【同學聚會】同學做護士從此變粗魯 因為佢日日玩緊Overcooked…

撰文:
最後更新日期:

假如你有幸從小到大身體健康,無乜機會同醫護界打交道,始終有一個機會,會接觸到護士朋友。

無錯,就係舊同學聚會。

舊同學聚會中,以職業Define每個人的身分,已經係人生的一個必然,正如古代歐洲人的姓氏就係佢地的職業一樣,例如姓Smith的本身遠古時家族多做鐵匠。

呢度講的香港護士,正正係講絕大部分於公立醫院工作的護士(余俊亮攝)

但在各種真心聚舊/假意曬命以外,你會留意到唯獨是做護士的那1-2位女同學,多年過去,性格變得「巴渣」,冇耐性,一言不合,就在一大張枱直接批評某在場的同學「你都XXX」,然後下刪300字批評對方。

呢個時候你心底裡會問:「護士唔係應該好善解人意咩?點解咁粗魯㗎?」

其實,香港護士粗魯,由來已久,而且係有Proper reasons。

首先,呢度講嘅香港護士,正正係講絕大部分於公立醫院工作的護士,在私家醫院做護士會好一點,雖然都只係表面上。至於在私人診所、牙醫診所、獸醫診所等工作的護士或姑娘,以及在中醫、跌打館等工作的阿姐則不在此列。

大家要明白,在醫院工作,係一個點樣嘅概念。

根據SJ觀察,在芸芸政府工裡面,先唔講人工高低,最唔冗的一個工種,大概正正係護士。

當消防員辦公時間打排球Training,警察在差館食蛋撻時(當然,紀律部隊有其艱辛及危險之處,但普遍點都有清閒時間),以及無數在各部門的助理打Candy Crush時,護士從一踏入醫院到離開醫院的一個Shift,可謂無時無刻都在高強度工作。

從近10年左右直到最近一兩年,公立醫院爆滿程度同樓價一樣,去到危險水平(盧翊銘攝)

在如此高壓工作環境下,護士要同醫生/物理治療師/病人/病人家屬等周旋,本身要練就一身極高效率的好武功,講嘢無廢話,見到有錯立即指正,唔得閒慢慢同你禮貌地講解。畢竟,一人照顧20個病人唔係講玩,壓力就好似打《Overcooked》最高難度嘅關卡一樣,唔容許慢慢思考,必須極速處理工作及經常發生的突發情況。

然後再加上輪更呢回事。未返過Shift的人唔會明白箇中苦處,尤其護士更表,係每日轉更所謂 APN (早更、中更、夜更),而非紀律部隊每星期轉更。 每日轉更係一個點的概念?大概係挑戰人類生理時鐘的底線,對身體的挑戰大概僅僅低於戰場前線士兵。

大概係挑戰人類生理時鐘的底線,對身體的挑戰大概僅僅低於戰場前線士兵。(Gettyimages/視覺中國)

在這種工作環境下,其實難怪護士看起來「粗魯」,更準確可能係話佢地習慣分秒必爭,工作必須直接了當。而且,長期瞓唔夠,人確實會比較容易動怒。

所以,下次見到好巴渣的護士舊同學,學會體諒他們的苦況吧!

SJ結語

老老實實,香港的醫護政策(一如大部分政策)真係亂曬籠。在如此艱難環境下,護士團隊依然緊守崗位(係窮啊……),分秒必爭救人醫人,值得致敬。

【原文轉載自StealJobs.com。StealJobs全面透露各行各業人工,工時,晉升前景,以及入行攻略,歡迎匿名提供收入資料。】



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。