【午夜場】《鐵甲奇俠3》Tony Stark 與 Iron Man的內心掙扎
撰文：許育民
出版：更新：
一講《鐵甲奇俠》（Iron Man）你會諗起乜，除了高科技和有型外，最為人記得的就是Tony Stark的富可敵國，Iron Man對他來說，就似是一件玩具。
係咪有錢就冇煩惱呢？在《鐵甲奇俠3》內，Tony就面對自己的內心掙扎，到底係Iron Man成就自己？定係自己成就了Iron Man？冇了這套盔甲，自己又係咪甚麼都不是？
列隊式登場，呢幕真係睇到在戲院大叫出來。（影片截圖）
《鐵甲奇俠3》的情節，其實承接住《復仇者聯盟》第一集的故事發展，捱過一場與外星人決鬥的世紀戰役後，向來玩世不恭的Tony Stark竟然患上失眠同焦慮，然後獨困豪宅寄情研發更新版本的裝甲。其實呢集入面，歹角為國際恐怖組織首腦滿大人，不但接連發動恐怖襲擊，更慘係集中火力對準Tony間豪宅，令大宅毀於一旦不特止，所有裝甲都石沉大海。
漫畫中的Iron Man比較笨拙唔吸引，去到電影版立即High Tech晒，成為最受歡迎角色。
正所謂窮人有窮人的煩惱，有錢人都有自己的煩惱。呢集入面，Tony除了應付外敵，自己也有不少的內心掙扎，而心結就是在於︰「到底是我創造鐵甲奇俠；抑或鐵甲奇俠造就了我？」其實都已經係你自己設計啦，又有咩好煩呢？不過大家未有錢到呢個地步，又真係未必意會到。而講到有錢，呢集最破財的一幕，就是Tony壓軸大戰一場，遙控實驗室內所有Iron Man型號全體出動作戰，場面非常壯觀，而去到最後更索性當炸彈用，來個放煙花式爆破就更加係燦爛非常，真係每一粒花火都係錢。
有錢人的煩惱，你又點會明。（《鐵甲奇俠3》劇照）