決戰葡京之巔｜楊證樺主演Cult片翻Hit 親解7分鐘重述1句對白原因

做演員很奇怪，有時你拍了一套作品，可能冇人睇、冇人知、冇人講，但隨住科技發達，有一日這些本來以為已石沉大海的作品，卻會突然出土，楊證樺、林偉雄主演的《決戰葡京之巔》正是一大實證。這套2000年的Cult片之霸，片名向劉偉強執導、劉德華、鄭伊健、張家輝、趙薇和楊恭如主演的《決戰紫禁之巔》致敬，但內裡當然就是完全無關的另一個故事。23年後，YouTube頻道「梁仲文化」拍片講這套戲有幾爛，卻竟成功引起熱話，Hit到有放映會，連主角楊證樺都搲頭，他接受《香港01》訪問時表示：「我到而家睇返都唔知拍咗啲咩！」
場地：Glasshouse Greenery
攝影：梁碧玲
攝錄：林志龍

觀眾對楊證樺的認知，大多來自於他在TVB拍過的劇集，原來入行初期，他拍過一套現今忽然被捧成經典Cult片的《決戰葡京之巔》，電影片長90分鐘，港、澳兩地取景，但就完全冇劇本，一個長鏡可以7分鐘影住楊證樺不斷重複：「洪爺、Suki、平頭裝……」對白，3分鐘一鏡到底影林偉雄飲完整杯凍檸茶，不止觀眾問：「我睇緊啲乜嘢？」就連楊證樺都說：「我到而家睇返都唔知拍咗啲咩。」

楊證樺說這類電影是「雞精版電影」，拍來簡單求其，而編劇朋友萬力問他接不接戲，自己當年是新人，有機會當然什麼都做，「接完，問佢有冇劇本，佢話冇啊，我話：『吓！冇劇本？』」就是這麼搞笑，雖然有編劇，不過冇劇本，一套90分鐘的電影，原來僅得四句故事大綱，聽聽楊證樺怎麼說：「佢話呢個關乎一個澳門殺手嘅故事，你演繹一個殺手，遇著一個過氣殺手，當中有個老闆叫洪爺，秘密操控住你哋，佢有個親生女叫Suki，你記住呢四樣嘢就得，自由發揮啦！」滿頭問號的他，每拍一幕就諗：「得唔得㗎？」他坦言這套戲確實是爛片，現在回望得啖笑。

記者問楊證樺，你的編劇朋友怎麼要拍一套如此冇內容的戲，他就覺得：「從藝術角度，我都唔知佢玩緊乜嘢，但作為一個演員，我接得，佢叫我咁做我咪做囉，我都唔知剪出嚟個製成品會係咁樣㗎。」其實千禧年代有不少同類電影，賣埠為主，即使VCD封套上的資料全錯都冇人理會，除了《決戰葡京之巔》，萬力編劇和監製的還有《半支雪茄》、《魔夢》、《靈界轉生》等，全都是二次創作其他片名再衍生另一個完全不相干的故事，各位有興趣可以翻睇，但當然，全部都一樣冇劇本啦。

楊證樺說，自己當時只能把《決》當是藝員訓練班的即興劇演繹，講到戲中還有近年已轉行做素食廚師的林偉雄（現名：林雲中），兩位的化學作用可以用尷尬形容，講錯對白不Cut機還得繼續演下去，他就笑說：「本身話佢係第一，我第二，其實都冇話㗎喇，搓勻佢，你噏得多咪第一，噏得少咪第二囉，同佢鬥掟嘢出嚟咋嘛，如果唔係點會衍生到……『Suki、洪爺、洪爺、Suki、平頭裝、平頭裝……』講到冇嘢咪撈返出嚟，其實全程喺度撈，冇辦法，你冇資訊呀！」

至於這套陳年舊戲何以突然翻Hit，就要講到YouTube頻道「梁仲文化 LEUNGCHUNGMANFA」，本身都是電影圈中人的梁仲文，兩個月前用搞笑啜核方式介紹這套Cult片，至今獲7萬多人收看，相信已勁過當年票房好多倍！楊證樺對此事本來不知情，但竟然很多朋友跟他說：「喂，好Hit喎你而家！」他其實不明所以，並續說：「好多TVB導演同我講，話你嗰套嘢好正，我話有幾正？四個point，冇對白，冇劇本，自由發揮，一個Long-shot好長，冇嘢搞喎，佢話總之正啦！」

梁仲文見反應甚好，曾舉行放映會，而之後他亦有私訊過楊證樺，邀請他連同當年班底延續熱話，飾演洪爺的莫偉文都有份一齊拍攝，可惜編劇萬力就忙於北京的工作無緣參與，「梁仲文叫我搵返個編劇，編劇都話好，佢都想參與，但係佢喺北京唔得閒，而家喺大陸發展緊，仲做埋導演添。佢再加多咗一個演員，到時睇吓，大家密切留意！」從楊證樺提供的花絮相中，見到游學修與倪安慈，估計很大機會在「試當真」有得睇呢！