文：The Girl on Fire

「同學揀科要視乎興趣同能力」，呢句說話好記得係我form 3 升form 4，要交表決定DSE讀咩選修科時，當時兩個班主任都掛在口邊同我地講，而我，印象一直好深刻。

嗰時大概冇諗過10年後嘅自己對同一句說話會有咁大嘅感受。係香港（計埋今年final year )讀咗18年書，六年小學，六年中學，六年大學，唔敢講話自己對香港教育制度有好深切嘅研究同認識，但自問都稱得上曾經係呢個制度入面生存過，亦叫做好彩搵到自己想行嘅路，但人越大，對香港嘅教育制度越嚟越灰心。

政策上固然有好多不足之處，但每個地方嘅教育政策都有佢嘅優缺，可能更多人都比我更清楚。但我想講嘅係，一句，「同學揀科要視乎興趣同能力」，背後承載嘅，遠遠俾佢字面嘅意思來得深遠。係六年小學加六年中學嘅生涯，相信有好多人同我一樣，有「興趣」嘅科目並唔係冇，但喺課堂以外係咪可以吸引到學生再自行去發掘同鑽研呢一門興趣，就係另一回事，更多嘅只係見到同學為應付學校要求而完成某啲看似係興趣嘅要求，好似年復一年嘅中英文閱讀報告，相信你同我都見證過唔少同學仔「抄考」完成，看似成功引起同學「閱讀」嘅興趣，但當中唔多唔少都有點自欺欺人吧。

至於所謂嘅「能力」，坦白講，十二年免費教育中我學到嘅真正能力，包含團隊合作、自律、獨立、自我表達等等數之不盡，但好抱歉，記憶以來呢啲能力大部份都並唔係來自課堂上嘅「學習」。至於課堂上我記得啲咩？我記得《木蘭辭》、《燕詩》、conditional sentence ，仲有probabilities 、愛情三角論、馬思洛追求層次、安史之亂（恕我不能盡錄）。呢啲嘢對我嘅人生有冇用？一定有用，我亦唔覺得學習呢啲知識係浪費咗我嘅時間，但都係個句，DSE面前，相信你同我（或者我哋自己）都見證過身邊唔少同學去齊所謂嘅補習名師課程，明明有啲人已經勁到全級考頭三，但都仲要去？係呀，真係越勁先越要去啊。唔好同我講去補習係為咗擴闊更多嘅課外知識，Bullshit ！雖然唔排除真係有微量人係咁，但起碼我身邊嘅朋友同學(包括我自己）去都係為咗一個所謂嘅Level 4 or above ，講緊仲要係用咗你老豆呀媽成幾千銀or above 呀大佬。

可能有啲人會話，讀12年書係個制度入邊攞到好成績，然後入到神校神科，出嚟可以高薪厚職，人生係咁，唔好咩？

如果係香港現行嘅教育制度下，有人可以經過12年嘅「洗禮」，並憑着努力入到佢真心有興趣嘅科目可以達成到佢嘅理想職業，咁我真係恭喜你，真心嘅。但又係嗰句啦，相信你同我身邊都見證唔少人（包括我自己）大學（我曾經）讀嗰科自己根本談不上有興趣，讀嗰科嘅原因只係咁啱個分數夠入，可以有四年U Life ，上堂？得過且過。分數？但求過3。更多嘅係，去到畢業，先開始諗，其實我想做咩㗎呢？

講番轉頭，「同學揀科要視乎興趣及能力」，其實呢句說話真係講得好啱，不過錯就錯在係香港嘅教育制度內，「興趣」停留喺學科學習範圍層面，「能力」停留係應付固有考試模式層面。

如果可以用十二年嘅時間，去教識學生自己發掘學科以及學科以外嘅興趣，培養學生考試以及考試以外嘅能力，相信香港會多好多發明家、畫家、運動員，少啲Banker 、律師、醫生，職業無貴賤之分，但香港，會多好多可能性。

其實「興趣及能力」，陪伴每一位學生走過嘅，應該比十六年更多，我地嘅人生，難道唔係都視乎自己嘅興趣同能力嗎？

認清自己嘅興趣，了解自己嘅能力，先可以揾到屬於自己嘅路。我相信，呢個先係教育真正嘅使命。

但願我有生之年可以見到香港嘅教育制度改變，可以見證更多人大學畢業時，係問心無愧，真心為自己以本科嘅知識為榮。

PS: 我絕非否定入大學只係為咗U Life嘅目的性，對我而言U Life 反而先係大學嘅真諦，意思唔係因為做大學生有得做大學五件事好正，而係大學會係人生入面一個短暫嘅全自由時間，俾大學生一個機會去經歷同選擇自己想試想做嘅事，為未來嘅人生做好準備。同樣地，如果有清晰目標，選擇唔讀大學都可以有一條清晰嘅人生路。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）