【使徒行者2】臥底前傳似《無間道II》 有冇可能集齊全套角色?

撰文:
最後更新日期:

《無間道》是香港臥底電影的經典,經典到電影自上畫以後,所有臥底都被叫做「無間道」。而第二集,就以角色的前傳做藍本,同大家補充番韓琛成魔之路,黃Sir養虎為患的來龍去脈。

《使徒行者》都係電視界臥底劇的皇牌,估唔到去到第二集,都係鎖定拍角色的前傳故事,睇了個幾星期,不難發現成套劇都充滿《無間道II》陣味,就連人物設定動機性格都好孖生咁。

陳豪要演一個黑社會大佬,沉實又冷靜,殺人唔眨眼,呢樣就同吳鎮宇飾演的倪永孝極似。

倪永孝一角心思細密,正正係做黑社會都要食腦嗰種格,殺人唔使用劍。

倪永孝VS魏德信  為老竇清理門戶

倪永孝在《無間道II》係社團第二代,老竇因為被暗殺,於是要臨時執政,不過就被四大頭馬質疑能力,拒絕交數,結果外表斯文的他,狠下毒手一下子將四大頭馬殺晒,清理門戶,然後正式上任。陳豪飾演的魏德信都係一樣,不過佢係嫌老竇太廢,索性勸退佢自己執政,而且坐正後行事一樣心狠手辣。手段似,角色性格似,就連兩位的演繹方法都似,又係戴個眼鏡以表高智慧,事事深藏不露,再殺更多人都係處之泰然,兩角的立體程度一致,唯一唔同就係把頭髮。

歡喜哥成日笑騎騎,典型笑面虎。同《無間道II》的韓琛同類,不過韓琛經歷完死老婆後性情大變,歡喜哥就仲keep到。

前傳的韓琛,仲好獎門人,但第一集的他,已經不苟言笑。

韓琛VS歡喜哥 老婆被殺泰國搵幫拖

韓琛同歡喜哥最似地方係大家本來都係社團的中堅,原本忠心耿耿,但就係被社團老大質疑,投不信任票,甚至想殺人滅口,然後被逼作反。當日韓琛女人Mary姐(劉嘉玲飾)想同黃Sir合作暗中推韓琛上去,但被倪永孝發現先下手為強,令韓琛要避走泰國然後搵幫手回港。又咁啱,歡喜哥都係處於呢種尷尬情況,本來安於做隻馬仔,甚至想返回警隊唔做臥底,但魏生銳意要剷除班老油條,於是殺死歡喜哥老婆(陳煒飾),呢下促使歡喜哥要作反,但佢同樣都係去泰國搵人幫手,完完全全係一場「琛」路歷程。

呢個《使徒》版傻強,其實唔扮好過扮。

有一廠黎明之稱的謝東閔,點估到最終係要扮杜汶澤。

傻強都有埋呢下先無敵

至於其他角色,其實都好大同小異,例如苗喬偉飾演的卓sir,同歡喜哥的關係,同黃Sir與韓琛在第二集的相處模式極似,未係對立面,仲有傾有講。而臥底方面,呢樣就冇跟到足,冇話周柏豪係陳永仁,定袁偉豪係劉健明。

不過最離譜係《無間道》的重點搞笑角色傻強(杜汶澤飾),去到《使徒行者2》都有得重現,負責的朋友叫謝東閔,閔大人。事緣佢係歡喜哥最低階的馬仔,當周柏豪話要跟歡喜哥時,就耍佢叫佢跟撻Q先(謝東閔飾),謝生的演繹手法,完全捕捉晒傻強的特質,最鍾意講無謂嘢,當傻強有個「識別臥底論」時,撻Q就有個「社團公關論」,「做黑社會都係公關,要笑!」至於笑唔笑得出,睇大家接受程度。

+2
+2
+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。