想要Creative Idea?給多點時間吧!│Sci Papa

撰文:
最後更新日期:

「你可唔可以做快啲?」

「你可唔可以做多啲?」

「你咁做咪得囉,諗咁耐真係嘥時間!」

呢啲對白,可能係你腦細嘅口頭禪,亦有可能係父母們不經意嘅對白;因為喺香港,差唔多樣樣嘢都講求「速度」同「份量」,用最短嘅時間做最多嘅嘢,先會被人認為有效率。所以作為香港人,做事都好容易以效率行先。

明㗎,香港人,秒秒鐘都幾百萬上落,正所謂執輸行頭慘過敗家。但當「快」或「多」成為終極嘅目標時,仲邊有時間去搵新靈感創造新意念?!

一個倫敦大學瑪麗皇后學院嘅研究發現,人嘅大腦其中一個運作方法就係:

要有創新意念,必先壓抑守舊思想。

睇落去好似老生常談,但做落原來都幾神奇。事實上,人嘅大腦係會不其然咁喺嗰記憶寶庫入面,尋找一些舊有嘅知識及資訊,目的?就係為咗用一啲過往嘅經驗來處理當前的問題。但正正係我哋都太依賴以往嘅經驗,喺未嘗試搵新方法時,已被自己說服用舊有嘅方法解決。

VCG圖片

我哋嘅大腦其實有嗰機制,去抑制呢啲用舊方案去解決問題嘅想法,亦只有將呢啲想法抑制,先可以開始去創造新方案。

「腦細」只求快,下屬當然唔會嘥時間去諗,盡快做好交功課完成使命。教小朋友其實都係一樣,如果將佢哋完成任務嘅重點放喺速度同數量上,咁佢哋只有疲於奔命達成父母要求,仲邊有時間用嗰腦去處理新資訊同諗新意念?最後只會放棄創新,走上一條「完成到任務就好」嘅路!試問成日好似俾人趕羊咁生活,仲邊有時間同心情去諗新嘢呢?

要有創意?俾足夠時間你嘅下屬,俾足夠時間你嘅仔女啦!

參考資料:https://www.sciencedaily.com/releases/2018/12/181210150622.htm

 

Sci Papa (專頁:Scientific Papa

喜歡科學,但更喜歡老婆跟女兒。覺得科研跟「湊女」都是要有極度的耐性,不怕失敗,還要懂得自我反思後用不同方法再嘗試!將育兒及科學融合,期望伴著女兒走一條快樂的成長路。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。