無電啦,你有冇充電寶寶?!│Sci Papa

撰文:
最後更新日期:

電話只係50%電量時,大家都會開始警覺,擔心電話無電時,會與世隔絕;但我哋反而很少在意自己嘅電量夠唔夠,唔單止係少留意自己有冇充夠電,甚至無電時都會繼續死撐。

每個爸媽都想花多點時間陪伴子女。

典型香港打工仔,朝9晚7返到屋企差不多8點,仲要講緊係無OT嘅情況!(筆者都唔明點解,做到7點已經不被認為係OT)。最慘,為咗慳番啲住屋費用,不少人屋企同公司嘅距離,係要用上成個鐘去搭交通工具,差不多可以飛到去台灣!而呢一個鐘一啲都唔輕鬆,可能要轉車,又可能要坐只得一個階磚企嘅港鐵,這份精神壓力,唔好諗自己可以放工就叉下電,唔再耗電都已經偷笑。

當返到屋企,電量都已去到紅色警戒線,但那個屬於自己人生最大,至少要跟進19年的一個project都係要做㗎!同女兒食飯、做功課、洗澡、講故事、陪睡等,仲時刻刻都要集中及記著要有同理心等等,耗電量比工作有過之而無不及。

然後,直到10點,女兒都安睡了,自己電量已剩餘無幾,花了最後的力氣去到浴室洗個澡,享受那只得自己在一個小空間的寧靜,這個小小的充電時間,令自己能在睡前處理埋家中的瑣碎事、及明天工作的預備。

看到寶寶熟睡的樣子,一切辛苦都頓覺甜美。

子夜到來,電又再次用完,接下來就是黃金充電時間,但又唔想閉起雙眼就咁瞓咗個黃金時間,反而hea活一會感覺更舒服,終於hea到雙眼不受控合埋左就開唔番,就係真正充電時間開始。不過,好像睡著了才一陣子,鬧鐘忽然就響起,雙眼還未來得及張開,雙手已急不及待在亂摸,希望撳熄個鬧鐘,誰知鬧鐘愈撳愈響得大聲,最後醒過來才發現鬧鐘原來係自己個女,反反覆覆無限輪迴了一個晚上,電才充了一半,真·鬧鐘真的響起,又係時間起身返工了。

出門口前,望一望個女,見到佢熟睡得像一隻小豬,心諗:「算啦,幾辛苦都值得嘅!」發現原來囡囡就是自己的充電寶寶,把大門關上,深呼吸一口氣,變身成超級香港人,充滿電來迎接這一天,直至收到老細的第一個奪命追魂call⋯⋯



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。