【周末午夜場】《最佳損友闖情關》Do姐新加盟 吳啟華賤到盡

撰文:
最後更新日期:

承接上星期播完《最佳損友》,今晚(27/1)深夜1:45,翡翠台會播出續集《最佳損友闖情關》(1988年12月15日上映),人腳繼續有劉德華、邱淑貞、陳百祥、馮粹帆、曹查理外,還新加關芝琳、鄭裕玲同吳啟華角色。

《最佳損友闖情關》拍攝時Do姐31歲,戲中要做中女冇人愛。(影片截圖)

故事緊接上集,由鹹濕超結婚開始。(影片截圖)

同年上埋續集

《最佳損友》第一集1988年3月上畫,大收$2,100萬票房,於是王晶用短短幾個月時間籌備好續集故仔,集齊一腳開拍。事隔9個月,就拍好兼在同年聖誕檔上映,都大收購1,600萬。故事叫做同上集有關聯,上集結尾講到徐定富(翁世傑 飾)同徐定貴(劉德華 飾)兩兄弟和好,接手家族棺材生意。嚟到今集,徐定富惹來舊同學Robert鄭(吳啟華 飾),一個唔該吞埋間公司,徐定富傻咗,阿貴就決定同最佳損友過檔隔離公司由低做起。

 

為防老婆去滾,結婚日就幫佢紋上「我有疱疹 生人勿近」。(影片截圖)

電子貞操帶係成套戲最好笑一幕。(影片截圖)

電子貞操帶

故事講乜都唔太重要,最緊要有咩笑料,最為人記得應該係鹹濕超(陳百祥 飾)婚後,俾老婆(吳君如 飾)管得極嚴,為防佢出去搞搞層,專登為佢設計一條電子貞操帶,只要一有生理反應就會「BB」響,趕客之餘亦相當抵死,而戲中更在一次生死關頭下,被呢幾下「BB」響累死。另一笑位係三大損友因為整壞三個機械人,於是就要自己扮嚟應付買家會議,同一橋段跟《精裝追女仔》入面扮石膏像差唔多,不過都算幾好笑。

吳啟華之奸

拍續集,加角色添新面孔係基本,Do姐鄭裕玲飾演飾辦公室中女,演專篤人背脊,但位高權重,為接近權力核心,眾人派出鹹濕超犧牲色相,但追落先知原來都唔差。至於歹角,上集的趙世傑開場無耐就傻咗,全片由吳啟華飾演的Robert鄭帶住。那些年吳啟華因為喺電視劇《流氓大亨》演奸演到出神入化,所以進軍影壇的作品《雞同鴨講》,都係演一名奸商,去到《最佳損友闖情關》就更加頂替一代奸人翁世傑位置。所以對於睇港產片大嘅80後嚟講,佢後嚟可以入番電視圈,飾演程至美醫生仲被封號為「師奶殺手」,真係匪夷所思,嘖嘖稱奇



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。