【寵物小精靈】死侍Ryan Reynolds演真人版 比卡超會變寸嘴? 

撰文:
最後更新日期:

比卡超真人版電影《名偵探比卡超》(Detective Pikachu),預計明年一月在倫敦開鏡。上月已公布男主角會由男星Justice Smith飾演,雖然電影公司一再強調這角色跟小智不同,所以不存在似唔似同失望的問題。至於真正主角比卡超,由於真人版係演大偵探,大把對白要講,唔再係一句︰「Pika Pika」包辦,所以電影公司堅持要搵粒星去配音,今日終於宣布落實由《死侍》(Deadpool)Ryan Reynolds擔任,事實上佢唔單止負責配音,仲會做埋面部表情及Motion-Capture,難怪咁選角都咁大陣仗啦。

《死侍》間接令Ryan的形像也變得抵死寸嘴,深入民心。(網上圖片)

之前已提過,呢套《名偵探比卡超》真人版電影,其實係根據自同名遊戲改編,跟過去認知的故事以平行時空發展,遊戲中玩家會跟小精靈共存一個叫Lime City的城市,你是唯一可以跟比卡超大偵探溝通的人,負責追尋爸爸的下落。呢個比卡超,比原版動畫更冷靜溫馴得多,就連十萬伏特電都收起,純講偵探頭腦,暫時未知劇情會否跟到足,但如果屬實,Ryan Reynolds就連放電動作都唔使扮,慳番。

上年,Ryan Reynolds已在IG share一張死侍版比卡超,相當受歡迎,估唔到呢個crossover會用另一種模式成事。(IG圖片)

至於戲中仲會唔會有其他精靈出現,呢點到現時都未有公布,但粉絲覺得機會甚大,事關遊戲中的案件會涉及多隻小精靈,單單一隻比卡超好難撐咁耐。負責執導的Rob Letterman,執導過多部動畫電影,包括《沙膽大話王》、《天煞撞正怪怪獸》,至於真人電影,都有Jack Black主演的《小人國大歷險》,可見童心就真係夠晒,由他執導比卡超,都不用太擔心。至於編劇方面,找來幫《銀河守護隊》第一集編劇的Nicole Perlman坐鎮,信心有保證。電影出年1月開拍,未定上畫日期,想睇變得抵抵死死的比卡超,就要等等。

其實Ryan平時都滿有喜感的。(IG圖片)

搵到Ryan Reynolds扮演比卡超,粉絲們都相當興奮,事關之前傳出的人選分別有The Rock、「狼人」Hugh Jackman和Mark Wahlberg,四個都都一定唔夠可愛,但當中又以Ryan Reynolds多少少幻想空間,你會預期到他可以為比卡超帶來較輕佻和抵死的語氣。當然,想有死侍的嘴賤,是近乎無可能,日本母公司絕對唔會俾你污染呢隻小精靈,但加多少少生鬼是可以的。而有趣是,早在一年前,已經有Ryan Reynolds的粉絲(IG︰zbrushatpixologic),自發用Dead pool的造型設計了一隻比卡超,當時已經大獲好評,個個都話正,而當聲演比卡超消息一出,該圖片再次被瘋傳,令人覺得該粉絲有神預言之感。
 

早前公布由Justice Smith演真人版男主角,已經有不少反響,但電影公司已一再強調角色並非以「小智」為藍本。(Getty Images/網上圖片)

在《名偵探比卡超》中,比卡超會用腦多過武力,所以好大機會冇得發電。(網上圖片)



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。