【西遊記女兒國】郭富城日日被針拮嗌想死 林志玲辛苦到喊?

撰文:
最後更新日期:

由首集《大鬥天宮》扮演大魔王,到《三打白骨精》接捧做孫悟空,郭富城今次於《女兒國》中,再次演繹騰雲駕霧的齊天大聖。

訪問這天,郭富城甫入房間,還沒坐下,就已經說:「本應就唔拍㗎啦,真係辛苦,唔係人咁品。」說為錢嗎?以他今時今日的經濟狀況,根本就不成立。他說除了是原班人馬及劇本吸引之外,最主要是他自覺有搞笑的細胞,想藉此改變一下接下來的戲路。

「Monkey King」成了郭富城從影以來最有挑戰性的角色,經此一役,他真正是天不怕地不怕。(陳順禎攝)

拍《西遊記女兒國》再演美猴王,郭富城每日花在特技化妝上的時間至少四、五小時,全身黐上假毛後如同披住件皮草,置身如只有夏天的台南,那種感覺,他用「死得」來形容:「妝講唔到畀你聽有幾咁恐怖,係恐懼!」他說自己本身愛乾淨,黐上假毛那種感覺不太好受,加上今次的毛有點孿,黐上後會有點倒插如針拮一樣。「唉!演戲啫!唔好攞人命嘛,拮足三個幾月。」問他每天如何說服自己去開工,他發出連串笑聲:「唔好諗咁多嘢,拍啦你!」呻完一大輪,他回復正經mode解釋:「都係一個挑戰,希望過年大家可以輕輕鬆鬆,今次角色好玩,之前《西遊記》都係沉重,做演員都係想拍一部能帶給大家開心的作品,《女》就有這種元素。」

「日日俾針拮,呷笨都唔掂……」(陳順禎攝)

最好的默契

日日被針拮,郭富城也不是沒有想過一走了之,但每當看到導演鄭保瑞比自己更愁的時候,唯有故作輕鬆。「因為搵另一個人去做又要花時間去揣摩、同其他演員磨合,這個理念很重要,因為喜劇的默契很重要,的確今次完成了導演想要的方向,亦都拍得很順。」說到默契嘛,跟羅仲謙、馮紹峰、小瀋陽再次交手,加上今次《女兒國》重於「情」,呢個組合又真係無敵。「大家對稿時都會有突然的花火,喜劇的元素就是即興,就算劇本寫好了,到現場又可能會有另一回事,這就是神來之筆。」
 

馮紹峰飾演的唐僧走入女兒國遇上了愛情,身為徒弟的孫悟空會拉他走且或共道難關?

孫悟空=郭富城

經歷過孫悟空之後,郭富城已鍊成了金剛不壞之身,無懼任何角色,但問到假如有第四集的話,他即時落閘:「唔好講笑啦!」又一輪大笑之後。「其實唔同演員都有自己的風格,但我希望郭富城係孫悟空,係會俾人留下深刻印象、曾經做過一個好出色的孫悟空,咁我就已經夠同滿足,但真係唔好再嚟啦。」他認為華語電影當中,比較少有超級英雄,「Monkey King」那股無邊無際的力量對他而言絕對是不二之選。不過,更重要的是今次《女兒國》有着更重的喜感,要引觀眾笑,其實都唔係一件易事。「其實我個人好好笑,一路都想拍,不過少人搵,好的喜劇係用處境、實實在在咁引你發笑。」貴為影帝的郭富城,似乎打算在事業上尋求另一突破。「為將來鋪吓路,如果有喜劇我都會考慮,想有多點變化。」

一個話唔想拍,一個話再傾傾……(陳順禎攝)

禁戀係好題材

雖則主角已擰晒頭,但假如票房好的話,相信兩年後的賀歲片又會有《西遊記》,正如導演鄭保瑞所說。「拍戲都幾現實。」但其實一開始他《女兒國》的題材有點抗拒,後來才發現當中有不少引他入勝的地方,例如唐僧的愛情故事。「雖然我以前成日拍打打殺殺,但骨子裡係想拍愛情,同老闆講佢都係笑,叫我去返殺人。終於等到今次機會,其實如果太都市式愛情,我都未必會拍。」《女兒國》既有大量的打鬥、特效場面,又有鄭保瑞想要的情,一次滿足晒三個願望。「上一集孫悟空較為沉重,這次反而是較為buddy,要他去理解唐僧處於一個什麼的狀況,作為朋友一樣留下來陪他承受後果,雖然他本身也沒有甚至不知愛情是什麼。」

林志玲飾演的河神真係超級突破,相信佢見到自己呢個妝扮都會嚇一跳,郭富城指她每日化妝需時6個多小時,亦有試過淚灑當場。(網上圖片)

林志玲拍到喊

原班人馬上陣,鄭保瑞也承認默契是很重要的,但要在這熟悉的框架中再有突破,也不是易事,至於票房,他笑言唔諗咁多。「為什麼一直覺得他(郭富城)啱做,因為孫悟空既係人又係馬騮,肢體語言同表情都好重要,同埋要有力量,再來就是默契,我點睇佢都係最適合不過,肯定想拍落去……」難為了一眾演員,相信鄭保瑞也有點過意不去,就連首次合作的林志玲,也曾淚灑當場。「因為要將她的皮膚改為透光,所以要封晒塊面。」還未待導演說完,郭富城已爆出一句:「佢喊囉。」鄭保瑞馬上解釋女神的皮膚較易敏感,郭富城聽罷即時搬出自家護膚品牌,說用了之後可馬上回復青春,這對孖寶果然有默契非常好笑。

服裝:IT(郭富城)
髮型:Ian Wong@ii salon(郭富城)
化妝:Terry Yu(郭富城)
場地:帝樂文娜公館DaDa Bar



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。