【Work life balance】熱愛工作你都唔係鐵人 放自己一個短假期

撰文:StealJobs.com
出版:更新:

成日話成功需苦幹(父幹呢個話題就唔好提啦),每個年代都有「過得好」同「過得唔好」的人,所謂 “The haves” 同埋 “The Have-nots” 的差異,並唔係今日先存在,雖然呢個兩極分化係嚴重咗唔少。但同樣地,呢個年代都一樣有一班人食準呢個年代獨有的機會,成功踏上「社會階梯」(Social ladder)力爭上游,好似好多搞App的後生仔女,同埋各行各業的Top Performers。

圍內朋友講過,勤奮加上過目不忘的本領,呢位朋友可能係全香港最熟巴菲特多年來一舉一動的人。(VCG)

不過今次唔係講奮鬥,而係講奮鬥時必須有的「Downtime」。

SJ認識一位後生仔朋友,做金融年紀輕輕已經成功轉做Fund,30歲前收入已經七位數字,有人話係好運「泊到好碼頭」跟到個伯樂老闆,但據說其工作態度同努力程度,確實已經係同齡人,甚至所有在職人口的Top 1%。

此君正常日子Office Hour朝8晚8不在話下,放工後亦花大量時間研究環球市況,各行各業各公司的業績,以及任何有用的經濟金融知識。圍內朋友講過,勤奮加上過目不忘的本領,呢位朋友可能係全香港最熟巴菲特多年來一舉一動的人。

即便如此,呢位朋友卻對自身理財以及時間管理,嚴格到接近不合理的程度,或者佢真係太熱愛自己的事業,幾年來除咗過年,基本上都冇真正放假,就算去旅行都會同投資扯上關係,點都會安排下睇樓或者參觀公司之類的行程。大部分收入用作私人投資,股票債券外國樓Bitcoin乜都有,而冇咩消費。

聽佢投訴呢類小毛病,已經最少幾個月。(VCG)

雖然熱愛工作,但始終唔係鐵人,聽說其近半年開始經歷身體問題同埋情緒起伏,神經系統有小毛病,雖慶幸稱不上疾病,但一些莫名症狀已經夠煩擾,而且經常發一些非常激烈的夢,雖然唔係噩夢,但係好多夢境似乎係同工作壓力有關,離不開被人追拔足狂奔,或者係好Specific的職場解難處境,例如趕Deadline之類。聽佢投訴呢類小毛病,已經最少幾個月。

然而,最近長週末結束,街頭偶遇呢位朋友,並坐低飲杯咖啡,佢竟然表示去完個Trip返來,身心好耐冇咁放鬆,放假幾日完全冇之前的神經系統症狀,晚晚瞓得好。

原來佢同幾個相識微時的中學朋友去台灣,仲好熱血咁租架車半環島遊。呢幾個中學時期的好朋友雖然並唔係咩才俊金融之類(當然都唔差),但幾個好朋友從在台北的夜市嘻嘻哈哈,到國家公園沿途睇到一望無際的太平洋的路程,總係有着無盡的話題同歡笑。

中途仲發生小插曲:有架車在行車疏落的高速公路死火,在未知對方身分情況下,朋友幾個人決定主動停車幫手,其中一個熟悉汽車工程的朋友幫手用「過江龍」駁電(雖然唔成功),但最終對方一家人仲請埋佢地去地道的餐館食飯,了解了不少風土人情。可謂旅行難得的體驗,真係咩旅遊網站用錢都買唔到的體驗。

呢位朋友話,過去呢幾日,可謂自己頻臨Breakdown前,過了一個Much needed的短假期,起碼延遲的Burnout的時間。而且,在假期中,佢仲話對自己事業有了新睇法,想通了一些之前的難題,可能對其事業發展有根本的改善咁話。

幾個好朋友從在台北的夜市嘻嘻哈哈,到國家公園沿途睇到一望無際的太平洋的路程,總係有著無盡的話題同歡笑。(VCG)

大佬,你係咪幫台灣旅遊局賣廣告?

咁就當然唔係,但點都好,同佢呢番對話同埋觀察其精神狀態,SJ都想同大家分享幾個Point:

1. 朋友,同酒一樣,有時係舊的好。當然,好似啤酒咁多泡沫就放唔得耐,但紅酒烈酒就越老越甘醇,只要保存得宜的話。然而,有時即使係上乘紅酒,放得耐亦可能會變壞變淡,呢個無可預期,只能珍惜你依然有的好酒。

2. 旅行,可以令人忘憂,更好的旅行,可以令人解憂。

3. 人生,唔可以逼得太緊。好似古巨基首歌詞 「夢中也習慣,有壓力要我得志……」及「人人在發奮 想起他朝都興奮……」每個Waking Moment都為「奮鬥」而努力很好,很上進,但記住給自己一點Downtime,一點休息時間,健康係最大財富,其次先係你的Networth與收入。

4. 當然,呢個道理可能只適用於1%的人,我們大部分人的問題來源,唔係太努力,而係太唔努力。

2018踏入 Q3,祝願大家都找到屬於自己的 Work-life balance,傾斜一邊難以避免,但盡量盡量平衡一點,活在當下吧。

【原文轉載自StealJobs.com。StealJobs全面透露各行各業人工,工時,晉升前景,以及入行攻略,歡迎匿名提供收入資料。】