【尋秦記電影版】古天樂林峯原班人馬開工 歐瑞偉︰想再做陶總管

撰文:
最後更新日期:

2000年播映的劇集《尋秦記》,簡直係一代人的回憶,由一眾主角古天樂、宣萱、林峯、郭羨妮,到首主題曲「天命最高~~」樣樣都係經典,亦都係古天樂心目中的最愛。

到古生做老闆開電影公司天下一,上年已講明買定版權會開拍個電影版,直至今年《影視博覽》又有進一步消息,宣布已落實開拍,將由原班人馬古天樂、林峯及宣萱擔任主角,並由新晉導演黎震龍執導。原班人馬喎,聽見就興奮,咁除咗主角,一眾配角又有冇份先?

一個機械化的秦俑,會唔會代表故事會有新改編?

簽約藝人早透玄機
最期待的畫面終於出現,《尋秦記》電影版落實開拍,雖然今日曝光的先導海報,跟上年見街的依舊,但最吸引係今次宣布埋主角名單。早前《香港01》已留意古仔的經理人,已暗中簽下林峯及宣萱的藝人合約,似要為《尋秦記》電影版集齊人腳做好準備。結果一如所料,今日向外公布的主角名單,便聲稱由原班人馬古天樂、林峯及宣萱擔任主角,真係一聽回憶就返晒嚟。至於執導的就有《明日戰記》導演吳炫輝(高輝),以及新晉的黎震龍聯合導演。黎曾在《殺破狼2》、《單身男女2》及《掃毒》擔任副導演,經驗豐富。據知電影最快會在今年底開拍,萬事俱備,只欠檔期。

《尋秦記》係古天樂在無線最後一套劇,亦係最有代表性一套。

三大主角都集齊,係咪就滿足到一眾「尋迷」的要求呢?當電影版消息一出,網民就針對「原班人馬」呢個賣點,希望唔止三位主角齊腳,最好一眾配角都齊齊整整登場。而眾多配角中,你又最想邊位可以出現呢?

江華嘅眼神,贏在太有自信!(影片截圖)

連晉/嫪毐 江華
一套劇點可以冇歹角,而《尋秦記》的最重要歹角就一定係由江華飾演的連晉,後來被逐出巨鹿候府,後來右手更被項少龍所廢,要忍辱負重向左手神劍劍客嫪毐練左手劍法。最奸係,學成後索性將對方殺死,自己改名換姓成為嫪毐。呢個角色江華演得非常入血,嗰種不可一世及傲氣,令佢折墮時更加好睇。不過作為電影版又好難叫番江華演,搵劉華又得唔得?橫掂動靜都一樣。

當年的郭羨妮絕對靚絕,如果再演琴清應該都唔輸蝕。

琴清 郭羨妮
郭羨妮在劇中要一人分飾兩角,不過現代版的秦青,出咗一集就冇下文,隨後就由琴清身份現身,在秦代滿足項少龍對女朋友的思念,最後更同宣萱飾演的烏廷芳兩女共侍一夫,享齊人之福。其實要搵郭羨妮重演角色都唔難,不過須知道合拍片就係要預留一啲角色俾內地演員參與,要讓出琴清一角都唔奇。

 

趙倩本來同項少龍有得共偕連理,但慘被連晉殺害。

趙國公主趙倩 雪兒
雪兒跟古仔在《創世紀II》已經有合作,連帶去到《尋秦記》飾演一對。二人原來有段美好姻緣,可以共偕連理,但就因為得知連晉計劃殺害項少龍的秘密,而慘遭滅口。雖然雪兒早就退出影壇,但古天樂上年就主動搵番呢位老朋友出來,在《殺破狼 ‧ 貪狼》中亮相,即使戲份唔多,不過已經凡事都有可能,只要古生出句聲,齊章話咁易。

歐瑞偉飾演的陶總管,真係莊諧並重。

陶總管  歐瑞偉
其實《尋秦記》中,有一個角色都非常重要,就係聽命烏廷芳,經常跟項少龍一齊的陶總管。角色本來一臉正經,但每當項少龍講出一啲現代說話時,佢會好認真咁學習嘅樣,真係非常好有喜感。對於有冇機會原班人馬上陣,《香港01》就致電歐瑞偉查問,KC表示未有收到通知︰「如果有份就最好啦,哈哈……我都想再做多次陶總管,呢個角色自己都好鍾意,咁大嘅製作係演員都想啦!」希望古生聽到呢番話,等陶總管都有機會殺入大銀幕啦!



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。