【Emoji 大冒險 ‧ 影評】外形變得立體 但內容比手機上更平面
撰文：許育民
出版：更新：
做創作，簡單如寫篇文，想多人睇同多人Share，不計做標題黨，離不開你要有獨特的論點，或者能引起大家共鳴的見解。
創作一套電影，共鳴感就尤其重要，從生活取材往往是導演們教導新人的定律。以日日用秒秒用的emoji 做電影主角，正附合晒這個要求，但奈何觀賞過程就是未感暢快呢？
幾粒Emoji是可愛的，不過就只剩下可愛。
電影以每粒emoji 做主角，見到每粒本身2D設計的icon仔，變得識行識走又識講嘢，是過癮的，再者戲內又不時嘲笑人類個個甘做低頭族，真人世界零交流，沉醉於呃like之中的對白，又正好是從生活取材的元素。
故事講因為一次出錯，引來手機主人想去Format 部機，於是幾粒Emoji 就要趕快解決問題，免得一日冚包散。解決過程是幾位要在手機中遊走，將5、6吋大的手機虛擬世界實體化，主角既要避開木馬程式追捕，又要尋找問題根源，是一次冒險之旅，然後每個舉動都正在影響機主的現實生活⋯⋯說着說着，這不正是《玩轉腦朋友》的故事嗎？
港式配音，令便便的笑位最多。
當然，似還似，你大可以做到青出於藍，不過幾粒角色的描寫似乎又只限於吃喝玩樂，嘻嘻哈哈，輕輕鬆鬆看套戲是可以的。礙於主角是Emoji ，故事發展極都不能倒自己米，叫大家不要用手機，向愛人表白仲撳撳撳？兜口兜面講句我愛你啦！所以情節再似《玩轉腦朋友》，但整套戲的發展就流於平面，未能跟手機主人帶出互動，甚至改變他的行徑等等，似是各自發展，去到最後連繫在一起就完。
全片就是滯留於手機事手機解決的層面，令故事未能提升。而現實世界中，各人正呼籲大家︰「請放低你部手機！」縱使做到的人少，但追捧這說法的人多的是，況且故事起初都在笑大家篤篤篤，但最後原來都係笑下抽下水就算，這顯得有點尷尬。不過好難怪編劇們，這是根本問題，改不了，注定嘻嘻哈哈睇完90分鐘就完，同你send出一個Emoji的作用差不多。