【職業特工隊6】湯告魯斯極危險死十次？　同「超人」聯手玩命

返嚟啦！湯告魯斯（Tom Cruise）主演的《職業特工隊》系列第6集《職業特工隊：叛逆之謎》（Mission Impossible-Fallout）預告剛剛曝光！湯佬集集都搏晒老命拍，當然今集都不例外，而且是「唔要命」地拍，事關他於拍攝期間意外墮樓，導致腳踝受傷，傷勢未完全康復都繼續埋位拍，務求趕及於暑假檔期上映，而於預告中亦看到湯佬飾演的特務Ethan面對大量足以致命極危險場面，名符其實「不可能的任務」。

攀懸崖跌落街、爬直升機跌落街、跳樓跌落街…唔知仲以為湯佬好似貓有9條命，跌極都唔死，不過特務Ethan就是神一般的人物，打極都唔死，撞極都唔死，跌極都唔死，拍到第6集劇情已不重要，湯佬每集都要挑戰底線，沒有最危險只有更危險，的確預告中看到一幕幕動作場面，仍然賞心悅目。

今集另一亮點是「超人」亨利卡菲爾（Henry Cavill）加盟，與湯佬聯手抗敵，其中一幕二人與一亞裔男子於廁所大打出手，湯佬一拳將對方埋牆，條柱即時爆開半邊，雖說「超人」全宇宙最好打，但特務Ethan跟他對打亦未必會輸。