾咁腼腆？希拉里幾咁青澀？佢事後仲好恭敬咁讚希拉里：「第一夫人是位很棒的女性，她處理壓力出奇地佳。」

當年，克林頓爆出同萊溫斯基嘅性醜聞後，人人都叫佢落台，世人都唾棄佢，但特朗普嗰下就挺身為克林頓講好說話，話克林頓先係「受害者」，仲喺一個訪問中，話「老屈」克林頓性侵嗰啲女人「簡直係我見過最唔吸引嘅女人」，除非好似Supermodel咁索先講啦。

講到呢度，有無發覺好奇怪先？早嗰排特朗普咪搵晒呢班女人行出黎，喺第二場大選辯論坐正正喺度囉！呢啲真正係今天的我，打倒昨天的我囉。

不過，故事只係啱啱開始。一切要喺克林頓結束總統任期講起（2000年之後）。阿Bill因為性醜聞同特赦里奇的爭議，個朵已經臭晒。兩夫婦由華盛頓搬去紐約重新發展，希拉里亦初次以自己嘅身分涉足政壇，參選紐約州參議員。政商界好現實嘅，嗰時人人都怕咗同克林頓行得太近，連四個高爾夫球會，都唔肯侵佢玩。連特朗普都講咗句「一個前總統竟然要求人先入到會，真係難以置信」。

初嚟報到嘅克林頓夫婦，Bill一方面要改善形象，密密去大學演講，宣傳自己嘅政績，兩夫婦另一方面又四圍認識華爾街新貴，為基金會籌錢。同時，特朗普嘅生意王國亦漸漸擴大，仲開始上埋電視主持真人騷《飛黃騰達》。

喺紐約上流圈，特朗普出名唔受歡迎，唔會好似彭博咁發財立品，搞公益，搞慈善，但又要扮到好似人哋咁有錢。（喂，彭博副身家大拿拿419億美元，多佢十倍都唔止。）或者特朗普嗰下先發現朋友係好重要，克林頓都同佢幾啱channel吖，鹹鹹濕濕咁。聰明嘅特朗普好快就知道要同克林頓玩，可以從打golf入手喎。

「為咗你　我拆左個golf場再起過都在所不辭」

特朗普將一個喺90年代後期買入嘅高爾夫球場，喺1999年拆掉再建，2002年重開，呢個「特朗普國家高爾夫球會」正正喺克林頓屋企大約10公里外，特朗普可以同佢一邊打波一邊傾生意，克林頓喺golf場仲有個私人locker添（唔知兩個有冇係度講locker-room talk呢……掩面），簡直係貴賓式待遇。唔只打golf，特朗普真係當正克林頓夫婦係女咁追，捐過10萬美元畀克林頓基金會。上集飛雲都同大家講過，佢地兩位千金都好老友。

相關文章：【每逢大事講故事】美國大選A餐定B餐　第一千金你點揀？

嗰個笑到烚熟咁嘅邊個黎架？唔係睇相，飛雲都唔相信自己對眼呀。

又甚至再近期啲，希拉里喺2008年第一次選總統，特朗普依然好撐佢，第二任特朗太當時仲話：「我好享受同希拉里一齊嘅時光，她好清晰，好專注。我地嘅聲音都一定可以清楚聽見。」不過，紐約名流圈內都好少見到特朗普夫婦同希克林頓夫婦同場出現，即使去呢啲場合，通常係為公事。

如果真正嘅友情係經得起考驗，特朗普同克林頓婦夫嘅友情可謂從來沒發生。有人甚至話克林頓夫婦肯出席特朗普呢啲咁土豪嘅婚禮，都係因為咁啱得閒，又或者希拉里以為特朗普有做佢水魚嘅潛質，先安排時間去飲。而希拉里本人就咁講嘅……

希拉里上年仲好得戚咁話，去飲無送禮畀特朗普夫婦喎。大佬，公價八嚿都唔畀……飛雲唯有講句——