【午夜場】《雷神奇俠2》如果買咗飛睇第3集 咁呢幕一定要重溫

撰文:許育民
出版:更新:

《雷神奇俠》來到第3集,要講佢好唔好睇,四個字︰脫胎換骨!
以前奄奄悶悶的神話角色,吸引力一般,打鬥場面係好睇,但略嫌太認真,唔似Iron Man咁輕輕鬆鬆又過關。不過第3集換上新導演,整個氣氛你可以話低能咗,小學雞咗,但又真係輕鬆咗、幽默咗,完全感受到神都係人的感覺。

洛基為救大佬,以身犯險捅Malekith一刀,結果自己都要捱番刀。(影片截圖)

今晚午夜場是講《雷神奇俠2︰黑夜世界》內最後一幕,洛基被黑暗魔兵領袖捅死。話說在《復仇者聯盟》中,作為邪神的洛基心術不正,想佔領地球,但及早被復仇者聯盟制止,最後被打到奄奄一息的洛基就交俾雷神帶返去阿嘉斯。雖然邪不能勝正,但邪性不能移,洛基的邪念時有發作,即使來到第3集,都一樣亦忠亦奸唔知佢邊句真心。

Malekith都唔笨,佢攬住洛基一齊死。(影片截圖)
洛基都輸唔晒,至少真係收拾到Malekith。(影片截圖)
最後死到化灰咁,當時都睇到人幾灰下。(影片截圖)

在《雷神奇俠2︰黑夜世界》,被帶返阿斯嘉的洛基依然深深不忿,不過呢集因為有強敵入侵,私事暫且放埋一邊。而入侵的正正係雷神老竇奧丁,5000年前收拾的黑暗精靈界國王Malekith,他竟然捲土重來,國難當前,洛基都識分輕重,呢集都有出手相助,同哎呀大佬拍住上。去到最後洛基更被Malekith捅死,雖然大家都記得因為戰事發生在另一宇宙關係,洛基最後係冇事的,不過細佬臨別一幕就夠晒動人,雷神喊晒口嗌到拆天想佢翻生都睇到人眼濕濕。

講咁耐,點解要大家入場睇第3集前要Remind返呢幕?事關今集其中一個情節會有所呼應,而且呼應得相當精彩入肉,萬一冇打呢個底,冇感覺冇印象的話,就真係會唔知睇咗啲乜。唔劇透咁多,入場你就知過癮。

七情上面的雷神,好悲壯。(影片截圖)