僱主曬圖分享外傭精湛廚藝 食過一次即可還原盆菜包辦團年開年飯
在第五波疫情下，今個農曆新年由團年至開年飯，大多數家庭都會選擇留在家中自己下廚製作，如果請到一個廚藝精湛，可以煮得一手好菜的外傭姐姐，的確可以幫輕僱主。有多名僱主集體在網上社交平台分享，家中姐姐在新年期間，一手包辦團年飯到開年飯，每款菜式均色香味俱全，複雜如盆菜、工序繁複如芋蝦、刁鑽的燒腩仔、甚至看似簡單的馬蹄糕，外傭姐姐們都落足心機製作得到。
(所有照片由受訪者授權刊登)
有僱主呂小姐向記者分享與外傭的相處日常，表示其印尼姐姐已差不多來了10年，「有時會俾YouTube 佢睇住參考，佢都好醒目，年廿九我自己訂左個盆菜返來，佢就話佢都可以整到，所以初二初三俾佢試整，所以今年佢第一次整盆菜。盆菜是第一次整，以往都係煮其他餸，每逢新年佢都煮10幾個餸。」
小狗蛋糕都整到
呂小姐的外傭除了煮得一手令大人小朋友喜愛的餸菜，連小狗的食物也製作精美。「佢連屋企狗狗生日都會自家制蛋糕，試過我訂蛋糕比家中的狗狗慶生，佢話狗狗都食唔哂，不如佢自己整。」可惜的是，呂小姐指外傭姐姐今年要返印尼，因為鄉下的家人認為她是時候退休。
還原傳統心機賀年「芋蝦」
另一位僱主發文感恩其印傭姐姐一手包辦團年飯，「11年來都係佢攪掂晒，非常感恩今日仲整咗芋蝦，要好好心機整。」她分享與姐姐相處日常，「我們已度過11年的生日，每年都會送禮物與利是，也會一齊出街慶祝，姐姐有好多優點， 好錫阿女，煮野食又叻，當然有時都比佢激嬲，但就像一家一樣，互相包容才能融入家中。」
姐姐:你買咩我就煮咩
另一僱主葉小姐，坦言自己的外傭姐姐是網上聘請的，當初沒想過會遇到好幫手，「初初都諗住請到個姐姐肯湊初生已經好好，點知請咗個好好，感恩係呢個時候，都俾我請到個好好既本地姐姐，in佢時問佢識煮咩，佢淨係話你買咩佢就煮咩，點知樣樣教一次就識，仲要識整我至愛既韓國Kimbap，又錫我仔仔，次次放假買玩具佢俾，放假都會爭做家務，真係好開心。」
$100煮出四餸一湯
今日初四，葉小姐的外傭更用$100買餸錢煮出四餸一湯，她笑說:「今餐真係好離譜，要佢去街市買餸煮飯，已經冇話飲湯，我地食完4餸，佢就筆左碗湯出黎，我問佢買左幾多錢餸，佢話$100蚊，我問佢$100有埋個咁正既湯飲，你點買餸，佢話佢會格價囉，我初初仲預姐姐會打斧頭，而家，我要好好請教下佢點買餸...」
🔼🔼🔼想知一般派幾錢利是比姐姐?即睇👉🏻👉🏻👉🏻農曆新年｜新年封幾錢利是比外傭？專家話你知疫情下市價係...👈🏻👈🏻👈🏻🔼🔼🔼
即睇其他外傭今個新春自製的美食:
醬汁都是自家製
僱主馮小姐的菲傭一直廚藝了得，就連燒腩仔、甚至家中醬汁都是自家製。「姐姐越來越鍾意食蒜頭，同姐姐一齊豆豉辣椒醬，再整多個牛肉辣椒醬，餸飯，撈麵都最正！」
🔼🔼🔼想知農曆新年姐姐有幾日假?即睇👉🏻👉🏻👉🏻外傭假期│2022年起外傭新增1日佛誕假期 全年可享有13日法定假期👈🏻👈🏻👈🏻🔼🔼🔼