【鐵拳道】陳國坤同林嘉華再聚演父子 透露《反黑2》有勁人客串

撰文:
最後更新日期:

由陳國坤、敖嘉年、林嘉華、劉峻緯等人主演的新電影《鐵拳道 一個拳手的故事》,日前在土瓜灣一天台拍攝重要的拳擊場面。

《鐵拳道 一個拳手的故事》劇組在天台搭出擂台景,於高樓大廈包圍下開戰,極具香港特色。(江智騫攝)

林嘉華1974年加入第一屆警察少年訓練學校,成績優異獲得銀笛獎,銀笛獎得獎者為每屆學習警員畢業各班的第一名。(資料圖片)

電影由陳國坤擔正,而劇組亦睇中早前小龍(陳國坤暱稱)與嘉華哥在《反黑》中演上司下屬,所以今次特意要二人再聚,飾演一對拳壇父子。

林嘉華演盲拳老師父

這場擂台大戰,將會由陳國坤上陣,今日亦是電影拍攝的第一場打戲,所以未知會拍成點,但睇過劇本及武指的指導後,小龍都知今次會有排打。「好甘呀,呢場戲會講我俾人打,中間又會有場群揪戲,人多就好難拍又易受傷,都要做足準備。」電影中會打泰拳,小龍都有學過,所以基本功都冇難度。

問到今次再跟嘉華哥合作,小龍都好開心,因為在《反黑》中是上司關係,今次親切點是父子。「其實似兄弟多啲,華哥Keep得好好,而且佢都會做我暗中的教練,教我由一個地下拳手去到職業拳手。」至於演爸爸的嘉華哥,就好鍾意今次角色。「角色本身係靠拳頭搵食,一次意外令我失去大部分視力,但命運又要我輾轉上番擂台,部戲幾有男人味,同大家講情義。」

近日氣溫稍涼,要打戶外打戲小龍都未驚過︰「呢度好好啦,以前試過外國落晒雪,成身仲要噴水扮汗,真係會結霜呀。」(江智騫攝)

《反黑2》過年後開工

提起《反黑》,自然要問問第二季幾時開拍,幾時有得睇,呢刻陳國坤立即以張Sir身份解答大家疑問︰「籌備到七七八八,應該過埋年之後就會開工,盡量想18年同大家見面,否則隔太耐都唔好。」至於仲有咩猛人會加盟,張Sir話剛剛得到一位重量級演員的首肯,肯為套劇客串一日。「初時劇組提出時,我都問得唔得呀?佢點會肯,仲要網劇,結果又真係答應客串一日,不過暫時唔會同大家透露住。」講到咁神秘又咁吸引,到底係邊位重量級人物肯坐陣,大家拭目以待。

陳國坤透露《反黑2》猛料陸續有來,唔知女角郭奕芯又有冇份回歸《反黑》呢?(江智騫攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。