夜晚十點幾鐘，喺某條荒涼嘅道路上飄出三個女人，附近除咗一間專做婚宴嘅食肆之外，都無咩人類活動，所以都幾肯定係去完飲嘅人。三個女人一黑一白一灰，完美演繹OL嘅永恆簡約美學。

「去邊食？」「是但啦。」未決定目的地就上的士嘅人真係唔少，特別係少的士經過嘅地方。視乎情況，有時一開車就係分岔路就死都唔開車，今次係單程路，開車後仲有段距離先到紅綠燈嘅，我就落旗慢駛開車。

灰衣女作出決定：「去旺角先啦，多啲嘢食。」終於敲定咗目標後，我就可以放心開車。黑衣女問：「你哋俾咗幾多人情呀？」灰衣女唔止一身白色，回應都係灰色地帶：「幾百啦，同平時差唔多。」「車，咁即係幾多呀？」黑衣女問得人就追問到底。「你哋呢？我俾好少咋。」灰色地帶持續。白衣女開始競投式提問：「幾少先，三百？四百？我就俾八百。」通常一有人講咗實數，其他人就唔怕講，灰衣女終於講出數字：「我俾咗六百咋。」「吓，咁多？我俾得五百咋。」最先發問嘅黑衣女原來俾得最少，難怪最在意其他人嘅數字，睇黎佢哋同主人家都唔係太熟，唔知咩關係呢？

俾得最多嘅白衣女，可能想拉近同另外兩人嘅距離，俾個理由出黎：「咁我同ANNA同GRADE，俾多啲都合理嘅，如果佢上次結得成，我咪又係俾咁少。」唔係問自己嘢，灰衣女反應速度完全唔同：「結唔成？點解結唔成嘅，快啲講啦。」「咪發姣囉，臨結婚仲要去老蘭浦，又唔知自己嗰大粒墨特出喎，咪俾佢老公啲FRIEND認到囉。」黑衣女睇黎將呢個故事講過無數次，一口氣簡而精咁講晒成件事，寥寥數語，足以令聽者對ANNA留有蕩婦嘅印象。咁短嘅簡介，白衣女可能覺得意猶未盡：「邊止認到咁簡單，仲有捉姦事件㗎，嗰個男人都真係慘龜龜。」灰衣女反而明白男人心理：「如果都係戴綠帽，至少喺結婚前除返落黎，都算係咁啦，今日嗰個就真係唔知幾時會變慘龜龜喇。」「咁又係呀，我賭年半啦，所以你哋真係唔使介意人情俾得少，真係介意咪下次俾多啲囉。」白衣女嘅真誠祝福，令車廂入面響起連串笑聲，夾雜住「好賤呀」「下次早啲到喎」等嘲諷，我估計個新娘平時嘅作為應該頗為乞人憎。

「下次真係仲要去呀？」笑聲稍弱時，灰衣女再度用提問引起笑聲。一輪歡暢嘅恥笑後，白衣女認真回答：「你哋做得唔耐唔熟ANNA，佢咩事都要通知全世界㗎，今次連英姐都俾佢迫住黎呀，你話下次使唔使去丫。」「邊個英姐？隔離TEAM㗎？」黑衣女問。「咩呀，朝早先返黎嗰個PART TIME清潔姐姐呀，你日日咁遲返梗係唔知啦。」「全公司都俾佢請晒咁滯，咁真係好有機會要再去。」灰衣女聲音中透著絕望。白衣女安慰返佢：「唔緊要啦，咪當睇戲囉，頭先你無睇後面嗰枱咩？」「有咩特別？」灰衣女問出同我一樣嘅疑問。

「嗰枱嗰個馬尾仔呀，咪ANNA個前度囉。」白衣女介紹返。黑衣女嘅回答令人捧腹：「佢咁多前度，邊記得咁多。」又一輪笑聲之後，灰衣女嘅質疑蓋過笑聲：「佢真係咩人都請喎，連前度都請埋。」「可能人地仲有緊密聯繫呢。」「或者人地真心黎祝福個新郎。」幾個人一齊講，真係分唔到邊個打邊個。

到咗旺角落低乘客之後，我先發現車廂嘅環境原來可以咁寧靜，三個女人嘅威力，果然名不虛傳。新娘子ANNA嘅人品如何，我唔認識佢無咩好講，而大半個公司都請晒去飲，即使主人家只係想將自己嘅幸福同人分享，招來嘅都唔見得係真誠嘅祝福。喺唔熟嘅同事上台同新人握手合照時，心底嗰句說話到底係點？我真係好想知道。

（本文純屬作者意見，不代表香港01立場。）