【出貓特攻隊.影評】主角超蓮根本係叮噹 圓滿那些年作弊幻想

撰文:陳運濬
出版:更新:

《出貓特攻隊》預告片一出已經人人爭住話要睇,跟住紅到美國影評網站都給予極高評價,再去到台灣上映直頭破泰片最高票房紀錄,連串話題令人對《出》片有極大期望,睇完之後…就會明白這些好評是甚麽一回事。作弊無分國界,《出》就是圓滿所有人那些年讀書時的出貓幻想,一邊看,一邊覺得似睇住真人版《叮噹》。
注意:點都有啲劇透

電影足足兩小時有多,但情節緊湊,睇完都唔覺過咗兩個鐘,單是這場澳洲地鐵監考官捉出貓學生,都拍得充滿荷里活犯罪片感覺。

即使你是個幾乖的學生都好,別跟我說你無幻想過出貓,先不談論《出》片演員演技、導演技巧,電影最成功的地方,是將我們那些年對出貓的幻想全都拍出來,更將它誇張十倍。女主角超蓮似足叮噹,他的天資就是百寶袋,另一女主角明詩,個樣似靜宜,性格係大雄,考試分數不達標,渴求不勞而獲,又自怨自艾話自己天資低,超蓮第一次出貓畀明詩,就似叮噹最初純綷為友誼一樣,不過故事發展並無如卡通片般,出現叮噹苦口婆心勸誡大雄努力讀書,反而殺出造型同牙擦仔有三分似的富二代柏豪,他用錢引誘超蓮幫自己出貓,超蓮即刻從百寶袋拎出記憶面包...唔係,係琴指大法至啱,幫助一眾出得起錢嘅學子,生意後來仲愈做愈大。宣傳讚電影媲美《非常盜》,但筆者睇住大雄牙擦仔蛇鼠一窩,我只是想起邪惡版《叮噹》,就連一向乖仔的學生賓爺,最後都被超蓮拖埋落水,齊齊飛到澳洲考公開試幫人出貓。試幻想叮噹加出木杉呢個夢幻組合,考試點會有難度,成績點會無進步!電影最妙一環,就是看到賓爺成魔,筆者內心不奇然有種快感,似是滿足當年想睇住學霸的出木杉變壞,無錯,那些年看叮噹,真的不相信世上有如此完美的人。不過本人對結局稍為失望,見到超蓮最後良心發現,總覺得有點矯情造作,出貓最尾原來都係有報應,可能導演都孭住份道德包袱。

超蓮唔止叻在讀書,出貓一樣充滿天資,諗得出琴指畀貼士,效果同記憶面包有得揮。
明詩是超蓮第一個幫手出貓的人,她的角色外表似靜兒,實情性格似足大雄懦弱兼懶隋,考試多數不達標,最後超蓮念在朋友關係出手相救。
賓爺(左一)原本似足出木杉一樣,為人正直讀書又叻,從來都無諗過出貓,但因為現實問題被迫下海,最後踏上成魔之路。
柏豪(左一)跟牙擦仔外型氣質都有啲相似,同樣係有錢仔,同樣係不可一世,話說漫畫裡頭,牙擦仔都曾經利誘叮噹過檔。

電影將出貓拍到犯罪電影般刺激,大家當然看得入神,不過導演更想帶出是亞洲教育制度問題。亞洲絕大部份國家都是人口多,競爭大,學校鼓勵分數至上,無它嘅,分數容易分到高低,方便工作、地位分配,搞到學生要承受巨大壓力。教育的目的是希望培育下一代為國家貢獻,但電影最吊詭,是學生出貓的目標,竟是為了逃離自己國家出走美國升學,劇本這鋪排還真諷刺。

出貓搵到叮噹加出木杉幫手,考試無得輸﹗
超蓮愈出愈上癮,除了為錢為朋友更是想滿足自己勝利慾,那種犯規的快感。

宣傳將電影譽為泰國版《非常盜》,事實是它被《非》片還要出色,四位新演員演出到位,幕後技術如剪接、配樂的水準都非常高。而最令筆者驚喜,是《出》片中的植入廣告,一罐可樂加一個電話品牌,都在電影中發揮應有作用,比起內地品牌「亂咁嚟」的植入,絕對順眼得多。不過筆者認為技巧如何出色,電影最重要還是劇本,此乃近年華語片面對問題,縱有大投資,加專業幕後及稱職演員,但一戲之本始終令觀眾失望。一個月前上畫的《戀愛病發》加今套《出貓特攻隊》,引証泰國除了鬼片外,拿捏不同類型的劇本都寫得創意出色,令不少觀眾對泰片刮目相看,更有信心。眼見韓片早已爬過華語片頭,情況長此下去,泰國電影隨時有日超過都不足為奇。

出貓片都拍到好似《非常盜》、《盜海豪情》咁型,真是不得不讚導演創意。
+7
你可能感興趣