【有片·跳出嚟】Freelance 平面設計師新手建議:如何開價?

撰文:盧君朗
出版:更新:

為咗有自由嘅生活同時間,愈來愈多年青人選擇唔返正職,自己接Freelance搵錢。但好多人都唔知點起步,一開始經常都會諗點同客戶溝通、點傾價錢、點令客源突破親朋好友介紹等等問題。有5,6年Freelance經驗嘅設計師Roger在片中就有一啲經驗分享。

而關於開價與被開價,就有以下粗略的法則備忘啦:

1)Free Pitching:就係唔同公司或者Freelancer之間投標競爭。過程要度橋、寫計劃書,甚至做Sample。最後客戶選中就有得做有錢分、唔中就前功盡廢,1蚊都冇。其實外國都有用Pitching嘅方式,但通常都會有一筆錢比競爭者,即使最後冇畀人揀中都會有錢落袋,當然揀得中就可以再同客戶傾會再畀幾多錢去做啦。(香港行規就係「免費奴工」)

2)做唔同嘢嘅價錢,其實都冇得講到好實,做Freelance可以話冇公價,所以有時根本就唔知點樣同客傾。一方面驚收得太低,開高啲又怕冇人搵你做。我哋喺網上搵過人報價,整理咗幾個大約價目出嚟,雖然只係參考性質,但希望都有少少幫助。

2a)做200頁,A5大小嘅小說,負責排版同封面設計,大約係7000到10000起步。頁數、圖片數量、客戶要求等等因素都會影響價錢。

2b)做活動嘅美術設計,最基本就要做Logo、活動海報、傳單、Backdrop、網站乃至舞台等等項目。價錢約10000到20000起,亦都係因應唔同項目數量變動。有部份設計師,接咗個活動返嚟做,自己設計完Logo、定好大約美學風格、方向之後,會將細項判畀其他人做,自己收少啲錢,又做少啲;亦可以選擇一腳踢做晒。

2c)當然,上面嘅價錢除咗會受唔同項目影響,客戶係政府機構定私營、設計師經驗同知名度、交貨日期急唔急等等都會令價錢有好大落差,所以都再強調,上面價格只能做參考,喺同客人溝通過程中,都要靈活變通。